మీ డేటా భద్రంగా ఉండాలంటే.. ఫోన్‌లో ఈ సెట్టింగ్‌లు కచ్చితంగా మార్చుకోండి!

కొత్త స్మార్ట్‌ఫోన్ కొనుగోలు చేసిన వెంటనే ఉపయోగించడం చాలా మందికి అలవాటు. అయితే ముఖ్యమైన భద్రతా సెట్టింగ్‌లను విస్మరించడం వల్ల వ్యక్తిగత డేటా ప్రమాదంలో పడే అవకాశం ఉందని ఇండియన్‌ సైబర్‌ క్రైమ్‌ కోఆర్టినేషన్‌ సెంటర్‌ హెచ్చరించింది. ఫోన్‌లోని బ్యాంకింగ్ వివరాలు, OTPలు, వ్యక్తిగత సమాచారం రక్షణకు కొన్ని ప్రాథమిక చర్యలు అత్యంత అవసరమని నిపుణులు సూచిస్తున్నారు. మొదటిగా డివైస్ ట్రాకింగ్ ఫీచర్‌ను తప్పనిసరిగా ఆన్ చేయాలి. ఆండ్రాయిడ్ వినియోగదారులు ఫైండ్‌ మై డివైజ్‌ను, ఐఫోన్ వినియోగదారులు ఫైండ్‌ మై ఐఫోన్‌ను యాక్టివేట్ చేసుకోవాలి. దీని ద్వారా ఫోన్ పోయినప్పుడు దాని లొకేషన్ తెలుసుకోవడం, రిమోట్‌గా లాక్ చేయడం లేదా డేటాను తొలగించడం సాధ్యమవుతుంది.

తదుపరి రిమోట్ లాక్, ఆఫ్‌లైన్ ట్రాకింగ్ వంటి ఫీచర్లను కూడా ఎనేబుల్ చేయాలి. ఫోన్ స్విచ్ ఆఫ్ అయినా లేదా నెట్‌వర్క్ లేకపోయినా, ఈ ఫీచర్లు దాన్ని ట్రాక్ చేయడంలో సహాయపడతాయి. దొంగలు కనెక్షన్‌ను నిలిపివేసినా, భద్రతను కొనసాగించేందుకు ఇవి ఉపయోగపడతాయి. లాక్ స్క్రీన్‌పై కనిపించే నోటిఫికేషన్‌లను కూడా నియంత్రించడం ముఖ్యం. బ్యాంకింగ్ అలర్ట్‌లు, OTPలు వంటి సున్నితమైన సమాచారాన్ని ఇతరులు చూడకుండా ఉండేందుకు నోటిఫికేషన్ ప్రివ్యూలను ఆఫ్ చేయడం మంచిది.

కొన్ని స్మార్ట్‌ఫోన్ బ్రాండ్లు పరికరాన్ని స్విచ్ ఆఫ్ చేయడానికి కూడా పాస్‌వర్డ్ అవసరమయ్యే ఫీచర్‌ను అందిస్తున్నాయి. దీన్ని యాక్టివేట్ చేస్తే, ఫోన్ దొంగిలించిన వ్యక్తి వెంటనే స్విచ్ ఆఫ్ చేయకుండా అడ్డుకోవచ్చు. అదేవిధంగా సిమ్ కార్డుకు PIN లాక్ పెట్టడం ద్వారా సిమ్ మార్పిడి మోసాలను నివారించవచ్చు. ఇది ఒక చిన్న చర్య అయినప్పటికీ, భద్రతకు కీలకంగా మారుతుంది. మొత్తంగా యాప్‌లు ఇన్‌స్టాల్ చేయడం లేదా డేటా ట్రాన్స్‌ఫర్ చేసే ముందు ఈ భద్రతా సెట్టింగ్‌లను అమలు చేయడం అత్యంత అవసరం. కొన్ని నిమిషాల జాగ్రత్తలు తీసుకోవడం ద్వారా, భవిష్యత్తులో జరిగే డేటా దొంగతనాలు, ఆర్థిక మోసాలను సమర్థంగా నివారించవచ్చు.

మరిన్ని టెక్‌ వార్తల కోసం ఇక్కడ క్లిక్‌ చేయండి