IND vs ENG: ఇంగ్లండ్ గడ్డపై చరిత్ర సృష్టించనున్న జస్సీ.. జస్ట్ ఒక్క అడుగు దూరంలో..

Jasprit Bumrah Record: భారత క్రికెట్ జట్టుకు అతి పెద్ద ఆశాకిరణం, ప్రపంచ టెస్టు క్రికెట్‌లో నంబర్ వన్ బౌలర్‌గా వెలుగొందుతున్న జస్ప్రీత్ బుమ్రా, ఇంగ్లండ్ గడ్డపై అరుదైన మైలురాయిని చేరుకోవడానికి సిద్ధంగా ఉన్నాడు. ప్రస్తుతం ఇంగ్లండ్‌లో 49 టెస్టు వికెట్లతో ఉన్న బుమ్రా, మరో వికెట్ తీస్తే 50 వికెట్ల మార్కును అందుకున్న తొలి భారత బౌలర్‌గా చరిత్ర సృష్టిస్తాడు.

ఇంగ్లండ్‌తో జరుగుతున్న ప్రస్తుత ఐదు టెస్టుల సిరీస్‌లో బుమ్రా అద్భుతమైన ఫామ్‌లో ఉన్నాడు. రెండు టెస్టుల్లో 12 వికెట్లతో జట్టుకు కీలక విజయాలు అందించాడు. లార్డ్స్‌లో జరిగిన మూడో టెస్టులో అతని 5/74 ప్రదర్శన జట్టుకు ఎంతో బలాన్నిచ్చింది. ఈ ప్రదర్శనతోనే ఇంగ్లండ్ గడ్డపై అత్యధిక టెస్టు వికెట్లు తీసిన భారత బౌలర్‌గా ఇషాంత్ శర్మ (48 వికెట్లు) రికార్డును బుమ్రా అధిగమించాడు. గతంలో కపిల్ దేవ్ (43 వికెట్లు) కూడా ఈ జాబితాలో ప్రముఖ స్థానంలో ఉన్నారు.

జస్ప్రీత్ బుమ్రా తన టెస్టు కెరీర్‌ను 2018లో ఇంగ్లండ్ గడ్డపైనే ప్రారంభించాడు. అప్పటి నుంచి అతను తన అద్భుతమైన పేస్, స్వింగ్, ఖచ్చితత్వంతో ఇంగ్లీష్ బ్యాట్స్‌మెన్‌లను ఉక్కిరిబిక్కిరి చేస్తున్నాడు. అతని విభిన్నమైన యాక్షన్, బంతిని రెండు వైపులా కదిలించే సామర్థ్యం అతడిని ప్రపంచంలోనే అత్యంత ప్రమాదకరమైన బౌలర్‌గా నిలబెట్టింది.

ఇవి కూడా చదవండి

IND vs ENG 4th Test: కరుణ్ నాయర్ ఔట్.. గిల్ బెస్ట్ ఫ్రెండ్ ఇన్..

ప్రపంచ రికార్డ్ బ్రేక్ చేసిన వైభవ్.. ఇంగ్లండ్‌లో ఇదెక్కడి అరాచకం

4వ టెస్ట్ నుంచి ముగ్గురు ఔట్.. రిటైర్మెంట్ దిశగా కరుణ్ నాయర్?

6,6,6,6,6,6,6.. క్రికెట్ హిస్టరీలోనే తొలిసారి..

ప్రస్తుతం సిరీస్‌లో భారత్ 1-2తో వెనుకబడి ఉంది. జులై 23 నుంచి మాంచెస్టర్‌లోని ఓల్డ్ ట్రాఫోర్డ్‌లో జరగనున్న నాలుగో టెస్టులో బుమ్రా ఆడతాడా లేదా అన్నది ఇంకా చర్చనీయాంశంగానే ఉంది. అతని వర్క్‌లోడ్ మేనేజ్‌మెంట్ గురించి టీమ్ మేనేజ్‌మెంట్ జాగ్రత్త పడుతోంది. అయితే, సిరీస్‌ను సమం చేయడానికి ఈ మ్యాచ్ గెలవడం భారత్‌కు అత్యవసరం కాబట్టి, బుమ్రా ఆడటానికి మొగ్గు చూపే అవకాశం ఉంది.

ఒకవేళ బుమ్రా మాంచెస్టర్ టెస్టులో ఆడితే, అతను కేవలం ఒక వికెట్ తీస్తే చాలు, ఇంగ్లండ్ గడ్డపై 50 టెస్టు వికెట్లు పడగొట్టిన తొలి భారత బౌలర్‌గా రికార్డు పుస్తకాల్లో తన పేరును సువర్ణాక్షరాలతో లిఖించుకుంటాడు. ఇది అతని అద్భుతమైన ప్రతిభకు, నిలకడకు, భారత టెస్టు క్రికెట్‌కు అతను చేసిన అమూల్యమైన సేవకు నిదర్శనం. ఈ చారిత్రక ఘట్టం కోసం భారత క్రికెట్ అభిమానులు ఆతృతగా ఎదురుచూస్తున్నారు.