ఉస్మాన్ హాది మరణంతో అట్టుడుకుతోన్న బంగ్లాదేశ్.. సంతాప దినాలు ప్రకటించిన సర్కార్

బంగ్లాదేశ్ అట్టుడుకుతోంది. ఇంక్విలాబ్ మంచ్ ప్రతినిధి షరీఫ్ ఉస్మాన్ హాది మరణం తరువాత రాజధాని ఢాకాతో సహా అనేక నగరాల్లో హింస చెలరేగింది. హాది సింగపూర్‌లో చికిత్స పొందుతూ మృతి చెందాడు. ఆరు రోజులుగా ప్రాణాలతో పోరాడుతూ గురువారం రాత్రి మరణించాడు. తదనంతరం, ఢాకాలో ఒక గుంపు వ్యక్తులు వార్తాపత్రిక కార్యాలయాలపై దాడి చేసి ధ్వంసం చేశారు. ఒక భవనానికి నిప్పంటించారు.

గత వారం గుర్తు తెలియని దుండగులు షరీఫ్ ఉస్మాన్ హదీ తలపై తుపాకీతో కాల్చారు. తీవ్రంగా గాయపడ్డ హదీని మెరుగైన వైద్యం కోసం సింగపూర్ తరలించారు. అయితే గురువారం (డిసెంబర్ 18) దేశాన్ని ఉద్దేశించి ప్రసంగిస్తూ, తాత్కాలిక ప్రభుత్వ అధిపతి ముహమ్మద్ యూనస్ మాట్లాడుతూ, “నేను మీకు చాలా విచారకరమైన వార్తను అందిస్తున్నాను. జూలై తిరుగుబాటులో నిర్భయ యోధుడు, ఇంక్విలాబ్ మంచ్ ప్రతినిధి షరీఫ్ ఉస్మాన్ హదీ ఇప్పుడు మనతో లేరు” అని అన్నారు. హదీ హంతకులను పట్టుకోవడానికి త్వరితగతిన చర్యలు తీసుకుంటామని యూనస్ హామీ ఇచ్చాడు. దేశవ్యాప్తంగా సంతాప దినాన్ని ప్రకటించాడు.

ఇంక్విలాబ్ మంచ్ ప్రతినిధి షరీఫ్ ఉస్మాన్ బిన్ హాడి మరణ వార్త తెలియగానే, ఆయన మద్దతుదారులు వార్తాపత్రిక కార్యాలయాలపై దాడి చేశారు. సోషల్ మీడియాలో ప్రసారం చేసిన ప్రత్యక్ష వీడియోలలో ప్రజలు కర్రలు పట్టుకుని కార్యాలయాలను ధ్వంసం చేశారు. ప్రోథోమ్ అలో ముందు వీధిలో కూడా మంటలు కనిపించాయి. ఒక కొంతమంది వార్తాపత్రిక ఉద్యోగులు రెండు కార్యాలయాలలో చిక్కుకున్నారు.

స్థానిక మీడియా కథనాల ప్రకారం, గత శుక్రవారం ఢాకాలో జరిగిన తుపాకీ దాడిలో తీవ్రంగా గాయపడిన ఇంక్విలాబ్ మంచ్ ప్రతినిధి షరీఫ్ ఉస్మాన్ హది సింగపూర్ జనరల్ ఆసుపత్రిలో చికిత్స పొందుతూ మరణించారు. త్వరలో జరగబోయే జాతీయ ఎన్నికల్లో ఢాకా-8 నుండి సంభావ్య అభ్యర్థిగా బరిలోకి దిగేందుకు ఉస్మాన్ హదీ సిద్దమయ్యారు. అయితే డిసెంబర్ 12న రాజధాని పురానా పల్టాన్ ప్రాంతంలో తలపై కాల్పులు జరిగాయి.

ఎన్నికల ప్రచారం కోసం అతను బ్యాటరీతో పనిచేసే రిక్షాలో ప్రయాణిస్తుండగా, ఒక దుండగుడు మోటార్ సైకిల్ పై అతనిని వెంబడించి కాల్పులు జరిపాడని దర్యాప్తు అధికారులు తెలిపారు. మొదట అతన్ని ఢాకా మెడికల్ కాలేజీ ఆసుపత్రి (DMCH) కు తరలించారు. అక్కడ తలకు తీవ్ర గాయాలు కావడంతో వైద్యులు అతనికి శస్త్రచికిత్స చేశారు. అతని పరిస్థితి చాలా విషమంగా ఉందని వైద్యులు తెలిపారు, బుల్లెట్ అతని ఎడమ చెవి పైన నుండి వెళ్లి తల కుడి వైపు నుండి బయటకు వెళ్లింది. దీనివల్ల మెదడు తీవ్రంగా దెబ్బ తిన్నట్లు వైద్యులు తెలిపారు. తరువాత అతన్ని మెరుగైన చికిత్స కోసం ఎవర్‌కేర్ ఆసుపత్రిలో చేర్చారు. డిసెంబర్ 15న సింగపూర్‌కు విమానంలో తరలించారు.

ఇంక్విలాబ్ మంచ్ అధికార ప్రతినిధి షరీఫ్ ఉస్మాన్ హది మరణం తరువాత, బంగ్లాదేశ్ ప్రధాన సలహాదారు ముహమ్మద్ యూనస్ శుక్రవారం డిసెంబర్ 20వ తేదీ శనివారం వరకు జాతీయ సంతాప దినంగా ప్రకటించారు. జూలై తిరుగుబాటులో ప్రముఖ వ్యక్తి, 2025 ఎన్నికల అభ్యర్థి షరీఫ్ ఉస్మాన్ హది హత్య ఢాకాలో విస్తృత నిరసనలకు దారితీసింది.

ఎన్నికల ప్రచారంలో ఉండగా హాదిపై దాడి జరిగింది. ఇది రాబోయే ఎన్నికల వాతావరణాన్ని మరింత ప్రమాదంలో పడేసింది. బంగ్లాదేశ్ ప్రధాన సలహాదారు ముహమ్మద్ యూనస్ దేశాన్ని ఉద్దేశించి ప్రసంగిస్తూ, అన్ని ప్రభుత్వ, సెమీ-ప్రభుత్వ, ప్రైవేట్ భవనాలు, అలాగే విదేశాల్లోని బంగ్లాదేశ్ రాయబార కార్యాలయాల వద్ద జాతీయ జెండాను సగం ఎత్తులో ఎగురవేస్తామని ప్రకటించారు. శుక్రవారం ప్రార్థనల తర్వాత హాది ఆత్మకు శాంతి చేకూరాలని ప్రత్యేక ప్రార్థనలు జరిగాయి. ఉస్మాన్ హాది భార్య, అతని ఏకైక సంతానం సంక్షేమానికి ప్రభుత్వం బాధ్యత వహిస్తుందని ఆయన అన్నారు.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..