BCCI salary disparity: ఇదేం దిక్కుమాలిన వేతన వ్యవస్థ! BCCI జీతాలపై సన్నీజీ గరం!

భారత మాజీ క్రికెటర్ సునీల్ గవాస్కర్ దేశవాళీ క్రికెట్ వేతన వ్యవస్థపై తీవ్రమైన ఆవేదన వ్యక్తం చేశారు. దేశవాళీ క్రికెట్‌లో ఉత్తమ ప్రదర్శనలతో బాగా రాణిస్తున్నప్పటికీ, అనేక మంది క్రికెటర్లు తగిన గుర్తింపును పొందకుండానే తక్కువ పారితోషికాలతో తమ కెరీర్‌ను ముగించాల్సి వస్తోందని ఆయన పేర్కొన్నారు. రంజీ ట్రోఫీ లాంటి కీలక టోర్నమెంట్లలో సంవత్సరాల పాటు అద్భుతంగా ఆడిన వారికి తగిన రెమ్యూనరేషన్ దక్కకపోగా, ఐపీఎల్ వేలంలో ఒక్క మంచి ప్రదర్శన లేకుండానే కోట్ల రూపాయల డీల్ సంపాదించే అన్‌క్యాప్డ్ ఆటగాళ్లు ఎక్కువగా ఉన్నారని ఆయన అన్నారు. ఈ అసమానతను తప్పనిసరిగా సరిచేయాలని గవాస్కర్ కోరారు.

తన వాదనకు బలం చేకూర్చే విధంగా గవాస్కర్ ఇటీవలే రిటైరైన ప్రియాంక్ పంచల్ ఉదాహరణను ఇచ్చారు. ఫస్ట్ క్లాస్ క్రికెట్‌లో 9,000 పరుగులు చేసిన పంచల్ 29 సెంచరీలతో మెరవడంతో పాటు భారతదేశం A జట్టుకు నాయకత్వం కూడా వహించాడు. అయినప్పటికీ, భారత సీనియర్ జట్టుకు ప్రాతినిధ్యం వహించలేకపోయాడు. ఐపీఎల్ లాంటి లీగ్‌లో కనీసం ఒక్క కాంట్రాక్ట్ కూడా పొందలేదు. అలాంటి పంచల్ లాంటి ఆటగాడికి తన యవ్వనాన్ని ఆటకు అంకితం చేసినప్పటికీ, బ్యాంక్ ఖాతాలో పెద్దగా సొమ్ము లేకపోవడం ఎంత బాధాకరమో గవాస్కర్ ఆవేదనతో వెల్లడించారు.

అదే సమయంలో, ఐపీఎల్‌లో ఒక్క మ్యాచ్ ఆడకుండానే కొన్ని కోట్ల రూపాయల పారితోషికం పొందిన ఆటగాళ్లు ఉన్నారని గుర్తు చేశారు. దేశవ్యాప్తంగా అన్ని రకాల వాతావరణ పరిస్థితులలో రెండు దశాబ్దాలు ఆటను కొనసాగించిన పంచల్‌కు రంజీ ట్రోఫీ ద్వారా రూ. 3 కోట్లు వచ్చినా ఆశ్చర్యమేనని చెప్పారు. ఇది దేశీయ క్రికెట్, ఐపీఎల్ మధ్య వేతన వ్యత్యాసాన్ని బలంగా చూపించేదిగా ఉందని ఆయన అభిప్రాయపడ్డారు.

మార్కెట్ శక్తుల వల్ల ఇలా జరుగుతోందనే వాదనను గవాస్కర్ ఖండించారు. చాలా సందర్భాల్లో ఆటగాళ్ల ఎంపిక అదృష్టం ఆధారంగా జరుగుతుందని, కేవలం ప్రతిభతో మాత్రమే డీల్స్ లభించడంలేదని వ్యాఖ్యానించారు. కొన్ని ఫ్రాంచైజీలు యువ ప్రతిభను చూపించాలనే ఉద్దేశ్యంతో ముందుకు వచ్చేవని, ఇది వారిని కోటీశ్వరులుగా మార్చినా వారు భారత జట్టుకు పెద్దగా ఏమీ అందించలేదని చెప్పారు.

ఈ అసమానతల నివారణకు గవాస్కర్ ఒక ప్రతిపాదనను ముందుకు తెచ్చారు. దేశవాళీ క్రికెట్‌లో ఫీజు స్లాబ్ వ్యవస్థను రూపొందించాలని, ఎక్కువ మ్యాచ్‌లు ఆడినవారికి, తమ జట్టును నాకౌట్ దశల వరకూ తీసుకెళ్లిన ఆటగాళ్లకు ఎక్కువ పారితోషికం ఇవ్వాలని సూచించారు. BCCI వద్ద నిధుల కొరత లేకపోవడంతో, వచ్చే దేశవాళీ సీజన్ ప్రారంభానికి ముందుగా ఈ మార్పులను పరిగణనలోకి తీసుకోవాలని గవాస్కర్ ఆశాభావం వ్యక్తం చేశారు.

మరిన్ని క్రికెట్ వార్తల కోసం ఇక్కడ క్లిక్ చేయండి..