Gavaskar: దుబాయ్ వేదికలపై ఒక్క దెబ్బతో అందరి నోళ్లు మూయించిన సన్నీ! మీకు జీతాలు ఇస్తుంది కూడా మేమే అంటూ ఫైర్
సునీల్ గవాస్కర్ టీమిండియాపై విమర్శలు చేసిన ఇంగ్లండ్ మాజీ క్రికెటర్లపై తీవ్రంగా స్పందించారు. భారత జట్టు విజయాలను విమర్శించే బదులుగా, తమ ఆటతీరు మెరుగుపర్చుకోవాలని సూచించారు. BCCI ఆదాయమే క్రికెట్ ప్రపంచాన్ని నడిపిస్తుందని, భారత అభిమానుల మద్దతే కీలకమని గవాస్కర్ తెలిపారు. ఇతర జట్లు తమ ఆటను మెరుగుపర్చుకోవడం ముఖ్యం అని సూచించారు.
Updated on: Mar 02, 2025 | 11:10 AM
భారత క్రికెట్ దిగ్గజం సునీల్ గవాస్కర్ ఇంగ్లాండ్ మాజీ క్రికెటర్లపై తీవ్ర అసహనం వ్యక్తం చేశాడు. ఐసీసీ ఛాంపియన్స్ ట్రోఫీ 2025లో టీమిండియా మ్యాచ్లన్నీ దుబాయ్ వేదికగానే జరుగుతాయని ప్రకటించడంతో, దీనిపై ఇంగ్లాండ్ మాజీ క్రికెటర్లు నాజర్ హుస్సేన్, మైక్ అథర్టన్, అలాగే ఆస్ట్రేలియా కెప్టెన్ ప్యాట్ కమిన్స్ అసంతృప్తిని వ్యక్తం చేశారు. ఒకే వేదికలో మ్యాచ్లు జరగడం టీమిండియాకు ప్రయోజనకరంగా మారుతుందని, ఇది అన్యాయమని వారు వ్యాఖ్యానించారు. అయితే, ఈ వ్యాఖ్యలపై గవాస్కర్ ఘాటుగా స్పందించాడు. ఇలాంటి విమర్శలు చేసే బదులుగా, ఇంగ్లాండ్ జట్టు ప్రదర్శనపై దృష్టి పెట్టాలని, వారి తప్పులను సమీక్షించుకోవాలని సూచించాడు.
ఇంగ్లాండ్ సెమీఫైనల్కు చేరకపోవడాన్ని జీర్ణించుకోలేక, టీమిండియాపై నెపం మోపడం సరికాదని గవాస్కర్ తెలిపారు. “ఇంగ్లాండ్ జట్టు రెండు మ్యాచ్ల్లో ఓడిపోవడంతో సెమీస్ చేరలేదు. ఆ బాధను ఇతర జట్లపై వెళ్లగక్కడం ఎంత వరకు సమంజసం? ముందుగా తమ జట్టు లోపాలను అర్థం చేసుకుని, వాటిని సరిదిద్దుకునే ప్రయత్నం చేయాలి. అంతేకానీ, టీమిండియాపై అనవసర విమర్శలు చేయడం తగదు. ఇంగ్లాండ్ జట్టు ప్రస్తుత పరిస్థితిని మెరుగుపర్చుకోవడానికి అవసరమైన మార్గాలను కనుగొనండి. భారత్కు లభించిన అవకాశాన్ని తక్కువ చేసి మాట్లాడటాన్ని మానుకోవాలి” అని గవాస్కర్ హెచ్చరించాడు.
అంతేగాక, అంతర్జాతీయ క్రికెట్లో టీమిండియా కేవలం ప్రతిభ పరంగానే కాదు, ఆర్థికంగానూ ఎంతో సహాయపడుతోందని గవాస్కర్ పేర్కొన్నారు. భారత క్రికెట్ బోర్డు (BCCI) క్రికెట్కు భారీ ఆదాయం తీసుకువస్తుందని, టీవీ ప్రసార హక్కులు, స్పాన్సర్షిప్ల ద్వారా వచ్చిన లాభాలతోనే క్రికెట్ ప్రపంచం నడుస్తోందని స్పష్టం చేశాడు. “ఇంగ్లాండ్ కామెంటేటర్లకు కూడా పరోక్షంగా టీమిండియానే జీతాలు అందిస్తోంది. ఇది వారు గుర్తించాలి. భారత్ వల్లే క్రికెట్కు అంతటి ఆదరణ ఉంది. ఇలాంటి పొగరు మాటలు వదిలేసి, ఆటపై దృష్టి పెట్టడం మంచిది” అని గవాస్కర్ తన మాటల్లో స్పష్టం చేశాడు.
గవాస్కర్ తన వ్యాఖ్యల్లో అంతర్జాతీయ క్రికెట్లో భారత జట్టు కీలక పాత్రను కూడా వివరించాడు. టీమిండియా మాత్రమే కాదు, మొత్తం క్రికెట్ ప్రపంచం భారతదేశం తెచ్చే ఆదాయంపై ఎన్నో విధాలుగా ఆధారపడిందని, మ్యాచ్ల వ్యూయర్షిప్లోనూ భారత అభిమానులు అత్యధికంగా ఉన్నారని పేర్కొన్నాడు. “ఒక టోర్నమెంట్ విజయవంతం కావాలంటే భారత జట్టు పాల్గొనడం, భారత ప్రేక్షకులు ఆసక్తిగా ఉండడం తప్పనిసరి. BCCI, ఐసీసీకి మాత్రమే కాకుండా, అనేక ఇతర క్రికెట్ బోర్డులకు కూడా నిధుల కల్పనలో సహాయపడుతోంది. ఇలాంటి పరిస్థితే ఉండగా, భారత జట్టు తీసుకునే నిర్ణయాలను విమర్శించడం అన్యాయంగా ఉంటుంది” అని గవాస్కర్ చెప్పాడు.
అంతేగాక, టీమిండియా జైత్రయాత్ర ప్రపంచ క్రికెట్పై ప్రభావం చూపిస్తున్నందున, ఇతర జట్లకు తమ ఆటను మెరుగుపరిచేలా కృషి చేయాలని సూచించాడు. “భారత జట్టు గెలుస్తోంది అంటే అది వారి ప్రతిభకు, కఠిన సాధనకు ఫలితమే. అలాంటి జట్టును విమర్శించకూడదు. ఆత్మ పరిశీలన చేసుకోవాలి. ఒక జట్టు గెలవాలంటే కేవలం ఆటగాళ్ల ప్రతిభ మాత్రమే కాదు, ఆత్మస్థైర్యం కూడా ముఖ్యం. భారత్ ఇటీవలి కాలంలో ఎంతో ఆత్మవిశ్వాసంతో ఆడుతోంది. ఇంగ్లాండ్, ఆస్ట్రేలియా వంటి జట్లు ముందుగా తమ ఆటలో మెరుగుదల చేసుకోవాలి” అని గవాస్కర్ తన వ్యాఖ్యలను ముగించాడు.
మరిన్ని క్రీడా వార్తల కోసం ఇక్కడ క్లిక్ చేయండి.
