Khammam: స్నేహితుడి ప్రాణం తీసిన రహస్యం.. వివాహితతో కలిసి మైనర్ బాలుడి దారుణ కుట్ర!

స్నేహితుడిగా నమ్మాడు.. తనతో కలిసి చదువుకునే వాడని భావించాడు.. కానీ అదే స్నేహం చివరకు అతడి ప్రాణాల మీదకు తెచ్చింది. తన వ్యక్తిగత రహస్యం బయటపడుతుందన్న భయంతో ఓ మైనర్ బాలుడు అత్యంత దారుణానికి ఒడిగట్టాడు. తన స్నేహితుడినే హత్య చేసేందుకు పథకం రచించాడు. ఈ కుట్రలో ఓ వివాహితను కూడా భాగస్వామిని చేసుకున్నాడు. ఖమ్మం జిల్లాలో వెలుగుచూసిన ఈ ఘటన స్థానికంగా తీవ్ర కలకలం రేపుతోంది.

పోలీసుల కథనం ప్రకారం.. ఖమ్మం జిల్లా కల్లూరు మండలం చిన్నకోరుకొండి గ్రామానికి చెందిన అపర్ణ అనే మహిళ భర్తతో విడిపోయి తన అమ్మమ్మ ఇంట్లో ఉంటోంది. ఇదే గ్రామానికి చెందిన 15 ఏళ్ల బాలుడితో ఆమెకు పరిచయం ఏర్పడింది. ఆ పరిచయం కాస్తా సన్నిహిత సంబంధానికి దారితీసింది. అయితే, వీరిద్దరూ సన్నిహితంగా ఉన్న సమయంలో అదే బాలుడి స్నేహితుడైన పదో తరగతి విద్యార్థి రవి గమనించాడు.

ఈ విషయం తన కుటుంబ సభ్యులకు చెబుతానని రవి హెచ్చరించడంతో బాలుడు, అపర్ణ ఆందోళనకు గురయ్యారు. తమ వ్యవహారం బయటపడితే ఇబ్బందులు ఎదురవుతాయని భావించారు. చివరకు రవిని అడ్డు తొలగించుకోవాలని నిర్ణయించుకున్నట్లు పోలీసుల దర్యాప్తులో వెల్లడైంది.

ఈ క్రమంలో అక్టోబర్ 21న పక్కా పథకం ప్రకారం కూల్‌డ్రింక్‌లో పురుగుల మందు కలిపి రవికి తాగించారు. అది తాగిన కొద్దిసేపటికే తీవ్ర అస్వస్థతకు గురైన బాలుడిని కుటుంబ సభ్యులు ఆసుపత్రికి తరలించారు. పరిస్థితి విషమించడంతో ఖమ్మం ప్రభుత్వ ఆసుపత్రిలో చికిత్స అందించారు. అయితే మృత్యువుతో పోరాడిన రవి.. చివరకు నవంబర్ 8న కన్నుమూశాడు.

తమ కుమారుడి మరణంపై అనుమానం వ్యక్తం చేసిన కుటుంబ సభ్యులు పోలీసులకు ఫిర్యాదు చేశారు. కేసు నమోదు చేసి దర్యాప్తు చేపట్టిన పోలీసులు.. ఈ ఘటన వెనుక స్నేహితుడే ఉన్నాడని గుర్తించారు. విచారణలో మైనర్ బాలుడితో పాటు అపర్ణ పాత్ర కూడా వెలుగులోకి వచ్చింది. దీంతో ఇద్దరినీ అదుపులోకి తీసుకున్నారు. మైనర్ బాలుడిని వరంగల్‌లోని బాలల జైలుకు తరలించగా, అపర్ణను సత్తుపల్లి సబ్‌జైలుకు రిమాండ్ చేశారు.

ఒక రహస్యం బయటపడుతుందనే భయంతో.. తనను నమ్మిన స్నేహితుడినే బలితీసుకున్న ఈ ఘటన ఖమ్మం జిల్లాలో తీవ్ర సంచలనంగా మారింది. స్నేహం పేరుతో నమ్మకం పెంచుకుని.. చివరకు అదే స్నేహితుడి ప్రాణాలు తీసిన ఈ దారుణం స్థానికులను కలచివేస్తోంది.