IPL 2026 PBKS vs GT : పంజాబ్ కొంపముంచిన ఐదు తప్పులు.. గుజరాత్ చేతిలో ఓటమికి కారణం వీళ్లే

IPL 2026 PBKS vs GT : ఐపీఎల్ 2026లో టేబుల్ టాపర్‌గా దూసుకుపోతున్న పంజాబ్ కింగ్స్ జోరుకు గుజరాత్ టైటాన్స్ బ్రేక్ వేసింది. ఆదివారం అహ్మదాబాద్‌లోని నరేంద్ర మోదీ స్టేడియంలో జరిగిన ఉత్కంఠ పోరులో పంజాబ్ 4 వికెట్ల తేడాతో ఓటమి పాలైంది. వరుస విజయాలతో ఊపుమీదున్న పంజాబ్ జట్టుకు ఇది వరుసగా రెండో ఓటమి. కేవలం 164 పరుగుల లక్ష్యాన్ని కాపాడుకోవడంలో పంజాబ్ విఫలమైంది. అయితే ఈ ఓటమికి ఆటగాళ్ల వ్యక్తిగత ప్రదర్శనతో పాటు కెప్టెన్ శ్రేయస్ అయ్యర్ తీసుకున్న కొన్ని నిర్ణయాలే ప్రధాన కారణమని విశ్లేషకులు భావిస్తున్నారు. ఈ మ్యాచ్‌లో పంజాబ్ కొంపముంచిన ఆ ఐదుగురు ప్లేయర్ల గురించి తెలుసుకుందాం.

1. ప్రియాన్ష్ ఆర్య

యంగ్ ఓపెనర్ ప్రియాన్ష్ ఆర్యపై పంజాబ్ జట్టు చాలా ఆశలు పెట్టుకుంది. అతను ఇచ్చే అద్భుతమైన, వేగవంతమైన ఆరంభం జట్టుకు ఎంతో కీలకం. అయితే ఈ మ్యాచ్‌లో పిచ్ పరిస్థితులను అంచనా వేయకుండా రిస్క్ షాట్ ఆడి కేవలం 2 బంతుల్లో 2 పరుగులు చేసి పెవిలియన్ చేరాడు. జట్టును కష్టాల్లో నెట్టి తొందరగా అవుట్ అవ్వడం పంజాబ్ వైఫల్యానికి పునాది వేసింది.

2. కూపర్ కోనోలి & నెహాల్ వధేరా

ఆస్ట్రేలియా బ్యాటర్ కూపర్ కోనోలి ఒక్క బంతే ఎదుర్కొని డకౌట్ అవ్వగా, మరో కీలక బ్యాటర్ నెహాల్ వధేరా ఘోరంగా విఫలమయ్యాడు. వధేరా క్రీజులో ఉన్నంతసేపు అసలు బంతిని సరిగ్గా కనెక్ట్ చేయలేకపోయాడు. 6 బంతులు ఆడి ఒక్క పరుగు కూడా చేయకుండా అవుట్ అయ్యాడు. మధ్య ఓవర్లలో వీరిద్దరూ కనీసం కొన్ని పరుగులు చేసి ఉన్నా పంజాబ్ స్కోరు 180 దాటేది.

3. శ్రేయస్ అయ్యర్

ఈ ఓటమికి అతిపెద్ద బాధ్యుడు కెప్టెన్ శ్రేయస్ అయ్యర్ అని చెప్పక తప్పదు. తొలుత బ్యాటింగ్‌లో 21 బంతులు ఆడి కేవలం 19 పరుగులు మాత్రమే చేశాడు. స్ట్రైక్ రేట్ (90.48) దారుణంగా ఉండటంతో జట్టు స్కోరు వేగం తగ్గింది. ఇక కెప్టెన్సీ విషయానికి వస్తే, ఐపీఎల్ టాప్ బౌలర్ యుజ్వేంద్ర చాహల్‌తో కేవలం ఒకే ఒక్క ఓవర్ వేయించడం అందరినీ ఆశ్చర్యపరిచింది. చాహల్‌కు మిగిలిన ఓవర్లు ఇవ్వకుండా, ఆఖరి ఓవర్లో మార్కస్ స్టోయినిస్‌ను బౌలింగ్‌కు దించి భారీ మూల్యం చెల్లించుకున్నాడు.

4. ప్రభ్‌సిమ్రాన్ సింగ్

గత మ్యాచ్‌లో హాఫ్ సెంచరీ చేసిన ప్రభ్‌సిమ్రాన్ సింగ్, ఈ మ్యాచ్‌లో మాత్రం తడబడ్డాడు. 14 బంతుల్లో కేవలం 15 పరుగులు చేసి అవుట్ అయ్యాడు. ఓపెనర్‌గా వచ్చి పవర్ ప్లేలో వేగంగా పరుగులు రాబట్టడంలో అతను విఫలం కావడం జట్టుపై ఒత్తిడి పెంచింది. అతని తక్కువ స్ట్రైక్ రేట్ కూడా పంజాబ్ తక్కువ స్కోరుకే పరిమితం కావడానికి ఒక కారణం.

5. బౌలింగ్ విభజనలో లోపాలు

ఆఖరి ఓవర్లో గుజరాత్‌కు పరుగులు అవసరమైనప్పుడు, అనుభవజ్ఞుడైన అర్ష్‌దీప్ సింగ్ వంటి స్పెషలిస్ట్ బౌలర్లను కాదని, స్టోయినిస్‌కు బంతిని ఇవ్వడం పెద్ద పొరపాటు. చాహల్ వంటి వికెట్ టేకింగ్ బౌలర్‌ను పక్కన పెట్టడం వల్ల గుజరాత్ బ్యాటర్లు ఎలాంటి ఒత్తిడి లేకుండా లక్ష్యాన్ని చేధించగలిగారు. పంజాబ్ యాజమాన్యం, కెప్టెన్ ఈ వ్యూహాత్మక తప్పిదాలను సరిదిద్దుకోకపోతే ప్లేఆఫ్స్ రేసులో ఇబ్బందులు తప్పవు.

మరిన్ని క్రీడా వార్తల కోసం ఇక్కడ క్లిక్ చేయండి..