Delhi Capitals: ఢిల్లీకి ఘోర పరాభవం.. ఐపీఎల్ చరిత్రలోనే చెత్త రికార్డు..!

Lowest Powerplay Score in IPL: టాస్ గెలిచిన బెంగళూరు కెప్టెన్ రజత్ పాటిదార్ ముందుగా బౌలింగ్ ఎంచుకోగా, ఢిల్లీకి ఆదిలోనే గట్టి షాక్ తగిలింది. అరంగేట్రం చేసిన యువ ఆటగాడు సాహిల్ పరాఖ్ మ్యాచ్ రెండో బంతికే వెనుదిరిగాడు. ఆ తర్వాత వచ్చిన కేఎల్ రాహుల్, సమీర్ రిజ్వీలు జోష్ హేజిల్‌వుడ్ వేసిన వరుస బంతుల్లో అవుట్ కావడంతో స్టేడియం ఒక్కసారిగా నిశ్శబ్దమైపోయింది. క్రమశిక్షణతో కూడిన బెంగళూరు బౌలింగ్ ముందు ఢిల్లీ ఆటగాళ్లు కనీసం పోరాట పటిమను కూడా ప్రదర్శించలేకపోయారు.

పేకమేడలా కూలిన బ్యాటింగ్..

ఢిల్లీ కష్టాలు అక్కడితో తీరలేదు. స్టార్ ఆటగాడు ట్రిస్టన్ స్టబ్స్, కెప్టెన్ అక్షర్ పటేల్ కూడా స్వల్ప స్కోరుకే పెవిలియన్ చేరారు. కేవలం ఏడు పరుగులకే ఐదు వికెట్లు కోల్పోయిన స్థితిలో నితీష్ రాణా క్రీజులోకి వచ్చినప్పటికీ, అతను కూడా ఎనిమిది పరుగుల వద్ద ఆరో వికెట్‌గా వెనుదిరిగాడు. బెంగళూరు బౌలర్లు భువనేశ్వర్ కుమార్, జోష్ హేజిల్‌వుడ్ తమ స్వింగ్, బౌన్స్‌తో ప్రత్యర్థి బ్యాటర్లకు అస్సలు అవకాశం ఇవ్వలేదు.

చరిత్రలో అత్యల్ప పవర్ ప్లే స్కోరు..

మొదటి ఆరు ఓవర్లు ముగిసేసరికి ఢిల్లీ క్యాపిటల్స్ 6 వికెట్ల నష్టానికి కేవలం 13 పరుగులు మాత్రమే చేసింది. ఐపీఎల్ పద్దెనిమిదేళ్ల చరిత్రలో ఒక జట్టు పవర్ ప్లేలో సాధించిన అత్యల్ప స్కోరు ఇదే కావడం గమనార్హం. గతంలో 2022లో సన్‌రైజర్స్ హైదరాబాద్ జట్టు రాజస్థాన్‌పై చేసిన పద్నాలుగు పరుగుల రికార్డును నేడు ఢిల్లీ అధిగమించి ఈ అపఖ్యాతిని తన ఖాతాలో వేసుకుంది.

ఐపీఎల్ చరిత్రలో అత్యల్ప పవర్ ప్లే స్కోర్లు (6 ఓవర్లు):

13/6 – ఢిల్లీ క్యాపిటల్స్ vs బెంగళూరు, ఢిల్లీ, 2026*

14/3 – హైదరాబాద్ vs రాజస్థాన్, పూణే, 2022

14/2 – రాజస్థాన్ vs బెంగళూరు, కేప్ టౌన్, 2009

15/2 – చెన్నై vs కోల్‌కతా, కోల్‌కతా, 2011

16/1 – చెన్నై vs ఢిల్లీ, రాయ్‌పూర్, 2015

ఈ ఓటమి ఢిల్లీ క్యాపిటల్స్ ఆత్మవిశ్వాసాన్ని దెబ్బతీయడమే కాకుండా, వారి ప్లేఆఫ్ అవకాశాలపై కూడా ప్రభావం చూపే అవకాశం ఉంది. బెంగళూరు బౌలర్ల ఖచ్చితమైన వ్యూహాలు ఢిల్లీ సొంత మైదానంలోనే వారిని కోలుకోలేని దెబ్బ తీశాయి.