Global Investors Summit 2023: ఒక్క రోజే రూ. 11 లక్షల కోట్లకుపైగా ఒప్పందాలు.. సమ్మిట్‌లో విశాఖపై సీఎం జగన్‌ కీలక ప్రకటన

జగన్‌ సర్కార్‌ విశాఖలో ప్రతిష్టాత్మకంగా నిర్వహించిన గ్లోబల్‌ ఇన్వెస్టర్స్‌ సమ్మిట్‌కు.. విశేష స్పందన వచ్చింది. తొలిరోజు దాదాపు రూ.11లక్షల కోట్ల విలువైన పెట్టుబడులు పెట్టేందుకు దిగ్గజ పారిశ్రామిక వేత్తలు ఏపీ ప్రభుత్వంతో ఎంఓయూలు చేసుకున్నారు.

Global Investors Summit

Sanjay Kasula | Edited By: Anil kumar poka

Updated on: Mar 04, 2023 | 12:33 PM

Global Investors Summit in Visakhapatnam: విశాఖలో గ్లోబల్‌ ఇన్వెస్టర్స్‌ సమ్మిట్‌ అట్టహాసంగా ప్రారంభమైంది. ఈ సందర్బంగా పారిశ్రామికవేత్తలు ఏపీలో పారిశ్రామిక అవకాశాలు, భవిష్యత్త్‌లో పెట్టుబడులపై కీలక ప్రసంగాలు చేశారు. రాబోయే రోజుల్లో భారీ పెట్టనున్నట్టు తెలిపారు. దిగ్గజ పారిశ్రామిక వేత్తలతో పాటు, కేంద్రమంత్రులు, 46 మంది దౌత్యవేత్తలు, 30 మంది గ్లోబల్‌ బిజినెస్‌ లీడర్లు, 25 దేశాలకు చెందిన 14 వేల మంది ప్రతినిధులు ఈ సమ్మిట్‌కు హాజరయ్యారు. ఏపీలో పరిశ్రమలు నెలకొల్పేందుకు 345 ప్రతిపాదనలు వచ్చాయన్నారు సీఎం . వాటి విలువ 13 లక్షల కోట్లు అని ప్రకటించారు. జాతీయ, అంతర్జాతీయ పెట్టుబడుల కోసం ప్రత్యేక డెస్క్‌ ఏర్పాటు చేస్తామన్న సీఎం.. 21 రోజుల్లో అనుమతుల మంజూరు చేస్తామన్నారు.

మూడు రాజధానులపై మరోసారి స్పష్టత ఇచ్చారు ఏపీ సీఎం వైఎస్‌ జగన్. ప్రముఖ వ్యాపారవేత్తలు, వేలాది మంది అతిధుల మధ్య ఎగ్జిక్యూటివ్‌ కేపిటల్‌ నగరంగా విశాఖ ఉంటుందని స్పష్టమైన ప్రకటన చేశారు. గతంలో ఢిల్లీ వేదికగా చేసిన వ్యాఖ్యలే మరోసారి సాగరతీరం సాక్షిగా చెప్పారు.

గ్లోబల్‌ ఇన్వెస్టర్స్‌ సమ్మిట్‌ సందర్భంగా 11లక్షల 87 వేల 756 కోట్ల విలువైన 92 ఒప్పందాలు చేసుకుంది ఏపీ సర్కార్‌. NTPCతో 2 లక్షల 35 వేల కోట్లు, ABC లిమిటెడ్‌తో లక్షా 20 వేల కోట్ల ఒప్పందాలు చేసుకుంది. రెన్యూ పవర్‌తో 97 వేల 550 కోట్ల విలువైన ఒప్పందం కుదుర్చుకుంది.