Telangana: ఒక్కటైన లండన్ అమ్మాయి… నల్లగొండ అబ్బాయి.. ఆమె పోలీస్ డిపార్ట్‌మెంట్

ప్రేమ ఖండాంతరాలను దాటుతోంది. విదేశీ యువతీతో ఏర్పడిన పరిచయం ప్రేమగా మారి పెళ్లి చేసుకున్నాడు నల్లగొండ జిల్లా యువకుడు. చిట్యాల మండలం పెద్దకాపర్తి గ్రామానికి చెందిన కందిమళ్ల జోగారెడ్డి కుమారుడు మహేందర్ రెడ్డి, ప్రేమలత దంపతుల కుమారుడు రాజీవ్ రెడ్డి పదేళ్ల క్రితం హోటల్ మేనేజ్మెంట్ ఉన్నత విద్య కోసం న్యూజిలాండ్ దేశానికి వెళ్లాడు. ఉన్నత విద్యను పూర్తి చేసుకున్న రాజీవ్ రెడ్డి న్యూజిలాండ్‌లోనే ఓ హోటల్‌లో ఉద్యోగం చేస్తున్నాడు.

ఇదే సమయంలో లండన్ మాంచెస్టర్‌కు చెందిన లారెన్ ఫిషర్ న్యూజిలాండ్ ఉండే తన పెద్దమ్మ ఇంటి వద్ద ఉంటూ చదువుకుంటుంది. రాజీవ్ రెడ్డి ఉండే ఇంటి సమీపంలో లారెన్ ఫిషర్ వాళ్ల ‘పెద్దమ్మ నివాసం కూడా ఉండేది. ప్రపంచాన్ని ఉక్కిరి బిక్కిరి చేసిన మహమ్మారి కరోనా సమయంలో ఓ హోటల్ రాజీవ్ రెడ్డికి లారెన్ ఫిషర్‌కు పరిచయం ఏర్పడింది. ఒకే ప్రాంతానికి చెందినవారు కావడంతో అప్పుడప్పుడు వారు కలుసుకునేవారు. లారెన్ ఫిషర్ ఉన్నత విద్య తర్వాత అక్కడి పోలీస్ శాఖలో సైకాలజీ ఆఫీసర్‌గా పనిచేస్తోంది. వారి మధ్య ఏర్పడిన పరిచయం ప్రేమగా మారింది. నాలుగేళ్లుగా కొనసాగుతున్న వీరి ప్రేమను ఇరు కుటుంబాలు తొలుత అంగీకరించలేదు.

చివరికి రాజీవ్ రెడ్డి.. లారెన్ ఫిషర్‌లు తమ కుటుంబాలకు నచ్చజెప్పి పెండ్లికి అంగీకరించేలా చేశారు. వివాహానికి లారెన్ ఫిషర్ కుటుంబ సభ్యులు లండన్నుంచి హైదరాబాద్ వచ్చారు. నగరంలోని ఓ ఫంక్షన్ హల్ లో రాజీవ్ రెడ్డి లారెన్ ఫిషర్ల వివాహం హిందూ సంప్రదాయం ప్రకారం వేదమంత్రాల సాక్షిగా ఘనంగా నిర్వహించారు. వీరి వివాహానికి ఇరు కుటుంబాలు, బంధుమిత్రులు హాజరై నూతన వధూవరులను ఆశీర్వదించి శుభాకాంక్షలు తెలిపారు. ఇక్కడి పెళ్లి సంప్రదాయాలు తమకు ఎంతగానో నచ్చాయని ఫిషర్ తల్లిదండ్రులు కె. ఫిషర్, డేవిడ్ ఫిషర్ తెలిపారు. తమ కుమార్తెను సంప్రదాయాలకు అత్యంత గౌరవం, విలువనిచ్చే తెలుగింటికి పంపండం చెప్పలేని సంతోషాన్ని కలిగించిందని వారన్నారు.

మరిన్ని తెలంగాణ వార్తల కోసం ఇక్కడ క్లిక్ చేయండి..