Team India : టీ20 ప్రపంచకప్ తర్వాత టీమిండియాలో భారీ మార్పులు.. ఆసియా కప్‌లో కేవలం 8 మందికే చోటు

Team India : టీ20 ప్రపంచకప్ 2024 విజయం తర్వాత భారత క్రికెట్ అభిమానులకు మరో గుడ్ న్యూస్. యూఏఈ వేదికగా సెప్టెంబర్ 9 నుంచి ప్రారంభం కానున్న ఆసియా కప్ 2025 కోసం బీసీసీఐ భారత జట్టును ప్రకటించింది. ఈ టోర్నమెంట్‌కు 15 మంది సభ్యులతో కూడిన జట్టును సెలక్ట్ చేయగా, టీ20 ప్రపంచకప్ విజేత జట్టులో ఉన్న చాలా మంది ముఖ్యమైన ఆటగాళ్లు ఈసారి జట్టులో లేకపోవడం చర్చనీయాంశంగా మారింది.

గతేడాది టీ20 ప్రపంచకప్‌లో రోహిత్ శర్మ నాయకత్వంలో 17 ఏళ్ల తర్వాత భారత్ కప్పు గెలిచింది. కానీ ఆ విజయం తర్వాత రోహిత్ శర్మ టీ20 అంతర్జాతీయ క్రికెట్‌కు వీడ్కోలు పలికారు. ఆ తర్వాత టీ20 ఫార్మాట్‌కు సూర్యకుమార్ యాదవ్ కెప్టెన్‌గా బాధ్యతలు చేపట్టారు. టీ20 ప్రపంచకప్ తర్వాత టీమిండియా ఆడుతున్న తొలి పెద్ద టోర్నమెంట్ ఆసియా కప్. అందుకే, టీ20 ప్రపంచకప్ జట్టుకు, ఇప్పుడు సెలక్ట్ చేసిన జట్టుకు మధ్య చాలా తేడాలు కనిపిస్తున్నాయి.

టీ20 ప్రపంచకప్ జట్టులో కెప్టెన్‌గా రోహిత్ శర్మ, వైస్ కెప్టెన్‌గా హార్దిక్ పాండ్యా ఉన్నారు. అయితే, ఇప్పుడు ఆసియా కప్ జట్టుకు సూర్యకుమార్ యాదవ్ కెప్టెన్‌గా, టెస్ట్ కెప్టెన్ శుభమన్ గిల్ వైస్ కెప్టెన్‌గా ఎంపికయ్యారు. టీ20 ప్రపంచకప్‌లో శుభమన్ గిల్ కేవలం స్టాండ్ బై ఆటగాడిగా మాత్రమే ఉన్నాడు. కానీ ఇప్పుడు అతను వైస్ కెప్టెన్ స్థాయికి ఎదిగి పెద్ద ఎత్తున దూసుకెళ్లాడు. టీ20 ప్రపంచకప్ స్క్వాడ్‌లో ఉన్న విరాట్ కోహ్లీ, రోహిత్ శర్మ, రవీంద్ర జడేజా అంతర్జాతీయ టీ20లకు రిటైర్మెంట్ ప్రకటించడంతో జట్టులో చోటు కోల్పోయారు. వీరితో పాటు యశస్వి జైస్వాల్, రిషబ్ పంత్, యుజ్వేంద్ర చాహల్, మహ్మద్ సిరాజ్ కూడా ఈ జట్టులో లేరు. పంత్ గాయం కారణంగా జట్టుకు దూరంగా ఉన్నాడు. సిరాజ్‌కు విశ్రాంతినిచ్చారు. జైస్వాల్ స్టాండ్ బై ఆటగాళ్ల జాబితాలో ఉన్నారు. ఇక చాహల్ జట్టులో చోటు కోల్పోయాడు.

టీ20 ప్రపంచకప్ మరియు ఇప్పుడు ఎంపికైన ఆసియా కప్ స్క్వాడ్‌లలో ఉమ్మడిగా ఉన్న ఆటగాళ్లు కేవలం 8 మంది మాత్రమే. సూర్యకుమార్ యాదవ్, హార్దిక్ పాండ్యా, సంజు శాంసన్, శివమ్ దూబే, అక్షర్ పటేల్, కుల్దీప్ యాదవ్, అర్షదీప్ సింగ్, జస్ప్రీత్ బుమ్రా.. వీరంతా టీ20 ప్రపంచకప్ తర్వాత కూడా ఆసియా కప్ టీ20 జట్టులో తమ స్థానాలను నిలబెట్టుకున్నారు.

టీ20 ప్రపంచకప్ 2024 టైటిల్ గెలిచిన తర్వాత భారత జట్టు మొత్తం ఐదు టీ20 సిరీస్‌లు ఆడింది. వీటిలో నాలుగు సిరీస్‌లకు సూర్యకుమార్ యాదవ్ కెప్టెన్‌గా వ్యవహరించారు. రోహిత్ రిటైర్మెంట్ తర్వాత అతన్నే కెప్టెన్‌గా ఎంపిక చేశారు. అయితే జింబాబ్వేతో జరిగిన సిరీస్‌కు సూర్యకుమార్ యాదవ్‌కు విశ్రాంతినివ్వడంతో, శుభమన్ గిల్ కెప్టెన్‌గా బాధ్యతలు చేపట్టారు. గిల్ గత ఏడాది శ్రీలంకతో టీ20 మ్యాచ్ ఆడినప్పటికీ, ఆ తర్వాత టీ20 జట్టులో భాగం కాలేదు. గతంలో అక్షర్ పటేల్ జట్టుకు వైస్ కెప్టెన్‌గా వ్యవహరించినా, ప్రస్తుత జట్టులో ఆ పదవిలో లేడు.

ఆసియా కప్ 2025 కోసం భారత జట్టు

సూర్యకుమార్ యాదవ్ (కెప్టెన్), శుభమన్ గిల్ (వైస్ కెప్టెన్), అభిషేక్ శర్మ, తిలక్ వర్మ, హార్దిక్ పాండ్యా, శివమ్ దూబే, అక్షర్ పటేల్, జితేష్ శర్మ (వికెట్ కీపర్), జస్ప్రీత్ బుమ్రా, అర్షదీప్ సింగ్, వరుణ్ చక్రవర్తి, కుల్దీప్ యాదవ్, సంజు శాంసన్ (వికెట్ కీపర్), హర్షిత్ రాణా, రింకూ సింగ్.

టీ20 ప్రపంచకప్ 2024 కోసం భారత జట్టు

రోహిత్ శర్మ (కెప్టెన్), హార్దిక్ పాండ్యా (వైస్ కెప్టెన్), యశస్వి జైస్వాల్, విరాట్ కోహ్లీ, సూర్యకుమార్ యాదవ్, రిషబ్ పంత్ (వికెట్ కీపర్), సంజు శాంసన్ (వికెట్ కీపర్), శివమ్ దూబే, రవీంద్ర జడేజా, అక్షర్ పటేల్, కుల్దీప్ యాదవ్, యుజ్వేంద్ర చాహల్, అర్షదీప్ సింగ్, జస్ప్రీత్ బుమ్రా, మహ్మద్ సిరాజ్.

మరిన్ని క్రీడా వార్తల కోసం ఇక్కడ క్లిక్ చేయండి..