Virat Kohli : రిటైర్మెంట్ వార్తల పై గట్టిగా ఇచ్చి పడేసిన విరాట్ కోహ్లీ.. వైరల్ అవుతున్న పోస్ట్!

Virat Kohli : టీ20, టెస్ట్ క్రికెట్‌కు వీడ్కోలు పలికిన టీమిండియా మాజీ కెప్టెన్ విరాట్ కోహ్లీ, ప్రస్తుతం వన్డే ఫార్మాట్‌పై పూర్తి దృష్టి పెట్టారు. ఆగస్టులో బంగ్లాదేశ్‌తో జరగాల్సిన వన్డే సిరీస్ రద్దు కావడంతో, ఇప్పుడు అక్టోబర్‌లో ఆస్ట్రేలియాతో జరిగే సిరీస్‌కు సిద్ధమవుతున్నారు. ఈ సిరీస్ కోహ్లీ కెరీర్‌కు చాలా ముఖ్యమైనదని క్రికెట్ వర్గాలు భావిస్తున్నాయి. ఇదే సమయంలో, తన రిటైర్మెంట్ వార్తలపై కోహ్లీ ఒక సోషల్ మీడియా పోస్టుతో సమాధానం ఇచ్చారు.

విరాట్ కోహ్లీ ఇటీవల ఇండోర్ నెట్ ప్రాక్టీస్ చేస్తున్న ఒక ఫోటోను తన సోషల్ మీడియాలో షేర్ చేశారు. ఈ ఫోటోలో గుజరాత్ టైటాన్స్ అసిస్టెంట్ కోచ్ నయీమ్ అమీన్తో కలిసి బ్యాటింగ్ ప్రాక్టీస్ చేస్తూ కనిపించారు. ఈ పోస్టుకు కోహ్లీ “హిట్ చేయడంలో సహాయపడినందుకు ధన్యవాదాలు బ్రదర్.. మిమ్మల్ని చూడటం ఎల్లప్పుడూ సంతోషంగా ఉంటుంది” అని క్యాప్షన్ ఇచ్చారు. ఈ పోస్టుతో కోహ్లీ తన తదుపరి ఛాలెంజ్‌కు పూర్తిగా సిద్ధంగా ఉన్నానని సంకేతాలు ఇచ్చారు.

కోహ్లీ పోస్ట్ చేసిన ఈ ఫోటోను ఒక క్రికెట్ ఫ్యాన్ పేజ్ కూడా షేర్ చేసింది. ఆస్ట్రేలియాతో జరగబోయే వన్డే సిరీస్‌కు కోహ్లీ సిద్ధమవుతున్నాడని అందులో పేర్కొంది. ఈ పోస్ట్‌ను కోహ్లీ స్వయంగా లైక్ చేయడం అభిమానుల్లో మరింత ఉత్సాహాన్ని నింపింది.

టీ20 ప్రపంచ కప్ గెలిచిన తర్వాత రోహిత్ శర్మ, విరాట్ కోహ్లీ ఇద్దరూ టీ20 అంతర్జాతీయ క్రికెట్‌కు వీడ్కోలు పలికారు. రోహిత్ టెస్ట్ క్రికెట్‌కు కూడా దూరమయ్యారు. అయితే, వన్డే ఫార్మాట్‌లో ఇద్దరూ ఇంకా జట్టుకు కీలక ఆటగాళ్లే. రోహిత్ కెప్టెన్‌గా, కోహ్లీ అత్యంత నమ్మకమైన బ్యాట్స్‌మెన్‌గా కొనసాగుతున్నారు. బీసీసీఐ 2027 వన్డే ప్రపంచ కప్‌ను దృష్టిలో ఉంచుకుని భవిష్యత్ ప్రణాళికలు రూపొందిస్తోంది. 2027 నాటికి రోహిత్ శర్మ వయస్సు 40, విరాట్ కోహ్లీ వయస్సు 39 అవుతుంది. ఈ నేపథ్యంలో వారి భవిష్యత్ ప్రణాళికల గురించి బోర్డు వారికి ముందే స్పష్టమైన సూచనలు ఇవ్వవచ్చని మీడియా నివేదికలు చెబుతున్నాయి.

అక్టోబర్ 19 నుంచి 25 వరకు జరగనున్న ఆస్ట్రేలియాతో వన్డే సిరీస్, ఈ ఇద్దరు ఆటగాళ్ల కెరీర్‌లో చివరి సిరీస్ కావచ్చని ఊహాగానాలు వినిపిస్తున్నాయి. అయితే, దీనిపై అధికారిక ప్రకటన ఇంకా రాలేదు. కానీ కోహ్లీ చూపించిన ఉత్సాహం, కష్టాన్ని చూస్తుంటే, తాను చివరి వరకు పూర్తి శక్తితో ఆడటానికి సిద్ధంగా ఉన్నట్లు తెలుస్తోంది.

మరిన్ని క్రికెట్ వార్తల కోసం ఇక్కడ క్లిక్ చేయండి..