IND vs NZ: 2020 సీన్ రిపీట్.. వరుసగా రెండోసారి వైట్ వాష్.. వన్డే సిరీస్ ఓడిన భారత్..
IND VS NZ Match Report: భారత్ వర్సెస్ న్యూజిలాండ్ మధ్య జరగుతోన్న మూడో వన్డే వర్షం కారణంగా రద్దైంది. దీంతో ఆతిథ్య జట్టు 1-0తో సిరీస్‌ను గెలుచుకుంది.
Updated on: Nov 30, 2022 | 3:06 PM
టీ20 సిరీస్‌ను కోల్పోయిన న్యూజిలాండ్ వన్డే సిరీస్‌ను కైవసం చేసుకుంది. కేన్ విలియమ్సన్ కెప్టెన్సీలో కివీస్ జట్టు వన్డే సిరీస్‌ను 1-0తో కైవసం చేసుకుంది. వన్డే సిరీస్‌లోని రెండు మ్యాచ్‌లు వర్షం కారణంగా రద్దవగా, తొలి మ్యాచ్‌లో భారత్ ఓటమిని చవిచూడాల్సి వచ్చింది. మూడో వన్డేలోనూ టీమిండియా ఓటమి అంచున ఉండగా వర్షం కారణంగా వాయిదా పడింది. భారత్ 219 పరుగులు మాత్రమే చేయగలిగింది. సమాధానంగా న్యూజిలాండ్ జట్టు 18 ఓవర్లలో ఒక వికెట్ కోల్పోయి 104 పరుగులు చేసింది. అప్పుడు క్రైస్ట్‌చర్చ్‌లో వర్షం కురిసింది. డక్‌వర్త్-లూయిస్ నియమం ప్రకారం, మ్యాచ్ ఫలితం రాలేదు. ఎందుకంటే వన్డే క్రికెట్‌లో, మ్యాచ్ ఆగిపోయే ముందు కనీసం 20 ఓవర్లు ఆడాల్సి ఉంటుంది.
క్రైస్ట్‌చర్చ్‌లో భారత్ బ్యాటింగ్‌లో దారుణంగా విఫలమైంది. వాషింగ్టన్ సుందర్, శ్రేయాస్ అయ్యర్ మాత్రమే వికెట్‌పై నిలబడ్డారు. సుందర్ 51, శ్రేయాస్ అయ్యర్ 49 పరుగులు చేశారు. వీరితో పాటు కెప్టెన్ ధావన్ 28, శుభ్‌మన్ గిల్ 13, రిషబ్ పంత్ 10 పరుగులు మాత్రమే చేయగలిగారు. 6 పరుగులు మాత్రమే చేసి సూర్యకుమార్ యాదవ్ ఔటయ్యాడు. దీపక్ హుడా 12 పరుగులు చేశాడు.
న్యూజిలాండ్ అద్భుత ప్రదర్శన..
వర్షం ప్రభావంతో జరిగిన ఈ మ్యాచ్‌లో న్యూజిలాండ్ ఓపెనర్ ఫిన్ అలెన్ అద్భుత హాఫ్ సెంచరీ చేశాడు. 54 బంతుల్లో 57 పరుగులు చేశాడు. డెవాన్ కాన్వే 38 పరుగులు చేసి నాటౌట్‌గా నిలిచాడు. భారత్ తరపున ఉమ్రాన్ మాలిక్ ఏకైక వికెట్ తీశాడు. న్యూజిలాండ్ బౌలర్లలో డారిల్ మిచెల్ 3 వికెట్లు పడగొట్టాడు. అదే సమయంలో ఆడమ్ మిల్నే మూడు వికెట్లు పడగొట్టాడు. టిమ్ సౌథీ రెండు వికెట్లు తీశాడు. లాకీ ఫెర్గూసన్, సాంట్నర్ తలో ఒక వికెట్ తీశాడు.
వరుసగా రెండో వన్డే సిరీస్‌ను కోల్పోయిన భారత్..
న్యూజిలాండ్‌లో భారత జట్టు వరుసగా రెండో వన్డే సిరీస్‌ను కోల్పోయింది. 2020లో కూడా టీ20 సిరీస్‌ని కైవసం చేసుకున్న టీమ్‌ఇండియా వన్డే సిరీస్‌లో 0-3 తేడాతో ఘోర పరాజయాన్ని చవిచూసింది. ఈసారి కూడా టీ20 సిరీస్‌ను కైవసం చేసుకున్న భారత్ వన్డే సిరీస్‌ను చేజార్చుకుంది.
మరిన్ని క్రీడా వార్తల కోసం ఇక్కడ క్లిక్ చేయండి..
