BRS: బీఆర్ఎస్ పార్టీకి భారీ షాక్.. సీనియర్ నాయకుడి రాజీనామా.. కారణం ఇదే..

బీఆర్ఎస్ పార్టీకి భారీ షాక్ తగిలింది. నల్గొండ బీఆర్ఎస్ సీనియర్ నాయకుడు, మలి విడత తెలంగాణ ఉద్యమకారుడు చకిలం అనిల్ కుమార్ బీఆర్ఎస్‌కు రాజీనామా చేశారు. రాజీనామా లేఖను ఫ్యాక్స్ ద్వారా అధిష్టానానికి పంపించారు అనిల్ కుమార్. పార్టీ ఆవిర్భావం నుంచి నమ్ముకుని ఉన్నందుకు కేసీఆర్ నట్టేట ముంచారని భావోద్వేగానికి గురయ్యారు అనిల్ కుమార్. అనుచరులతో చర్చించిన తర్వాత భవిష్యత్తు కార్యాచరణ ప్రకటిస్తానని అన్నారు. అవసరమైతే నల్గొండ నుంచి స్వతంత్ర అభ్యర్థిగా పోటీకి దిగడానికి సిద్ధంగా ఉన్నాని అన్నారు.

ఎమ్మెల్యే కోటాలో ఎమ్మెల్సీ స్థానాన్ని ఆశించారు అనిల్ కుమార్. ఎమ్మెల్సీ దక్కకపోవడంతో తీవ్ర మనస్థాపానికి గురై ఈ నిర్ణయం తీసుకున్నారు. పార్టీ ఆవిర్భావం నుండి జిల్లాలో, నల్గొండ అసెంబ్లీ నియోజకవర్గం పరిధిలో తెలంగాణ రాష్ట్ర సాధన ఉద్యమంలో, పార్టీ విస్తరణలో చకిలం అనిల్ కుమార్ కీలకంగా వ్యవహరించారు. గులాబీ పార్టీలో 22 ఏళ్లుగా పనిచేసిన అనిల్ కుమార్.. ప్రతి ఎన్నికలలో కూడా నల్గొండ అసెంబ్లీ టికెట్‌ ఆశించడం.. ఆ తర్వాత నిరాశ చెందడం కామన్‌గా మారింది.

గత 2018 అసెంబ్లీ ఎన్నికల్లో టీడీపీ నుండి వచ్చిన కంచర్ల భూపాల్ రెడ్డిని గెలిపిస్తే ఎమ్మెల్సీ ఇస్తానని స్వయంగా సీఎం కేసీఆర్ ప్రగతి భవన్‌ కి పిలిపించుకొని హామీ ఇచ్చారని చాలా సార్లు చకిలం అనిల్ కుమార్ మీడియాతో చెప్పారు. ఆ తర్వాత ఆయన ఆ ఎన్నికల్లో కంచర్ల గెలుపు కోసం పనిచేశారు. అయితే, తనకు ఇక ఎమ్మెల్సీ పదవి దక్కలేదని, సీఎం కేసీఆర్ తనకు ఇచ్చిన హామీ నిలబెట్టుకోకపోయారని తీవ్ర నిరాశకు గురై ఈ నిర్ణయం తీసుకున్నట్లు అనిల్ కుమార్ ప్రకటించారు.

ఇటీవల తెలంగాణ ఉద్యమకారుల ఆత్మీయ సమ్మేళనం పేరుతో సదస్సులు, బతన తండ్రి దివంగత చకిలం శ్రీనివాసరావు పంతులు శత జయంతి సదస్సుల ద్వారా ఎమ్మెల్సీ పదవి సాధన దిశగా అనిల్ కుమార్ అధిష్టానంపై ఒత్తిడి పెంచిన సంగతి తెలిసిందే. పార్టీ అధినేత సీఎం కేసీఆర్ మాత్రం మరోసారి కూడా ఎమ్మెల్సీ పదవుల ఎంపికలో అనిల్ కుమార్ పేరును పరిశీలనలోకి తీసుకోకపోవడంతో తనకు ఇక బీఆర్ఎస్ పార్టీలో భవిష్యత్తు లేదని భావించినట్లుగా తెలుస్తోంది.

గులాబీ పార్టీకి రాజీనామా చేసిన చకిలం అనిల్ కుమార్ ఏ పార్టీలో చేరనున్నారన్నది సస్పెన్స్‌గా ఉంది. నియోజకవర్గ రాజకీయాల్లో పట్టున్న చకిలం కుటంబం కాంగ్రెస్ వైపు మొగ్గు చూపుతుందని అనుకుంటున్నారు.

మరిన్ని తెలంగాణ వార్తల కోసం