బంగాళాఖాతంలో మరో అల్పపీడనం.. రాష్ట్రంలో మూడు రోజుల పాటు భారీ వర్షాలు..!
బంగాళాఖాతంలో ఏర్పడిన అల్పపీడనం ప్రభావంతో తెలంగాణలో రానున్న మూడు రోజులు (సెప్టెంబర్ 19, 20, 21) భారీ వర్షాలు కురిసే అవకాశం ఉంది. వాతావరణ శాఖ తెలంగాణకు రెడ్ అలర్ట్ జారీ చేసింది. ఉరుములు, మెరుపులతో కూడిన వర్షాలు, గంటకు 30-40 కి.మీ. వేగంతో గాలులు వీచే అవకాశం ఉందని IMD హెచ్చరించింది. ప్రజలు అప్రమత్తంగా ఉండాలని సూచించింది.
Updated on: Sep 19, 2026 | 5:05 PM
హైదరాబాద్: తెలంగాణలో రానున్న మూడు రోజులు వర్షాలు కొనసాగే అవకాశం ఉందని భారత వాతావరణ శాఖ (IMD) హైదరాబాద్ వాతావరణ కేంద్రం వెల్లడించింది. సెప్టెంబర్ 19, 20, 21 తేదీల్లో రాష్ట్రంలోని పలు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని తెలిపింది. అదే సమయంలో కొన్ని జిల్లాల్లో భారీ వర్షాలు అక్కడక్కడ కురిసే అవకాశం ఉన్నందున ప్రజలు అప్రమత్తంగా ఉండాలని సూచించింది.
శనివారం (సెప్టెంబర్ 18) రాష్ట్రంలోని కొన్ని జిల్లాల్లో తేలికపాటి నుంచి మోస్తరు వర్షాలు అక్కడక్కడ నమోదయ్యే అవకాశం ఉందని వాతావరణ శాఖ పేర్కొంది. ఆదివారం, సోమవారం మాత్రం రాష్ట్రంలోని చాలా జిల్లాల్లో తేలికపాటి నుంచి మోస్తరు వర్షాలు కొన్ని ప్రాంతాల్లో కురిసే అవకాశం ఉందని తెలిపింది.
మరోవైపు, మూడు రోజుల పాటు తెలంగాణలోని కొన్ని ప్రాంతాల్లో గంటకు 30 నుంచి 40 కిలోమీటర్ల వేగంతో దిగువ స్థాయి గాలులు వీచే అవకాశం ఉందని IMD హెచ్చరించింది. అలాగే కొన్ని జిల్లాల్లో ఉరుములు, మెరుపులతో కూడిన వర్షాలు అక్కడక్కడ సంభవించే అవకాశం ఉందని పేర్కొంది. భారీ వర్షాలు, పిడుగులతో కూడిన వర్షాల సమయంలో ప్రజలు జాగ్రత్తలు తీసుకోవాలని సూచించింది.
ఇదిలా ఉండగా, నైరుతి రుతుపవనాలు సెప్టెంబర్ 19న పశ్చిమ రాజస్థాన్లోని కొన్ని ప్రాంతాల నుంచి తరలిపోయాయి. ప్రస్తుతం రుతుపవనాల ఉపసంహరణ రేఖ రామగఢ్, మోహన్గఢ్, ఫలోడి, ఖాజువాలా మీదుగా కొనసాగుతోంది. ఉత్తర అండమాన్ సముద్రం, పరిసర ప్రాంతాల్లో కొనసాగుతున్న ఉపరితల ఆవర్తనం ప్రభావంతో సెప్టెంబర్ 19 సాయంత్రానికి అదే ప్రాంతంలో అల్పపీడనం ఏర్పడే అవకాశం ఉందని వాతావరణ శాఖ తెలిపింది. ఇది పశ్చిమ-వాయువ్య దిశగా కదులుతూ క్రమంగా బలపడే అవకాశం ఉంది. సెప్టెంబర్ 21న తూర్పు మధ్య బంగాళాఖాతంలో వాయుగుండంగా, 22న పశ్చిమ మధ్య బంగాళాఖాతంలో తీవ్ర వాయుగుండంగా మారే అవకాశం ఉందని IMD అంచనా వేసింది.
ఈ వ్యవస్థ సెప్టెంబర్ 23 ఉదయం నాటికి దక్షిణ ఒడిశా–ఉత్తర ఆంధ్రప్రదేశ్ తీరాలకు సమీపంలోని పశ్చిమ మధ్య, ఆనుకుని ఉన్న వాయువ్య బంగాళాఖాత ప్రాంతానికి చేరుకునే అవకాశం ఉంది. ఈ పరిణామాల నేపథ్యంలో తెలంగాణలో రానున్న మూడు రోజుల్లో వర్షాల పరిస్థితిని ప్రజలు, అధికారులు నిశితంగా గమనించాలని వాతావరణ శాఖ సూచిస్తోంది.
దేశవ్యాప్తంగా 20 రాష్ట్రాల్లో భారీ వర్షాలు..!
దేశంలోని దాదాపు 20 రాష్ట్రాల్లో భారీ వర్షాలు, ఈదురు గాలులు, ఉరుములతో కూడిన వాతావరణం ఉంటుందని భారత వాతావరణ శాఖ హెచ్చరించింది. ఒడిశా, ఛత్తీస్గఢ్లలో గంటకు 70-75 కి.మీ వేగంతో బలమైన గాలులు వీచే అవకాశం ఉంది. ఆంధ్రప్రదేశ్, ఢిల్లీ, మహారాష్ట్ర, యూపీ, బీహార్ సహా పలు రాష్ట్రాల్లో వర్షాలు కురిసే అవకాశం ఉండటంతో ఢిల్లీకి ఎల్లో అలర్ట్ జారీ చేశారు. వాతావరణ మార్పుల దృష్ట్యా రైతులు పంటలను భద్రపరుచుకోవాలని, ప్రజలు అప్రమత్తంగా ఉండాలని సూచించారు.
మరిన్ని తెలంగాణ వార్తల కోసం ఇక్కడ క్లిక్ చేయండి..
