1059 రోజులు, 82 మ్యాచ్లు.. కట్చేస్తే.. 57 బంతుల్లో చరిత్ర సృష్టించిన ముంబై స్టార్..
Nat Sciver Brunt century: డబ్ల్యూపీఎల్ 2023 ప్రారంభమైంది. మొదటి సీజన్ నుంచే చాలామంది బ్యాటర్లు సెంచరీకి చేరువగా వచ్చారు. కానీ, ప్రతిసారీ 90, 99ల మధ్య వికెట్లు పారేసుకున్నారు. కానీ, ఓ ప్లేయర్ 1059 రోజుల తర్వాత ఈ నిరీక్షణకు తెర దింపింది.
Updated on: Jan 26, 2026 | 10:34 PM
మహిళల ప్రీమియర్ లీగ్ (WPL)లో తొలి సెంచరీ ఎట్టకేలకు నమోదైంది. డబ్ల్యూపీఎల్ 4వ సీజన్లో ముంబై ఇండియన్స్ దిగ్గజ ఆల్ రౌండర్ నాట్ స్కైవర్ బ్రంట్ సెంచరీ సాధించి చరిత్ర సృష్టించింది. డబ్ల్యూపీఎల్ 2026లో ముంబై ఇండియన్స్ వర్సెస్ రాయల్ ఛాలెంజర్స్ బెంగళూరు మధ్య జరిగిన కీలకమైన మ్యాచ్లో నాట్ స్కైవర్ బ్రంట్ కేవలం 57 బంతుల్లో సెంచరీ సాధించి, డబ్ల్యూపీఎల్ రికార్డులలో తన పేరును శాశ్వతంగా నిలిపింది. వరుసగా 4 సీజన్లలో, చాలా మంది బ్యాటర్లు 90ల్లో బలైపోతూనే ఉన్నారు. దీని కారణంగా తొలి సెంచరీ కోసం ఎదురుచూపులు కొనసాగుతూనే ఉన్నాయి. అయితే, 1059 రోజులు, 82 మ్యాచ్ల తర్వాత డబ్ల్యూపీఎల్ లో చివరకు తన తొలి సెంచరీని సాధించింది.
సీవర్స్ చిరస్మరణీయ సెంచరీ..
జనవరి 26వ తేదీ సోమవారం సాయంత్రం వడోదరలో జరిగిన ఈ మ్యాచ్లో ముంబై ఇండియన్స్ మొదట బ్యాటింగ్ చేసింది. ఆ జట్టు ఆరంభం పేలవంగా ఉంది. మూడో ఓవర్లోనే ఓపెనర్ సజీవన సజ్నాను కోల్పోయింది. అయితే, నాట్ స్కైవర్, సహ ఓపెనర్ హేలీ మాథ్యూస్తో కలిసి దూకుడుగా బ్యాటింగ్ చేసి కేవలం 32 బంతుల్లోనే తన అర్ధ సెంచరీని పూర్తి చేసుకుంది. ఇంగ్లీష్ ఆల్ రౌండర్, మాథ్యూస్తో కలిసి 131 పరుగుల భాగస్వామ్యాన్ని నెలకొల్పింది.
అర్ధ సెంచరీ చేసిన తర్వాత మాథ్యూస్ ఔటైంది. కానీ, నాట్ స్కైవర్ బ్యాట్ మాత్రం మెరుపులు మెరిపించింది. ఆమె ఆర్సీబీ బౌలర్లపై ఫోర్లు, సిక్సర్ల వర్షం కురిపిస్తూనే ఉంది. చివరికి 20వ ఓవర్ నాల్గవ బంతికి సింగిల్తో తన సెంచరీని చేరుకుంది. ఆమె కేవలం 57 బంతుల్లోనే ఈ మైలురాయిని చేరుకుంది. దీంతో చరిత్ర సృష్టించింది. ఆమె 57 బంతుల్లో 100 పరుగులు చేసి అజేయంగా నిలిచింది. ఆమె ఇన్నింగ్స్లో 16 ఫోర్లు, 1 సిక్సర్ ఉన్నాయి. ముంబై 20 ఓవర్లలో బెంగళూరుకు 200 పరుగుల లక్ష్యాన్ని నిర్దేశించింది.
రికార్డుల వర్షం..
ఈ సెంచరీ సహాయంతో, ఇంగ్లాండ్ కెప్టెన్ నాట్ స్కైవర్-బ్రంట్ కూడా WPL 2026లో 300 పరుగుల మార్కును దాటింది. ఈ విధంగా, ఆమె మరో రికార్డును సృష్టించింది. ఈ లీగ్లోని నాలుగు సీజన్లలో మూడింటిలో ఆమె 300 కంటే ఎక్కువ పరుగులు చేసింది. లీగ్ చరిత్రలో అలా చేసిన మొదటి క్రీడాకారిణిగా నిలిచింది. 2023 మొదటి సీజన్లో, ఆమె 332 పరుగులు చేసి జాబితాలో రెండవ స్థానంలో నిలిచింది. ఆ తర్వాత 2025లో, ఆమె 10 మ్యాచ్ల్లో 523 పరుగులు చేసింది. ఇది ఒకే సీజన్లో అత్యధిక పరుగుల రికార్డు. ఇప్పుడు WPL 2026లో, ఆమె కేవలం ఆరు మ్యాచ్ల్లోనే అత్యధిక పరుగులు (319) చేసింది.
మరిన్ని క్రీడా వార్తల కోసం ఇక్కడ క్లిక్ చేయండి..
