Vidadala Rajini: అసైన్డ్ భూముల్లో మైనింగ్.. మంత్రి విడదల రజినికి హైకోర్టు నోటీసులు..
ఆంధ్రప్రదేశ్ వైద్య మంత్రి విడదల రజినికి హైకోర్టు షాకిచ్చింది. చిలకలూరిపేటలో అసైన్డ్ భూములను గ్రానైట్ తవ్వకాలకు ఇవ్వడంపై ఏపీ హైకోర్టు నోటీసులు జారీ చేసింది.
ఆంధ్రప్రదేశ్ వైద్య మంత్రి విడదల రజినికి హైకోర్టు షాకిచ్చింది. చిలకలూరిపేటలో అసైన్డ్ భూములను గ్రానైట్ తవ్వకాలకు ఇవ్వడంపై ఏపీ హైకోర్టు నోటీసులు జారీ చేసింది. చిలకలూరిపేట మండలం మెరకపూడిలో అసైన్డ్ భూములను గ్రానైట్ తవ్వకాల కోసం అనుమతులు ఇవ్వడంపై ఏపీ హైకోర్టులో రిట్ పిటిషన్ దాఖలైంది. అసైన్డ్ భూముల్లో తవ్వకాలకు రెవెన్యూ అధికారులు ఎన్‌వోసీ ఇవ్వడంపై రైతులు అభ్యంతరం తెలుపుతూ.. కోర్టులో పిటీషన్ దాఖలు చేశారు. అసైన్డ్ భూములకు సంబంధించిన రైతులను బెదిరించి చట్టవిరుద్ధంగా ఎన్‌వోసీ ఇచ్చారని రైతులు పిటిషన్‌లో వివరించారు. దీనికి సంబంధించి రైతులు మంత్రి విడదల రజినితోపాటు పలువురు పేర్లను చేర్చారు.
అయితే, ఈ పిటీషన్ పై మంగళవారం విచారించిన ధర్మాసనం.. మంత్రి విడదల రజిని, ఎంపీ అవినాష్ రెడ్డి మామ ప్రతాపరెడ్డి, తహశీల్దారు, సీఐ, స్థానిక ఎస్సైలకు న్యాయస్థానం నోటీసులు జారీ చేసింది. ఈ పిటీషన్లకు సంబంధించి కోర్టు తుది నిర్ణయానికి లోబడి లీజు ఖరారు ఉంటుందని ధర్మాసనం ఈ సందర్భంగా స్పష్టం చేసింది. తదుపరి విచారణను హైకోర్టు మూడు వారాలకు వాయిదా వేస్తూ నిర్ణయం తీసుకుంది.
అక్రమ మైనింగ్ పై మంత్రి, పలువురు బాధ్యులు వివరణ ఇవ్వాలంటూ హైకోర్టు నోటీసుల్లో పేర్కొంది. కాగా.. మెరకపూడిలోని 91 ఎకరాల అసైన్డ్ భూమిలో తవ్వకాలకు అనుమతించడంలో మంత్రి విడదల రజిని హస్తం ఉందని రైతులు పిటిషన్ లో వివరించారు. దీంతో విచారణ చేపట్టిన కోర్టు.. వివరణ ఇవ్వాలంటూ మంత్రి విడదల రజినితో పలువురికి నోటీసులు జారీ చేయడం ఏపీలో చర్చనీయాంశంంగా మారింది.
మరిన్ని ఏపీ వార్తల కోసం..
