వామ్మో.. ఇదేం మ్యాచ్ భయ్యా.. హార్ట్ బీట్ 100 రెట్లు పెంచేసింది.. చివరి బంతికి రనౌట్‌తో ఊహించని ట్విస్ట్

మేజర్ లీగ్ క్రికెట్ (MLC) 2025లో మరోసారి క్రికెట్ అభిమానులను ఉర్రూతలూగించిన మ్యాచ్ ఇది. శాన్ ఫ్రాన్సిస్కో యూనికార్న్స్, టెక్సాస్ సూపర్ కింగ్స్ మధ్య జరిగిన ఈ మ్యాచ్ చివరి బంతి వరకు ఉత్కంఠగా సాగి, రనౌట్‌తో ముగిసింది. ఈ అద్భుత విజయం శాన్ ఫ్రాన్సిస్కో యూనికార్న్స్‌కు ప్లేఆఫ్స్‌లో కీలకమైన స్థానాన్ని పదిలం చేసింది.

ఫ్లోరిడాలోని లాడర్‌హిల్‌లో జరిగిన ఈ మ్యాచ్‌లో టాస్ గెలిచిన టెక్సాస్ సూపర్ కింగ్స్ బౌలింగ్ ఎంచుకుంది. మొదట బ్యాటింగ్‌కు దిగిన శాన్ ఫ్రాన్సిస్కో యూనికార్న్స్, కెప్టెన్ మాథ్యూ షార్ట్‌ (80 పరుగులు, 63 బంతులు) అద్భుతమైన ఇన్నింగ్స్ తో పాటు హసన్ ఖాన్ (40 పరుగులు, 25 బంతులు) మెరుపులతో నిర్ణీత 20 ఓవర్లలో 6 వికెట్ల నష్టానికి 148 పరుగులు చేసింది. ఒకానొక దశలో 25 పరుగులకే 3 వికెట్లు కోల్పోయి కష్టాల్లో పడిన యూనికార్న్స్‌ను షార్ట్, ఖాన్‌ల భాగస్వామ్యం ఆదుకుంది. టెక్సాస్ బౌలర్లలో మార్కస్ స్టోయినిస్ 3 వికెట్లు పడగొట్టాడు.

149 పరుగుల లక్ష్యంతో బరిలోకి దిగిన టెక్సాస్ సూపర్ కింగ్స్‌కు ఆరంభం అంతగా కలిసి రాలేదు. బ్రోడీ కౌచ్ ధాటికి ఓపెనర్లు త్వరగానే పెవిలియన్‌కు చేరారు. అయితే డోనోవన్ ఫెరీరా (39 పరుగులు, 20 బంతులు) మెరుపు బ్యాటింగ్‌తో మ్యాచ్‌ను టెక్సాస్ వైపు తిప్పాడు. చివరి రెండు ఓవర్లలో 23 పరుగులు అవసరం కాగా, 19వ ఓవర్‌లో రొమారియో షెపర్డ్ రెండు కీలక వికెట్లు తీసి మ్యాచ్‌ను మలుపు తిప్పాడు.

చివరి ఓవర్లో టెక్సాస్ విజయానికి 13 పరుగులు అవసరం కాగా, మహమ్మద్ మొహ్సిన్ రెండు బౌండరీలు కొట్టి ఆశలు రేపాడు. చివరి బంతికి 3 పరుగులు కావాల్సిన దశలో, జేవియర్ బార్ట్లెట్ బౌలింగ్ చేశాడు. బ్యాటర్ కల్విన్ సావేజ్ రెండో పరుగు తీసే ప్రయత్నంలో రనౌట్ అయ్యాడు. దీంతో శాన్ ఫ్రాన్సిస్కో యూనికార్న్స్ కేవలం 1 పరుగు తేడాతో థ్రిల్లింగ్ విజయం సాధించింది. మాథ్యూ షార్ట్ ప్లేయర్ ఆఫ్ ది మ్యాచ్ అవార్డును అందుకున్నాడు.

View this post on Instagram

A post shared by Cognizant Major League Cricket (@mlc)

ఈ విజయం శాన్ ఫ్రాన్సిస్కో యూనికార్న్స్‌కు పాయింట్ల పట్టికలో అగ్రస్థానాన్ని పదిలం చేయగా, టెక్సాస్ సూపర్ కింగ్స్ రెండో స్థానంలో కొనసాగుతోంది. ఈ మ్యాచ్ MLC 2025లో అత్యంత ఉత్కంఠభరితమైన పోరాటాల్లో ఒకటిగా నిలిచిపోయింది.