10 ఫోర్లు, 6 సిక్స్లతో రికార్డ్.. 250కిపైగా స్ట్రైక్రేట్తో విధ్వంసం.. సొంత గడ్డపై సీఎస్కే బెండ్ తీసేశాడుగా
ఐపీఎల్ 2026 సీజన్లో భాగంగా ఆదివారం చెన్నై సూపర్ కింగ్స్ మరియు లక్నో సూపర్ జెయింట్స్ మధ్య జరిగిన పోరులో ఆస్ట్రేలియా బ్యాటర్ జోష్ ఇంగ్లిష్ ఆకాశమే హద్దుగా చెలరేగిపోయాడు. కేవలం నాలుగు మ్యాచ్ల కోసమే కోట్లాది రూపాయలు వెచ్చించిన లక్నో ఫ్రాంచైజీ నమ్మకాన్ని నిలబెడుతూ, ఇంగ్లిష్ సృష్టించిన రికార్డుల సునామీకి చిదంబరం స్టేడియం సాక్ష్యంగా నిలిచింది. అతని విధ్వంసకర ఇన్నింగ్స్ వివరాలు ఓసారి చూద్దాం..
Updated on: May 10, 2026 | 5:14 PM
మినీ వేలంలో జోష్ ఇంగ్లిష్ను లక్నో సూపర్ జెయింట్స్ ఏకంగా 8.60 కోట్ల రూపాయలకు కొనుగోలు చేసినప్పుడు అందరూ ఆశ్చర్యపోయారు. దానికి కారణం అతను కేవలం నాలుగు మ్యాచ్లకే అందుబాటులో ఉండటం. అయితే, నేడు చెన్నై బౌలర్లపై అతను చేసిన దాడి చూశాక, లక్నో యాజమాన్యం తీసుకున్న నిర్ణయం ఎంత సరైనదో అర్థమైంది. ఓపెనర్గా బరిలోకి దిగిన ఇంగ్లిష్, తన తోటి ఆటగాడు మిచెల్ మార్ష్ను సైతం ప్రేక్షక పాత్రకే పరిమితం చేస్తూ మైదానంలో పరుగుల వర్షం కురిపించాడు.
చరిత్ర సృష్టించిన ఫాస్టెస్ట్ హాఫ్ సెంచరీ..
చెన్నై బౌలర్లను ఏమాత్రం కనికరించకుండా బాదిన ఇంగ్లిష్, కేవలం 17 బంతుల్లోనే తన అర్థశతకాన్ని పూర్తి చేశాడు. ఈ క్రమంలో అతను లక్నో జట్టు తరఫున ఐపీఎల్ చరిత్రలో మూడవ వేగవంతమైన అర్థశతకం నమోదు చేసిన ఆటగాడిగా రికార్డులకు ఎక్కాడు. గతంలో నికోలస్ పూరన్ 15, 16 బంతుల్లో ఈ ఘనత సాధించగా, ఇప్పుడు ఇంగ్లిష్ ఆ జాబితాలో చేరాడు. రిషబ్ పంత్ వంటి హార్డ్ హిట్టర్లు కూడా సాధించలేని వేగంతో ఇంగ్లిష్ ఈ మైలురాయిని చేరుకోవడం విశేషం.
పవర్ ప్లేలో పరుగుల వరద.. రైనా సరసన ఇంగ్లిష్..
కేవలం అర్థశతకంతోనే ఆగకుండా, పవర్ ప్లే ఓవర్లలో ఇంగ్లిష్ సృష్టించిన విధ్వంసం మామూలుగా లేదు. పవర్ ప్లే ముగిసే సమయానికి అతను ఏకంగా 77 పరుగులు చేసి, ఐపీఎల్ చరిత్రలో పవర్ ప్లేలో అత్యధిక పరుగులు చేసిన నాలుగో బ్యాటర్గా నిలిచాడు. సురేష్ రైనా (87), ట్రావిస్ హెడ్ (84) వంటి దిగ్గజాల సరసన అతను చోటు సంపాదించాడు. అలాగే, లక్నో జట్టు తరపున పవర్ ప్లేలో అత్యధిక స్కోరు సాధించిన బ్యాటర్గా మిచెల్ మార్ష్ రికార్డును ఇంగ్లిష్ ఈరోజు అధిగమించాడు.
లక్నో జట్టులో సరికొత్త రికార్డులు..
ఐపీఎల్ పవర్ ప్లేలో లక్నో తరఫున అత్యధిక వ్యక్తిగత స్కోర్లు ఇలా ఉన్నాయి:
జోష్ ఇంగ్లిష్: 77 పరుగులు (చెన్నైపై – నేడు)
మిచెల్ మార్ష్: 60 పరుగులు (ముంబైపై – 2025)
మిచెల్ మార్ష్: 58 పరుగులు (బెంగళూరుపై – 2026)
బౌలర్లకు పీడకలగా మారిన ఇంగ్లిష్ బ్యాటింగ్..
ఈ ఇన్నింగ్స్లో ఇంగ్లిష్ మొత్తం 6 భారీ సిక్సర్లతో చెన్నై బౌలర్లను వణికించాడు. షార్ట్ బంతులను పుల్ చేస్తూ, స్పిన్నర్లను స్వీప్ చేస్తూ అతను ఆడిన తీరు అభిమానులను మంత్రముగ్ధులను చేసింది. వేలంలో తనపై పెట్టిన ప్రతి రూపాయికి న్యాయం చేస్తూ, కేవలం నాలుగు మ్యాచ్లే అయినా తన ముద్రను ఐపీఎల్ చరిత్రలో బలంగా వేయగలిగాడు. ఈ అద్భుత ప్రదర్శనతో లక్నో జట్టు ప్లేఆఫ్స్ అవకాశాలు మరింత మెరుగుపడ్డాయి.
మరిన్ని క్రీడా వార్తల కోసం ఇక్కడ క్లిక్ చేయండి..
