IPL 2026 Points Table : అట్టడుగు స్థానం నుంచి పైకి లేచిన చెన్నై.. టాప్‌లో రాజస్థాన్ రాయల్స్ హవా

IPL 2026 Points Table : ఐపీఎల్ 2026 (IPL 2026) రసవత్తరంగా సాగుతోంది. శనివారం జరిగిన డబుల్ హెడర్ మ్యాచులతో పాయింట్ల పట్టిక ఒక్కసారిగా తలకిందులైంది. వరుస ఓటములతో సతమతమవుతున్న చెన్నై సూపర్ కింగ్స్ (CSK) ఎట్టకేలకు గెలుపు రుచి చూడగా, పంజాబ్ కింగ్స్ తన జైత్రయాత్రను కొనసాగిస్తోంది. 17 మ్యాచ్‌లు ముగిసే సమయానికి ఏ టీమ్ ఎక్కడ ఉంది? ప్లేఆఫ్స్ రేసులో దూసుకుపోతున్న జట్లు ఏవి? అనే పూర్తి వివరాలు తెలుసుకుందాం.

ఐపీఎల్ 19వ సీజన్‌లో శనివారం రెండు కీలక మ్యాచ్‌లు జరిగాయి. మొదటి మ్యాచ్‌లో పంజాబ్ కింగ్స్, సన్‌రైజర్స్ హైదరాబాద్‌పై 6 వికెట్ల తేడాతో ఘనవిజయం సాధించింది. 220 పరుగుల భారీ లక్ష్యాన్ని శ్రేయస్ అయ్యర్ (33 బంతుల్లో 69 నాటౌట్) కేవలం ఆటలాగా చేధించేశాడు. ఇక రెండో మ్యాచ్‌లో చెన్నై సూపర్ కింగ్స్ 23 పరుగుల తేడాతో ఢిల్లీ క్యాపిటల్స్‌ను చిత్తు చేసింది. సంజు శామ్సన్ (115 నాటౌట్) సెంచరీతో చెలరేగగా, జేమీ ఓవర్టన్ 4 వికెట్లతో ఢిల్లీ నడ్డి విరిచాడు. ఈ విజయంతో చెన్నై ఈ సీజన్‌లో మొదటిసారి పాయింట్ల ఖాతా తెరిచింది.

ప్రస్తుతం పాయింట్ల పట్టికలో రాజస్థాన్ రాయల్స్ అగ్రస్థానంలో కొనసాగుతోంది. ఆడిన 4 మ్యాచ్‌ల్లోనూ గెలిచి 8 పాయింట్లతో పాటు +2.055 నెట్ రన్ రేట్‌తో తిరుగులేని శక్తిగా ఉంది. ఇక శనివారం గెలిచిన పంజాబ్ కింగ్స్ 7 పాయింట్లతో రెండో స్థానంలో ఉంది. పంజాబ్ ఇప్పటివరకు ఒక్క మ్యాచ్ కూడా ఓడిపోకపోవడం గమనార్హం. రాయల్ ఛాలెంజర్స్ బెంగళూరు (RCB) 4 పాయింట్లతో మూడో స్థానంలో ఉండగా, వరుసగా రెండు మ్యాచ్‌లు ఓడినా మెరుగైన రన్ రేట్ కారణంగా ఢిల్లీ క్యాపిటల్స్ 4 పాయింట్లతో నాలుగో స్థానంలో కొనసాగుతోంది.

లక్నో సూపర్ జెయింట్స్ (LSG) 3 మ్యాచ్‌ల్లో 2 విజయాలతో ఐదో స్థానంలో ఉంది. ఈరోజు జరగబోయే మ్యాచ్‌లో గెలిస్తే లక్నో టాప్-4 లోకి వచ్చే అవకాశం ఉంది. సన్‌రైజర్స్ హైదరాబాద్ 4 మ్యాచ్‌ల్లో 3 ఓటములతో ఆరో స్థానానికి పడిపోయింది. గుజరాత్ టైటాన్స్ 2 పాయింట్లతో ఏడో స్థానంలో, ముంబై ఇండియన్స్ కేవలం ఒకే ఒక విజయంతో ఎనిమిదో స్థానంలో నిలిచాయి. ముంబై, గుజరాత్ జట్లు తమ ప్లేఆఫ్స్ అవకాశాలను మెరుగుపరుచుకోవాలంటే రానున్న మ్యాచ్‌ల్లో ఖచ్చితంగా గెలవాల్సిన పరిస్థితి ఉంది.

వరుసగా మూడు మ్యాచ్‌లు ఓడిపోయి పట్టికలో ఆఖరి స్థానంలో ఉన్న చెన్నై సూపర్ కింగ్స్, శనివారం సాధించిన విజయంతో ఒక్క మెట్టు పైకి ఎగబాకింది. 2 పాయింట్లతో సిఎస్‌కె ఇప్పుడు 9వ స్థానానికి చేరుకుంది. ఇదే సమయంలో ఒక్క మ్యాచ్ కూడా గెలవని కోల్‌కతా నైట్ రైడర్స్ (KKR) 10వ స్థానానికి (చివరి స్థానం) పడిపోయింది. కేకేఆర్ ఆడిన 4 మ్యాచ్‌ల్లో కేవలం ఒక్క పాయింట్ మాత్రమే సాధించి నెట్ రన్ రేట్ లో కూడా వెనుకబడి ఉంది. సీజన్ సగం ముగియకముందే కేకేఆర్ తన వ్యూహాలను మార్చుకోవాల్సిన అవసరం ఎంతైనా ఉంది.

మరిన్ని క్రీడా వార్తల కోసం ఇక్కడ క్లిక్ చేయండి..