Shubman Gill : ఒకే టెస్ట్ మ్యాచ్‌లో డబుల్ సెంచరీ, సెంచరీ బాదిన రెండో టీమిండియా ప్లేయర్.. 54ఏళ్ల రికార్డు బద్దలు

Shubman Gill : టీమిండియా కెప్టెన్ శుభమన్ గిల్ ప్రస్తుతం అదరగొడుతున్నాడు. కెప్టెన్సీ వచ్చీరాగానే తన బ్యాట్ నుంచి పరుగుల వరద పారుతోంది. ఇంగ్లాండ్ పర్యటనలో ఎక్కడా ఆగకుండా పరుగులు చేస్తున్న గిల్, ఇప్పుడు ఎడ్జ్‌బాస్టన్‌లో ఒక చరిత్ర సృష్టించాడు. ఈ టెస్ట్ మ్యాచ్‌లో మొదటి ఇన్నింగ్స్‌లో డబుల్ సెంచరీ బాదిన గిల్, రెండో ఇన్నింగ్స్‌లో కూడా అద్భుతమైన సెంచరీ కొట్టి అందరినీ ఆశ్చర్యపరిచాడు. ఎడ్జ్‌బాస్టన్ టెస్ట్ నాలుగో రోజు బ్యాటింగ్ చేయడానికి దిగిన గిల్, రెండో ఇన్నింగ్స్‌లో చాలా వేగంగా ఆడి తన సెంచరీని పూర్తి చేసుకున్నాడు. దీనితో ఒకే టెస్ట్ మ్యాచ్‌లో డబుల్ సెంచరీ, సెంచరీ సాధించిన భారత్ తరఫున రెండో బ్యాట్స్‌మెన్‌గా, ప్రపంచంలో తొమ్మిదో ఆటగాడిగా నిలిచాడు.

లీడ్స్ టెస్ట్‌లో సెంచరీతో ఈ సిరీస్‌ను స్టార్ట్ చేసిన శుభమన్ గిల్, అదే ఊపును ఎడ్జ్‌బాస్టన్‌లోనూ కొనసాగించాడు. ఈ టెస్ట్ మొదటి ఇన్నింగ్స్‌లోనే గిల్ ఏకంగా 269 పరుగులు చేసి రికార్డు సృష్టించాడు. టెస్ట్ క్రికెట్‌లో కెప్టెన్‌గా అత్యధిక పరుగులు చేసిన భారత ఆటగాడిగా అతను నిలిచాడు. గిల్ బ్యాట్ రెండో ఇన్నింగ్స్‌లో పనిచేయదేమో అని ఎవరైనా డౌట్ పడితే, ఈ స్టార్ బ్యాట్స్‌మెన్ ఆ అనుమానాలను పటాపంచలు చేశాడు. రెండో ఇన్నింగ్స్‌లో కూడా సెంచరీ చేసి చాలా తక్కువ మంది క్రికెటర్లు చేయగలిగిన అద్భుతాన్ని సాధించాడు.

54 ఏళ్ల రికార్డును తిరగరాసిన గిల్

జూలై 5, శనివారం, ఈ టెస్ట్ నాలుగో రోజున టీమిండియా తమ రెండో ఇన్నింగ్స్‌ను ఆడేందుకు వచ్చినప్పుడు, కొద్దిసేపటికే రెండో వికెట్ పోయింది. అప్పుడే కెప్టెన్ గిల్ క్రీజ్‌లోకి వచ్చాడు. ఆ తర్వాత అతను మొదటి ఇన్నింగ్స్‌లో ఎక్కడైతే ఆపాడో అక్కడి నుంచే తన బ్యాటింగ్‌ను మళ్లీ మొదలుపెట్టాడు. ఇంగ్లాండ్ బౌలర్లు ఎవరూ గిల్‌ను ఆపలేకపోయారు. రెండో సెషన్‌లో భారత కెప్టెన్ కేవలం 129 బంతుల్లో తన అద్భుతమైన సెంచరీని పూర్తి చేసుకున్నాడు. ఇది గిల్ కెరీర్‌లో 8వ టెస్ట్ సెంచరీ, ఈ సిరీస్‌లో 3వ సెంచరీ, ఇంగ్లాండ్‌పై 5వ టెస్ట్ సెంచరీ సాధించాడు.

ఈ సెంచరీతో గిల్, టెస్ట్ క్రికెట్ 150 ఏళ్ల చరిత్రలో కేవలం 8 సార్లు మాత్రమే జరిగిన ఒక అద్భుతాన్ని సాధించాడు. ఒకే టెస్ట్ మ్యాచ్‌లో డబుల్ సెంచరీ, సెంచరీ సాధించిన ప్రపంచంలో 9వ బ్యాట్స్‌మెన్‌గా శుభమన్ గిల్ నిలిచాడు. భారత్ తరఫున ఈ అద్భుతం జరగడం ఇది కేవలం రెండోసారి మాత్రమే. ఇంతకుముందు, లెజెండరీ బ్యాట్స్‌మెన్ సునీల్ గవాస్కర్ 54 ఏళ్ల క్రితం 1971లో వెస్టిండీస్‌పై మొదటి ఇన్నింగ్స్‌లో 124 పరుగులు, రెండో ఇన్నింగ్స్‌లో 220 పరుగులు చేశాడు. అప్పుడు గవాస్కర్ అలా చేసిన ప్రపంచంలో రెండో బ్యాట్స్‌మెన్ మాత్రమే. అయితే, గిల్ సాధించిన ఈ ఘనత మరింత ప్రత్యేకమైనది. ఎందుకంటే అతను కెప్టెన్‌గా ఈ అద్భుతాన్ని సాధించాడు.

మ్యాచ్ విషయానికి వస్తే.. టీం ఇండియా తన రెండో ఇన్నింగ్స్‌ను 6 వికెట్ల నష్టానికి 427 పరుగుల వద్ద డిక్లేర్ చేసింది. ఈ ఇన్నింగ్స్‌లో గిల్ భారత్ తరఫున అత్యధికంగా 161 పరుగులు చేశాడు. కెఎల్ రాహుల్, రిషబ్ పంత్, రవీంద్ర జడేజా హాఫ్ సెంచరీలు సాధించారు. ఇంగ్లాండ్ గెలవాలంటే 608 పరుగులు చేయాలి.

మరిన్ని క్రికెట్‌ వార్తల కోసం ఇక్కడ క్లిక్ చేయండి..