IND Vs AUS: ఆసీస్‌తో తొలి వన్డే.. టీమిండియాకు ఆ ఇద్దరే కీలకం.. ఇక భయం మొదలైందిగా..

టెస్టు సిరీస్‌లో ఆస్ట్రేలియాను 2-1 తేడాతో ఓడించిన టీమిండియా ఇప్పుడు వన్డే సిరీస్‌ను కైవసం చేసుకోవడమే తదుపరి లక్ష్యంగా పెట్టుకుంది. మూడు మ్యాచ్‌ల ఈ సిరీస్ మార్చి 17 నుంచి ప్రారంభమవుతుంది. ఇప్పటికే ఇరు జట్లు ప్రాక్టిస్ సెక్షన్లు మొదలు పెట్టేశాయి. ముంబైలోని వాంఖడే స్టేడియంలో తొలి మ్యాచ్ జరగనుంది. టెస్టు సిరీస్‌లో ఆడిన టీమిండియా ఆటగాళ్లు సరాసరి వన్డే జట్టు ప్లేయింగ్ 11లోకి వచ్చేశారు. టీమిండియాలో ఈ ఇద్దరు ప్లేయర్స్.. మొదటి వన్డేలో కీలకం కానున్నారు. అందులో ఒకరు డబుల్ సెంచరీ హీరో. వారెవరో కాదు.. మహమ్మద్ సిరాజ్, శుభ్‌మాన్ గిల్.. ఈ ఇద్దరూ అద్భుతమైన ప్రదర్శన కనబరుస్తున్నారు. వీరే ఆస్ట్రేలియాకు పెద్ద ముప్పు. ఈ ఇరువురూ ఇప్పటివరకు 21 వన్డేలు ఆడారు.

అహ్మదాబాద్ టెస్టులో అద్భుత సెంచరీ సాధించిన శుభ్‌మాన్ గిల్ వన్డే ఫార్మాట్‌లో మరింత ప్రమాదకరం. ఈ ఆటగాడు కేవలం 21 వన్డేల్లో 1254 పరుగులు చేశాడు. గిల్ వన్డే సగటు 73 కంటే ఎక్కువ. అదే సమయంలో, అతడి స్ట్రైక్ రేట్ కూడా 109.80గా ఉంది. గిల్ గత 7 మ్యాచ్‌లను పరిశీలిస్తే.. 96.66 సగటుతో 580 పరుగులు చేశాడు. ఈ సమయంలో అతడి స్ట్రైక్ రేట్ 123.14. అలాగే ఒక డబుల్ సెంచరీ, శతకాన్ని తన ఖాతాలో వేసుకున్నాడు.

అటు ODI ఫార్మాట్‌లో మహ్మద్ సిరాజ్ ప్రస్తుతం ప్రపంచంలోనే నెంబర్ వన్ బౌలర్.. 21 మ్యాచ్‌లలో 38 వికెట్లు పడగొట్టాడు. గత 8 మ్యాచ్‌ల్లో సిరాజ్ గణాంకాలు మరింత ప్రమాదకరం. ఈ సమయంలో ఏకంగా 20 వికెట్లు తీశాడు. భారత పిచ్‌లపై ఫాస్ట్ బౌలర్లకు పెద్దగా సహాకారం లభించదు, కానీ ఈ ఆటగాడు పవర్‌ప్లేలోనే కాకుండా మిడిల్ ఓవర్లు, డెత్ ఓవర్లలో కూడా అద్భుతంగా బౌలింగ్ చేస్తాడు.