Telangana: చేతికి దొరికిన లాకెట్‌ను మింగిన ఆరు నెలల చిన్నారి.. ఏమైందంటే..

సాధారణంగా చాలామంది చిన్నారులు చేతికి ఏది దొరికితే అది నోట్లో పెట్టు కుంటారు.. మింగుతుంటారు. అలా మింగిన వాటిని బయటకు తీసేందుకు సర్జరీలు కూడా చేయాల్సి ఉంటుంది. కొన్ని సందర్భాల్లో అది ప్రాణాంతకంగా కూడా మారుతుంది. నల్గొండ జిల్లాలో ఆరు నెలల చిన్నారి లాకెట్ ను మింగింది… అయితే చిన్నారికి ఎటువంటి సర్జరీ చేయకుండానే చాక చక్యంగా లాకెట్ ను బయటకు తీశారు. వివరాల్లోకి వెళ్తే..

నల్లగొండ జిల్లా నక్రేకల్ మండలం తాటికల్ గ్రామానికి చెందిన మొగిలి ఏమియమ్మ, భాస్కర్ దంపతులకు చార్విక అనే ఆరు నెలల పాప ఉంది. ఆ చిన్నారిని మంచంలో పడుకోబెట్టగా.. చేతికి దొరికిన లాకెట్ తో ఆడుకుంటుంది. తల్లి వంట గదిలోకి వెళ్ళి వచ్చేసరికి చార్విక గుక్క పెట్టి ఏడుస్తోంది. ఎందుకు ఏడుస్తుందని పరిశీలించిన తల్లికి.. చిన్నారి చేతిలో ఉండాల్సిన లాకెట్ కనిపించలేదు. లాకెట్ ను చిన్నారి మింగి ఉంటుందని అనుమానంతో హుటహుటన నల్లగొండలోని ఆర్కే హాస్పిటల్ కు తీసుకువచ్చారు. తమ బిడ్డకు ఎలా ఉంటుందొనని తల్లిదండ్రులు ఆందోళన చెందారు.

గ్యాస్ట్రాలజిస్ట్ డాక్టర్ కీర్తి రెడ్డి.. చిన్నారికి స్కానింగ్ చేసి కడుపులో లాకెట్ ఉన్నట్లు గుర్తించారు. అయితే చిన్నారి కడుపులోని లాకెట్ ను బయటకు ఎలా తీయాలనే దానిమీద తర్జనభజన పడ్డారు. సర్జరీ ద్వారా కడుపులోని లాకెట్ ను బయటకు తీయాలని భావించారు. సర్జరీకి చిన్నారి హెల్త్ సపోర్ట్ చేస్తుందో లేదోననే అనుమానం డాక్టర్ కు కలిగింది. డాక్టర్ కీర్తి రెడ్డి ఎలాంటి సర్జరీ లేకుండా చాకచక్యంగా ఎండోస్కోప్ ద్వారా చిన్నారి కడుపులో నుండి లాకెట్ ను బయటికి తీశారు. సర్జరీ లేకుండా ఆరు నెలల చిన్నారి కడుపు నుండి లాకెట్ ను ఎండోస్కోపీ ద్వారా తీయడం అరుదైనదిగా డాక్టర్ కీర్తి రెడ్డి చెబుతున్నారు. ప్రస్తుతం చిన్నారి ఆరోగ్యంగా ఉందని ఆమె చెబుతున్నారు. మొత్తానికి కడుపులో నుండి లాకెట్ ను బయటికి తీసి తమ బిడ్డను ప్రాణాపాయ నుంచి కాపాడారంటూ చిన్నారి తల్లిదండ్రులు డాక్టర్ కు ధన్యవాదాలు చెప్పారు.

ఇవి కూడా చదవండి

బాల రాముడు కొలువుదీరే వేళ.. యుపీ ముస్లిమ్స్ సంచలన నిర్ణయం..

సూసైడ్ నోట్ రాసి అదృశ్యమైన యువకుడు.. నదిలో గాలింపు

రామ మందిర థీమ్‌తో బనారసీ చీరకు భారీ డిమాండ్..

మాల్దీవులను భారత్ ఇప్పటి వరకూ ఎన్నిసార్లు అదుకుందో తెలుసా..

మరిన్ని తెలంగాణ వార్తల కోసం ఇక్కడ క్లిక్ చేయండి..