అధ్యక్ష ఎన్నికల్లో ఓడిపోయినా వైట్ హౌస్ ట్రంప్ దేనా ? రెండోసారీ ఆయనదే భవనమంటున్న అధికారి

అమెరికా అధ్యక్ష ఎన్నికల్లో ఓటమి చెందినప్పటికీ డొనాల్డ్ ట్రంప్ మాత్రం వైట్ హౌస్ ను వీడేలా లేరు. రెండోసారి కూడా ఈ శ్వేత సౌధమే ఆయనకు నివాసంగా ఉంటుందని మాజీ అధికారి ఒకరు అంటున్నారు. బహుశా ట్రంప్  మళ్ళీ ప్రెసిడెంట్ గా ఎన్నికవుతారని భావిస్తున్నామని, ఈ ఎన్నికల్లో ఫ్రాడ్ జరిగినట్టు కోర్టులు ధృవీకరిస్తాయని ఆశిస్తున్నామని ట్రంప్ కు మాజీ ట్రేడ్ అడ్వైజర్ అయిన పీటర్ నవారో వ్యాఖ్యానించారు. ఈ ఎలెక్షన్ ఫ్రాడ్ అనడానికి ఆధారాలతో కూడిన పలు అఫిడవిట్లు ఫెడరల్ కోర్టుల్లో పరిశీలనకు సిధ్దంగా ఉన్నాయని ఆయన తెలిపారు. వీటి విచారణ సత్వరమే జరగాలన్నారు. కాగా ట్రంప్ మద్దతుదారులు ఏ ఆరోపణలు చేస్తున్నారో ఈయన కూడా వాటిని వల్లె వేశారు. అయితే జో బైడెన్ ఈ దేశ నూతన అధ్యక్షుడని, అందులో సందేహం లేదని బైడెన్ సపోర్టర్లు స్పష్టం చేస్తున్నారు. ఎలెక్టోరల్ ఓట్లు ఆయనకు ఎంత పెరిగాయో చూసుకోండని వారు బల్ల గుద్ది చెబుతున్నారు.