Hydrogen Train Engine: ప్రపంచంలోనే అత్యంత శక్తివంతమైన హైడ్రోజన్ ఇంజిన్..!
Hydrogen Train Engine: ఇండియన్‌ రైల్వే ప్రయాణికుల కోసం ఎప్పటికప్పుడు ప్రత్యేక చర్యలు తీసుకుంటూనే ఉంటుంది. ప్రయాణికులు ఇబ్బందులు పడకుండా ఎన్నో సదుపాయాలను ఏర్పాటు చేస్తుంటుంది. ఇప్పుడు హైడ్రోజన్‌తో నడిచే ఇంజిన్‌లను అందుబాటులోకి తీసుకువస్తోంది. ఇప్పటికే అభివృద్ధి చెందిన ఈ ఇంజన్‌లో త్వరలో పట్టాలపైకి రానుంది..
Updated on: Jan 14, 2025 | 4:54 PM
భారతీయ రైల్వే దేశీయంగా హైడ్రోజన్‌తో నడిచే ఇంజన్‌ను అభివృద్ధి చేసింది. హైడ్రోజన్‌తో నడిచే రైల్వే ఇంజిన్‌లను తయారు చేయగల శక్తి కలిగిన నాల్గవ దేశం భారతదేశం. అయితే ప్రపంచంలోనే అత్యంత శక్తివంతమైన హైడ్రోజన్ రైల్వే ఇంజిన్‌ను భారతీయ రైల్వే అభివృద్ధి చేసింది. సాధారణంగా హైడ్రోజన్‌తో నడిచే రైలు ఇంజిన్ సామర్థ్యం 500 నుండి 600 హార్స్‌పవర్‌లు. భారతీయ రైల్వే 1,200 హార్స్‌పవర్ ఇంజిన్‌ను అభివృద్ధి చేసింది. ఇది కూడా దేశీయంగానే తయారు చేయడం విశేషం.
1,200 హార్స్‌పవర్ ఇంజన్‌తో నడిచే హైడ్రోజన్ రైలు త్వరలో హర్యానాలోని జింద్ – సోనిపట్ రూట్‌లో ట్రయల్స్‌లో నడుస్తుందని భావిస్తున్నారు. కేంద్ర రైల్వే మంత్రి అశ్విని వైష్ణవ్ ఇటీవల ఈ విషయాన్ని తెలియజేశారు. దాని ప్రకారం, ఇంజిన్ తయారీ పూర్తయింది. సిస్టమ్ ఇంటిగ్రేషన్ పనులు పురోగతిలో ఉన్నాయి.
సాంకేతిక అభివృద్ధి దేశానికి విశ్వాసాన్ని ఇస్తుంది. ముఖ్యంగా దేశీయంగా అభివృద్ధి చెందిన టెక్నాలజీ వల్ల చాలా ప్రయోజనాలు ఉన్నాయి. హైడ్రోజన్‌తో నడిచే ఇంజన్‌ను ఈ స్థాయిలో అభివృద్ధి చేయగలిగితే, ఈ సాంకేతికతను ట్రక్కులు, టగ్‌బోట్‌లు మొదలైన వాటికి వర్తింపజేయవచ్చని మంత్రి అన్నారు.
భారతీయ రైల్వే చౌక ప్రయాణానికి ప్రసిద్ధి. వందే భారత్ రైళ్లు కాస్త ఖరీదైనవిగా అనిపిస్తాయి. ఇప్పుడు అమృత్ భారత్ ఎక్స్‌ప్రెస్ రైళ్లను అప్‌గ్రేడ్ చేస్తున్నారు. వారు చౌక ధరలో గొప్ప ప్రయాణ అనుభవాన్ని అందిస్తారు. అంతకుముందు రైల్వే మంత్రి డా. వైష్ణవ్ చెన్నైలోని ఐసిఎఫ్ ఫ్యాక్టరీని సందర్శించి అమృత్ భారత్ 2.0 రైలు కోచ్‌ల నిర్మాణ పనులను పరిశీలించారు.
అమృత్ భారత్ కొత్త వెర్షన్ కోచ్‌లలో సౌకర్యవంతమైన సీట్లు, మొబైల్ ఛార్జింగ్ స్టేషన్లు, ఎల్‌ఈడీ లైటింగ్, సీసీటీవీ కెమెరాలు, పెద్ద లగేజీ ర్యాక్‌లు తదితర సౌకర్యాలు సుదూర ప్రయాణాలకు అందుబాటులో ఉన్నాయి.
మరిన్ని బిజినెస్ వార్తల కోసం ఇక్కడ క్లిక్ చేయండి
