Asia Cup 2025 : ఒకప్పుడు మూడే టీమ్స్.. ఫైనల్స్ లేవు.. మొదటి ఆసియా కప్‌ని గెలుచుకున్న టీమ్ ఏదో తెలుసా ?

Asia Cup 2025 : ఆసియా కప్ 2025 సీజన్ మరికొద్ది గంటల్లో ప్రారంభం కాబోతోంది. ఈసారి ఏకంగా 8 జట్లు ఈ టోర్నమెంట్‌లో పాల్గొంటున్నాయి. అయితే 41 ఏళ్ల క్రితం తొలిసారి జరిగిన ఆసియా కప్‌లో కేవలం మూడు జట్లు మాత్రమే పాల్గొన్నాయి. ఫైనల్ మ్యాచ్ కూడా లేకుండానే ఒక జట్టు విజేతగా నిలిచింది. ఆసియా కప్ చరిత్ర గురించి, తొలి టోర్నమెంట్‌ విశేషాలు గురించి ఈ వార్తలో తెలుసుకుందాం.

ఆరంభంలో కేవలం మూడు జట్లు మాత్రమే..

ప్రస్తుతం క్రికెట్ ప్రపంచంలో అత్యంత ప్రతిష్టాత్మక టోర్నమెంట్లలో ఆసియా కప్ ఒకటి. 2025లో ఆసియా కప్ 17వ ఎడిషన్ ప్రారంభం కాబోతోంది. కానీ, తొలి ఆసియా కప్ గురించి తెలుసుకుంటే ఆసక్తికరమైన విషయాలు కనిపిస్తాయి. మొట్టమొదటి ఆసియా కప్ టోర్నమెంట్ 1984లో యూఏఈ వేదికగా జరిగింది. ఆ సమయంలో కేవలం మూడు జట్లు మాత్రమే ఇందులో పాల్గొన్నాయి. అవి భారత్, శ్రీలంక, పాకిస్తాన్. ఈ మూడు జట్ల మధ్య రౌండ్ రాబిన్ ఫార్మాట్‌లో మ్యాచ్‌లు జరిగాయి.. అంటే ప్రతి జట్టు మిగతా రెండు జట్లతో ఒక్కో మ్యాచ్ ఆడింది.

ఫైనల్ మ్యాచ్‌తో పని లేకుండానే..

ఆశ్చర్యకరమైన విషయం ఏమిటంటే.. ఆసియా కప్ తొలి ఎడిషన్‌లో ఫైనల్ మ్యాచ్ అనేదే లేదు. అన్ని జట్లు తమ మ్యాచ్‌లు ఆడిన తర్వాత పాయింట్ల పట్టికలో ఏ జట్టు టాప్‌లో ఉంటుందో ఆ జట్టే విజేతగా నిలుస్తుంది. ఆ టోర్నమెంట్లో శ్రీలంక, పాకిస్తాన్‌పై విజయం సాధించింది. ఆ తర్వాత, సునీల్ గవాస్కర్ నేతృత్వంలోని టీమిండియా శ్రీలంకపై 10 వికెట్ల తేడాతో, పాకిస్తాన్‌పై 54 పరుగుల తేడాతో అద్భుతమైన విజయం సాధించింది. ఈ విజయాలతో భారత జట్టు మొత్తం నాలుగు పాయింట్లతో పట్టికలో అగ్రస్థానంలో నిలిచింది. దీంతో భారత్‌ని మొదటి ఆసియా కప్ ఛాంపియన్‌గా ప్రకటించారు. శ్రీలంక రెండో స్థానంలో నిలవగా, పాకిస్తాన్ తమ రెండు మ్యాచ్‌లలోనూ ఓడిపోయింది.

41 ఏళ్ల ప్రస్థానం..

1984 నుంచి 2025 వరకు ఆసియా కప్ చాలా అభివృద్ధి చెందింది. అప్పట్లో కేవలం మూడు జట్లతో ప్రారంభమైన టోర్నమెంట్, ఇప్పుడు ఎనిమిది జట్లు పాల్గొనే స్థాయికి ఎదిగింది. మొదట వన్డే ఫార్మాట్‌లో మాత్రమే జరిగిన ఈ టోర్నమెంట్, ఇప్పుడు వన్డే, టీ20 ఫార్మాట్లలో కూడా జరుగుతోంది. ఈసారి 2025 ఆసియా కప్‌కు భారత్ ఆతిథ్యం ఇవ్వనుంది. అయితే, భారత్-పాకిస్తాన్ మధ్య ఉన్న రాజకీయ ఉద్రిక్తతల కారణంగా, ఈ టోర్నమెంట్ యూఏఈలో నిర్వహించబడుతోంది. 2025 ఆసియా కప్‌లో భారత్, పాకిస్తాన్, శ్రీలంక, బంగ్లాదేశ్, ఆఫ్ఘనిస్తాన్, యూఏఈ, ఒమన్, హాంగ్ కాంగ్ జట్లు పాల్గొంటున్నాయి.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..