ఈ కొత్త స్పీకర్ ఉంటే పార్టీలో మీరే సింగర్! మ్యూజిక్ మాత్రమే ప్లే అవుతుందా?
పార్టీ అంటేనే మ్యూజిక్, డ్యాన్స్‌, ఫుల్ ఎంటర్టైన్మెంట్! ఈ అనుభవాన్ని మరింత ప్రత్యేకంగా మార్చేందుకు ప్రముఖ ఆడియో బ్రాండ్ JBL భారత మార్కెట్లోకి కొత్త PartyBox స్పీకర్లను తీసుకొచ్చింది. శక్తివంతమైన సౌండ్, ఆకర్షణీయమైన లైటింగ్‌, గంటల తరబడి బ్యాటరీ బ్యాకప్‌తో పాటు AI ఆధారిత కరోకే ఫీచర్లు ఈ కొత్త లైనప్‌లో ప్రత్యేక ఆకర్షణగా నిలుస్తున్నాయి.
Updated on: Oct 10, 2026 | 8:49 PM
ఇష్టమైన పాటలకు మీరే స్వయంగా గొంతు కలిపి పాడుకోవాలనుకుంటున్నారా? అయితే JBL కొత్త PartyBox స్పీకర్లు మీకు ఆసక్తికరమైన ఎంపిక కావచ్చు. AI కరోకే ఫీచర్లు, EasySing మైక్రోఫోన్లు, పవర్‌ఫుల్ ఆడియో అవుట్‌పుట్‌తో రూపొందించిన ఈ స్పీకర్లను ఇంటి పార్టీల నుంచి అవుట్‌డోర్ ఈవెంట్ల వరకు ఉపయోగించుకోవచ్చు. వీటి ధరలు, ప్రత్యేకతలు ఇప్పుడు తెలుసుకుందాం.
ఆరు స్పీకర్ మోడళ్లు..
JBL కొత్త PartyBox లైనప్‌లో విభిన్న అవసరాలకు అనుగుణంగా ఆరు స్పీకర్ మోడళ్లను అందించింది. వీటిలో అత్యంత ప్రీమియం మోడల్ PartyBox 720 ధర రూ.99,999గా ఉంది. PartyBox 330 ధర రూ.64,999 కాగా, PartyBox 130 ధర రూ.46,999గా పేర్కొన్నారు. పోర్టబుల్ స్పీకర్ల విభాగంలో On-The-Go 2 Plus ధర రూ.44,999గా ఉంది. On-The-Go 2, Encore 2 Plus మోడళ్లు ఒక్కొక్కటి రూ.39,999 ధరకు అందుబాటులో ఉన్నట్లు సమాచారం.
సౌండ్ పరంగా PartyBox 720 ఈ లైనప్‌లో ప్రత్యేకంగా నిలుస్తుంది. ఇది 800 వాట్ల ఆడియో అవుట్‌పుట్‌ను అందిస్తుంది. ఇందులో రెండు 9 అంగుళాల వూఫర్లు, 30 మిల్లీమీటర్ల ట్వీటర్లు ఉన్నాయి. స్పీకర్‌ను సులభంగా తరలించేందుకు చక్రాలు, హ్యాండిల్‌ను కూడా అందించారు. PartyBox 330 మోడల్ 280 వాట్ల అవుట్‌పుట్‌తో 18 గంటల వరకు, PartyBox 130 మోడల్ 200 వాట్ల అవుట్‌పుట్‌తో 15 గంటల వరకు ప్లేబ్యాక్ అందిస్తాయని కంపెనీ వివరాల ప్రకారం తెలుస్తోంది.
On-The-Go 2 సిరీస్‌, Encore 2 Plus మోడళ్లు 100 వాట్ల ఆడియో అవుట్‌పుట్‌, 15 గంటల వరకు బ్యాటరీ లైఫ్‌తో వస్తున్నట్లు సమాచారం. పాటలకు అనుగుణంగా మారే లైటింగ్‌, మైక్రోఫోన్‌, గిటార్ కనెక్షన్‌ సదుపాయాలు వీటిలో ఉన్నాయి. కొన్ని మోడళ్లలో మార్చుకోగలిగే బ్యాటరీలు, ఫాస్ట్ ఛార్జింగ్‌ సపోర్ట్‌ కూడా ప్రత్యేకతలుగా నిలుస్తాయి.
మైక్రోఫోన్ల ప్రత్యేకత ఇదే!
ఈ కొత్త JBL PartyBox లైనప్‌లో ప్రధాన ఆకర్షణ AI ఆధారిత కరోకే ఫీచర్లు. వీటితో పాటు పరిచయం చేసిన EasySing మైక్రోఫోన్లు పాటలు పాడటాన్ని మరింత సులభతరం చేయనున్నాయి. పాటలోని ఒరిజినల్ వాయిస్‌ను తగ్గించి లేదా తొలగించి, బ్యాక్‌గ్రౌండ్ మ్యూజిక్‌తో పాడుకునే అవకాశం ఈ టెక్నాలజీ ద్వారా లభిస్తుంది. అయితే వాయిస్ తొలగింపు నాణ్యత పాటను బట్టి మారవచ్చు.
మైక్రోఫోన్లలో వాయిస్ బూస్ట్‌, ఎకో కంట్రోల్‌, బ్యాక్‌గ్రౌండ్ నాయిస్ తగ్గించే ఫీచర్లు ఉన్నాయి. వీటికి 10 గంటల వరకు బ్యాటరీ లైఫ్ ఉంటుందని సమాచారం. మైక్‌, గిటార్ కనెక్ట్ చేసుకునే సదుపాయాలు ఉన్న మోడళ్లు లైవ్ పెర్ఫార్మెన్స్‌లకు కూడా ఉపయోగపడతాయి. PartyBox 330, PartyBox 130 వంటి ఎంపిక చేసిన మోడళ్లలో IPX4 వాటర్ రెసిస్టెన్స్‌ సపోర్ట్‌ ఉండటం వల్ల నీటి చినుకుల నుంచి కొంత రక్షణ లభిస్తుంది.
