నథింగ్ నుంచి అదరగొట్టే ఫీచర్లతో స్మార్ట్​ గ్లాసెస్​.. కెమెరాతో సహా మరెన్నో స్పెషాలిటీస్

ఫోన్‌ చేతిలో పట్టుకోకుండానే సమాచారాన్ని తెలుసుకోవడం, ఫోన్ కాల్స్‌ మాట్లాడటం, కళ్ల ముందు కనిపించే దృశ్యాల గురించి AI సాయంతో వివరాలు పొందడం సాధ్యమైతే ఎలా ఉంటుంది? Nothing స్మార్ట్ గ్లాసెస్‌ ఈ తరహా అనుభవాన్ని అందించే దిశగా రూపొందుతున్నట్లు తెలుస్తోంది. అయితే వీటి ఫీచర్లు, విడుదల తేదీపై అధికారిక స్పష్టత రావాల్సి ఉంది.

రెండు మోడళ్లు..

Nothing స్మార్ట్ గ్లాసెస్‌లో మొదటి మోడల్‌ ప్రధానంగా ఆడియో ఫీచర్లపై దృష్టి పెట్టనున్నట్లు సమాచారం. ఇవి సాధారణ బ్లూటూత్ హెడ్‌ఫోన్ల మాదిరిగా పనిచేస్తూ పాటలు వినడానికి, ఆడియో బుక్స్‌ ఆస్వాదించడానికి, ఫోన్ కాల్స్‌ మాట్లాడటానికి ఉపయోగపడతాయి. స్మార్ట్‌ఫోన్‌లోని వాయిస్ అసిస్టెంట్‌ను యాక్సెస్‌ చేసుకునే సదుపాయం కూడా ఉండొచ్చు. ప్రయాణాల్లో, నడుస్తున్నప్పుడు ఫోన్‌ను పదేపదే బయటకు తీయకుండా ఆడియో సేవలను ఉపయోగించుకోవడానికి ఇవి అనువుగా ఉండనున్నాయి.

రెండో మోడల్‌లో ఆడియో ఫీచర్లతో పాటు కెమెరా, AI సాంకేతికత ప్రధాన ఆకర్షణగా నిలవనున్నట్లు అంచనాలు ఉన్నాయి. ఇందులో ChatGPT అనుసంధానం అందుబాటులోకి వస్తే.. వినియోగదారులు తమకు ఎదురుగా కనిపించే వస్తువులు, పరిసరాల గురించి ప్రశ్నలు అడిగి సమాధానాలు పొందే అవకాశం ఉంటుంది. అలాగే భాషలను అనువదించడం, అవసరమైన సమాచారాన్ని తెలుసుకోవడం వంటి పనులకూ ఉపయోగపడవచ్చు. అయితే ఈ ఫీచర్ల లభ్యత, పనితీరు అధికారిక ప్రకటన తర్వాతే స్పష్టమవుతాయి.

ఫోటోక్రోమిక్ లెన్సులు..

ఈ రెండు మోడళ్లలోనూ ఫోటోక్రోమిక్ లెన్సులు ఉండే అవకాశం ఉందని సమాచారం. ఇంట్లో లేదా తక్కువ కాంతి ఉన్న ప్రదేశాల్లో ఇవి పారదర్శకంగా కనిపిస్తాయి. బయట సూర్యరశ్మి పడినప్పుడు లెన్సులు ముదురు రంగులోకి మారి కళ్లకు తగిలే కాంతిని తగ్గించడంలో సహాయపడతాయి. అయితే ఈ ఫీచర్‌ రెండు మోడళ్లలోనూ ఉంటుందా అనేది ఇంకా నిర్ధారణ కాలేదు.

ప్రస్తుతం స్మార్ట్ గ్లాసెస్‌ మార్కెట్లో Meta Ray-Ban సిరీస్‌ ప్రముఖంగా నిలుస్తోంది. ఈ నేపథ్యంలో Nothing తన ప్రత్యేక డిజైన్‌, AI అనుభవంతో ఈ విభాగంలో పోటీకి దిగే అవకాశం ఉంది. ధర, బ్యాటరీ సామర్థ్యం, కెమెరా వివరాలు, లాంచ్ తేదీ వంటి అంశాలపై ప్రస్తుతానికి అధికారిక సమాచారం లేదు. కంపెనీ నుంచి ప్రకటన వెలువడిన తర్వాతే ఈ గ్లాసెస్‌ పూర్తి సామర్థ్యాలపై స్పష్టత రానుంది.