Tiktok Challenge: టిక్ టాక్‌లో నిద్రమాత్రలు ఛాలెంజ్.. స్వీకరించి ప్రాణాలు పోగొట్టుకున్న 13 ఏళ్ల బాలుడు

ప్రస్తుతం వయసుతో సంబంధం లేకుండా అందరికీ పాపులర్ పిచ్చి పట్టింది. రకరకాల విన్యాసాలతో సామాజిక మాధ్యమాల ద్వారా పాపులారిటీని, అభిమానులను సంపాదించుకుంటున్న యువతీ యువకులు ఎందరో ఉన్నారు. సోషల్‌ మీడియాలో ఆదరణ సొంతం చేసుకుని ఓ చిన్న సైజు సెలబ్రెటీగా చెలామణీ అవుతున్న వారు ఎందరో ఉన్నారు. అయితే అమృతం ఎక్కువగా సేవించినా అది  విషంగా మారుతుంది అని అంటారు. అవును కొన్నిసార్లు సోషల్ మీడియాలో రకరాల ఛాలెంజ్‌లు హల్ చల్ చేస్తూ ఉంటారు.  అయితే ఇలాంటి ఛాలెంజ్ లో కొందరు ప్రాణాలు కోల్పోయిన సందర్భాలున్నాయి. తాజాగా ఇలాంటి ఘటనే అమెరికాలో జరిగింది. అతిగా టిక్‌టాక్‌ వినియోగం ఓ బాలుడి ప్రాణాలను బలిగొంది. వివరాల్లోకి వెళ్తే..

అమెరికాలోని ఓహియోకు చెందిన జాకబ్ స్టీవెన్స్ (13) అనే మైనర్ బాలుడు టిక్‌టాక్‌లో ఇచ్చిన ఛాలెంజ్‌ను స్వీకరించాడు. ఆ తర్వాత అనారోగ్యం బారిన పడి చికిత్స నిమిత్తం ఆస్పత్రిలో చేరారు. అయితే చికిత్స కు స్పందించని ఆ బాలుడు మృతి చెందాడు.

ప్రముఖ సోషల్ మీడియా ప్లాట్ ఫామ్ టిక్ టాక్ లో బెనాడ్రిల్ అంటే నిద్ర మాత్రలు ఎవరు ఎక్కువ తీసుకుంటారో అన్న ఛాలెంజ్ చక్కర్లు కొడుతోంది. ఈ ఛాలెంజ్ ను జాకబ్ స్టీవెన్స్ తన టిక్ టాక్  స్నేహితులతో  కలిసి ఎవరు ఎక్కువగా స్లీపింగ్ పిల్స్ ను తీసుకోవచ్చో అన్న సవాలులో పాల్గొన్నాడు. ఛాలెంజ్‌లో భాగంగా స్టీవెన్స్ 12-14 బెనాడ్రిల్ మాత్రలు తీసుకున్నాడు. అయితే 13 ఏళ్ల బాలుడికి అతను తీసుకున్న నిద్రమాత్రలు ఓవర్ డోస్. దీంతో అపస్మారక స్థితిలో చేరుకున్నాడు. తమ కొడుకును చూసిన తల్లిదండ్రులు వెంటనే స్పందించి ఆస్పత్రిలో చేర్పించారు. చికిత్స తీసుకుంటూ ఒక వారం తర్వాత చికిత్స ఫలించక బాలుడు మరణించాడు. దీంతో తల్లిదండ్రులు కన్నీరు మున్నీరుగా విలపిస్తున్నారు.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..