IPL 2026: తొలి బంతికే ఔట్.. చెత్త రికార్డులో చేరిన కోహ్లీ ఫ్రెండ్..!
ఇండియన్ ప్రీమియర్ లీగ్ 2026 సీజన్లో రాయల్ ఛాలెంజర్స్ బెంగళూరు ఓపెనర్ ఫిలిప్ సాల్ట్ ఒక అవాంఛనీయ రికార్డును తన ఖాతాలో వేసుకున్నాడు. రాజస్థాన్ రాయల్స్తో జరిగిన కీలక పోరులో ఎదుర్కొన్న మొదటి బంతికే పెవిలియన్ చేరి అభిమానులను నిరాశకు గురిచేశాడు. ఈ క్రమంలో లీగ్ చరిత్రలో అత్యధిక సార్లు తొలి బంతికే అవుటైన ఆటగాళ్ల జాబితాలో ఆయన చేరాడు.
Updated on: Apr 10, 2026 | 10:12 PM
అస్సాంలోని బర్సాపరా క్రికెట్ స్టేడియంలో రాజస్థాన్ రాయల్స్ వర్సెస్ రాయల్ ఛాలెంజర్స్ బెంగళూరు మధ్య జరిగిన ఈ మ్యాచ్కు వర్షం కారణంగా రెండుసార్లు ఆటంకం కలిగింది. దీంతో టాస్ ఆలస్యమై రాత్రి 8:15 గంటలకు ఆట ప్రారంభమైంది. టాస్ గెలిచిన రాజస్థాన్ రాయల్స్ ముందుగా బౌలింగ్ ఎంచుకుంది. బెంగళూరు తరపున ఇన్నింగ్స్ ప్రారంభించిన ఫిలిప్ సాల్ట్, జోఫ్రా ఆర్చర్ వేసిన మొదటి బంతికే వికెట్ కీపర్ ధృవ్ జురెల్కు క్యాచ్ ఇచ్చి అవుటయ్యాడు. ఆర్చర్ సంధించిన అద్భుతమైన బంతికి సమాధానం లేక సాల్ట్ డకౌట్గా వెనుదిరిగాడు.
అవాంఛనీయ రికార్డుల జాబితాలో సాల్ట్..
ఐపీఎల్ చరిత్రలో ఇన్నింగ్స్ మొదటి బంతికే అత్యధిక సార్లు అవుటైన ఆటగాళ్లలో సాల్ట్ ఒకరిగా నిలిచాడు. ఇప్పటివరకు ఆయన మూడు సార్లు ఎదుర్కొన్న తొలి బంతికే వికెట్ సమర్పించుకున్నాడు. ఈ జాబితాలో మాజీ ఆటగాడు పార్థివ్ పటేల్ నాలుగు సార్లతో అగ్రస్థానంలో ఉండగా, సాల్ట్ ఇప్పుడు డ్వేన్ స్మిత్, పృథ్వీ షా మరియు కె.ఎల్. రాహుల్ వంటి ఆటగాళ్ల సరసన చేరాడు.
ఇన్నింగ్స్ తొలి బంతికే అవుటైన బ్యాటర్లు:
పార్థివ్ పటేల్ – 4 సార్లు
డ్వేన్ స్మిత్ – 3 సార్లు
పృథ్వీ షా – 3 సార్లు
కె.ఎల్. రాహుల్ – 3 సార్లు
ఫిలిప్ సాల్ట్ – 3 సార్లు
బౌలింగ్లో జోఫ్రా ఆర్చర్ రికార్డు..
మరోవైపు, వికెట్ తీసిన జోఫ్రా ఆర్చర్ కూడా ఒక అరుదైన ఘనతను సాధించాడు. ఐపీఎల్ ఇన్నింగ్స్లో మొదటి బంతికే వికెట్ తీసిన బౌలర్ల జాబితాలో ఆయన చోటు సంపాదించుకున్నాడు. ఆర్చర్ ఇప్పటివరకు మూడు సార్లు ఈ ఘనత సాధించాడు. ఈ జాబితాలో భారత పేసర్ మహమ్మద్ షమీ ఐదు సార్లతో అగ్రస్థానంలో కొనసాగుతున్నాడు. ప్రవీణ్ కుమార్, ఉమేష్ యాదవ్, ట్రెంట్ బౌల్ట్, లసిత్ మలింగ వంటి దిగ్గజ బౌలర్లు కూడా ఇదే వరుసలో ఉన్నారు.
