Telangana: ఎయిర్ గన్ కొన్న పశువుల కాపరి.. ఆ నాయకుడిని చంపేందుకేనంటూ పుకార్లు.. సీన్ కట్ చేస్తే ఊహించని షాక్

చెన్నూరు గ్రామానికి చెందిన వల్లభనేని హరీశ్ అనే గొర్రెల కాపరికి 70 వరకు గొర్రెలు ఉన్నాయి. అయితే గ్రామంలోని కుక్కలు నిత్యం తన గొర్రెల వెంటబడి కరవడానికి ప్రయత్నించేవి.

Khammam Air Gun

Shaik Madar Saheb |

Updated on: Aug 27, 2022 | 1:13 PM

Khammam Air Gun: ఖమ్మం జిల్లాలోని కల్లూరు మండలం చెన్నూరు గ్రామంలో ఎయిర్ గన్ కలకలం రేపింది. ఓ గొర్రెల కాపరి ఎయిర్ గన్ పట్టుకుని గ్రామంలో తిరుగుతున్నాడని సమాచారం అందడంతో పోలీసులు అతడిని అదుపులోకి తీసుకుని విచారించగా అది డమ్మీ గన్ అని తేలింది. చెన్నూరు గ్రామానికి చెందిన వల్లభనేని హరీశ్ అనే గొర్రెల కాపరికి 70 వరకు గొర్రెలు ఉన్నాయి. అయితే గ్రామంలోని కుక్కలు నిత్యం తన గొర్రెల వెంటబడి కరవడానికి ప్రయత్నించేవి. దీంతో ఆ కుక్కల నుంచి గొర్రెలను కాపాడుకోవడానికి హరీశ్ చాలా శ్రమ పడాల్సి వచ్చేది. దీంతో కుక్కల బారినుంచి గొర్రెలను కాపాడుకోవడానికి ఎయిర్ గన్ కొనాలని నిశ్చయించుకున్నాడు.

అందుకోసం ఖమ్మం పట్టణంలోని అబ్బాస్ టాయ్స్ సెంటర్‌లో కోబ్రా 65 మోడల్ ఎయిర్ గన్ కొనుగోలు చేశాడు. ఈ క్రమంలో తాను కొనుకున్న ఎయిర్ గన్‌లో ఒక చిన్న గుండ్రటి రాయిను బుల్లెట్ లా పెట్టి కుక్కకు దగ్గరగా పేల్చాడు. దీంతో ఓ కుక్క చనిపోయింది. ఇక అప్పటి నుంచి గన్ను భుజాన తగిలించుకొని హరీశ్ గ్రామంలో తిరిగేవాడు. దీంతో అతడి వద్ద ఉన్నది నిజం తుపాకీ అనుకొని చాలా మంది భయంతో అతడి దగ్గరికి వచ్చేవారు కాదు. అయితే, ఈ ఘటన అనంతరం హరీశ్ కథ అడ్డం తిరిగింది. తాను గొర్రెలు కాసుకునే ఒక సాధారణ వ్యక్తిని , ఏదో కుక్కలను, కోతులను తరిమెందుకు ఎయిర్‌గన్‌ కొన్నానని బాధితుడు వాపోతున్నాడు.

ఇదిలాఉంటే.. గ్రామంలోని టీఆర్ఎస్ పార్టీకి చెందిన ఓ ముఖ్య నాయకుడిని హత్య చేసేందుకే హరీశ్ తుపాకి కొన్నట్లు సోషల్ మీడియాలో ప్రచారం జరిగింది. దీంతో రంగంలోకి దిగిన పోలీసులు పూర్తి విచారణ చేపట్టగా అసలు విషయం వెలుగులోకి వచ్చింది. హత్యకు కుట్ర అంటూ వైరల్‌గా మారిన పోస్టులు ఫేక్ అని పోలీసులు తేల్చారు. గొర్రెలను కాపాడుకునేందుకే గొర్రెల కాపరి ఎయిర్ గన్ కొనుగోలు చేసినట్లు పోలీస్‌లు ప్రాథమికంగా నిర్ధారించారు.

ఇవి కూడా చదవండి