Snakes: పాములు కనిపిస్తే చాలు కోపంతో ఊగిపోతాయ్.. కొరికి కరకర నమిలి తినేస్తాయ్.. ఇవి ఏంటో తెలుసా.?

భూమిపై పాముల సంఖ్య విపరీతంగా పెరిగితే.. అది మానవ మనుగడకు తీవ్రమైన సవాలుగా మారుతుంది. అయితే ప్రకృతిలో కొన్ని జీవులు పాములను వేటాడుతూ, పర్యావరణ సమతుల్యతను నిశ్శబ్దంగా కాపాడుతున్నాయి. పాములకు అత్యంత ప్రమాదకరమైన శత్రువులుగా మారతాయి. మరి అవి ఏంటి.? వాటి లక్షణాలు ఏంటో ఇప్పుడు తెలుసుకుందామా..

రోడ్ రన్నర్: మామూలుగా కనిపించే ఈ పక్షి భయంకరమైన మాంసాహారి. ఇది కీటకాలు, బల్లులు, ఎలుకలు, తేళ్లు, సాలీడులను తింటుంది. అయితే, పాములను మాత్రం అత్యంత దారుణంగా వేటాడుతుంది. ఎంత విషపూరితమైన పామైనా సరే, గంటల తరబడి పోరాడి, దాని తల భాగాన్ని పట్టుకొని నేలకేసి కొట్టి చంపుతుంది. నార్త్ అమెరికా ఎడారులలో నివసించే ఈ పక్షి రాటిల్ స్నేక్స్ వంటి విషపూరిత పాములను కూడా తెలివిగా వేటాడుతుంది. గంటకు 40 కిలోమీటర్ల వేగంతో పరిగెత్తగల దీని సామర్థ్యం, తెలివైన వేట నైపుణ్యాలు దీనికి ఈ పేరును తెచ్చిపెట్టాయి.

హనీ బాడ్జర్: ప్రశాంతంగా కనిపించే ఈ క్షీరదం వేటలో అగ్రస్థానంలో ఉంటుంది. దీనికి భయం అనేదే ఉండదు. కోబ్రా వంటి విషపూరిత పాములతో కూడా పోరాడుతుంది. దీని మందపాటి, వదులైన చర్మం పాము కాటు విషం శరీరంలోకి ప్రవేశించకుండా నిరోధిస్తుంది. ఒకవేళ విషం ప్రవేశించినా, దానిని తట్టుకునే శక్తి దీనికి ఉంది. ఆఫ్రికా, మిడిల్ ఈస్ట్, ఇండియాలో కనిపించే ఈ జీవి సింహాలు, చిరుతపులులతో కూడా పోరాడటానికి వెనుకాడదు. తేనె అంటే దీనికి చాలా ఇష్టం, తేనెటీగల కాట్లకు కూడా భయపడదు.

కింగ్ కోబ్రా: 18 అడుగుల పొడవు వరకు పెరిగే ఈ అత్యంత విషపూరిత పాము రస్సెల్స్ వైపర్స్, ఇతర కోబ్రాలు, పైథాన్ పిల్లలను తింటుంది. తన న్యూరోటాక్సిన్ విషంతో పాము నరాల వ్యవస్థను దెబ్బతీసి, కొన్ని నిమిషాల్లో చంపేస్తుంది. ఇతర పాముల విషానికి ఇది నిరోధక శక్తిని కలిగి ఉంటుంది. దీని విషం 20 మంది మనుషులను లేదా ఒక పెద్ద ఏనుగును చంపగలదు. ఇండియా, శ్రీలంక, ఆసియా, ఇండోనేషియా, థాయ్‌లాండ్ దేశాల్లో ఎక్కువగా కనిపిస్తుంది. ఇది విషపూరిత పాముల సంఖ్యను నియంత్రించి పర్యావరణ సమతుల్యతకు సహాయపడుతుంది. ఇండియాలో ఈ పామును చంపడం చట్టవిరుద్ధం.

మోనిటర్ లిజర్డ్స్, కొమొడో డ్రాగన్: ఈ రెండూ పాములను దారుణంగా చంపి తింటాయి. వాటి మందపాటి, బలమైన చర్మం పాము విషం శరీరంలోకి వెళ్లకుండా రక్షిస్తుంది. పాము విషపూరితమైనదైనా, ఈ బల్లులు వాటిని వేటాడగలవు. మెడ లేదా తల భాగంలో ఎక్కువసార్లు కాటు వేస్తే ప్రమాదం ఉండవచ్చు, కానీ ఇది చాలా అరుదు.

సివెట్ క్యాట్: ఈ అడవి పిల్లి పాము విషానికి పాక్షిక నిరోధక శక్తిని కలిగి ఉంటుంది. విషం నెమ్మదిగా పని చేయడం వల్ల, పిల్లి పామును చంపడానికి సమయం దొరుకుతుంది. ఇది రాత్రిపూట చురుకుగా వేటాడుతుంది. కీటకాలు, ఎలుకలు, పక్షులు, పండ్లను కూడా తింటుంది.

సర్వల్ క్యాట్: ఈ అడవి పిల్లికి అద్భుతమైన వేట నైపుణ్యం ఉంది. పాము కనపడితే 12 అడుగుల ఎత్తు వరకు ఎగిరి పట్టుకొని చంపుతుంది. ఇది చాలా అప్రమత్తంగా వేటాడుతుంది, పాము కాటుకు గురికాకుండా సెకన్లలో తప్పించుకుంటుంది. ఆఫ్రికాలో కనిపిస్తుంది. కొన్నిసార్లు పెంపుడు జంతువుగా కూడా పెంచుతారు.

ఈ జీవులన్నీ ప్రకృతిలో పాముల జనాభాను నియంత్రించడంలో, తద్వారా పర్యావరణ సమతుల్యతను కాపాడటంలో కీలక పాత్ర పోషిస్తాయి. వాటి ప్రత్యేకమైన రక్షణ వ్యవస్థలు, వేట నైపుణ్యాలు వాటిని పాములకు అత్యంత సమర్థవంతమైన శత్రువులుగా నిలుపుతాయి.