Champions Trophy 2025: పాక్ మొండి వైఖరి.. షెడ్యూల్ తేదీలు ప్రతిపాదన.. ఆ స్టేడియంలోనే అన్ని మ్యాచులు..

ఛాంపియన్స్ ట్రోఫీ 2025లో మొత్తం 8 జట్లు పోటీపడతాయి. ఈ జట్లను రెండు గ్రూపులుగా విభజించి తొలి రౌండ్‌లో ఆయా గ్రూపుల్లోని జట్ల మధ్య మ్యాచ్‌లు జరుగుతాయి. ఇక్కడ భారత్ పాకిస్థాన్ జట్లు ఒకే గ్రూప్‌లో ఉన్నాయి. రెండు జట్లు మొదటి రౌండ్‌లో ఒకదానితో ఒకటి తలపడతాయి.

Champions Trophy 2025 Proposed Dates Schedule For India Matches

Velpula Bharath Rao |

Updated on: Nov 21, 2024 | 10:18 AM

ఎంతో ఆసక్తిగా ఎదురుచూస్తున్న ఛాంపియన్స్ ట్రోఫీ 2025 ఫిబ్రవరి 19 నుండి ప్రారంభమవుతుంది. చివరి మ్యాచ్ మార్చి 9న జరగనుంది. ఈ తేదీ తర్వాత, టీమిండియా మ్యాచ్‌ల ముసాయిదా షెడ్యూల్ కూడా విడుదలైంది. ఈ షెడ్యూల్ ప్రకారం ఫిబ్రవరి 20 నుంచి భారత జట్టు ఛాంపియన్స్ ట్రోఫీ పోరు ప్రారంభం కానుంది. గ్రూప్-ఎలో బరిలోకి దిగిన టీమిండియా తన తొలి మ్యాచ్‌లో బంగ్లాదేశ్‌తో, రెండో మ్యాచ్‌లో న్యూజిలాండ్‌తో తలపడనుంది. అలాగే మూడో మ్యాచ్‌లో పాకిస్థాన్ జట్టుతో తలపడనుంది. టీమ్ ఇండియా ముసాయిదా షెడ్యూల్ ఇలా ఉంది…

ఫిబ్రవరి 20, 2025: భారత్ Vs బంగ్లాదేశ్
ఫిబ్రవరి 23, 2025: భారత్ Vs న్యూజిలాండ్
మార్చి 1, 2025: భారత్ Vs పాకిస్థాన్

మ్యాచ్‌లు ఎక్కడ జరుగుతాయి?

ఈసారి ఛాంపియన్స్ ట్రోఫీ పాకిస్థాన్‌లో జరగనుంది. అలాగే ఈ టోర్నీ కోసం పాకిస్థాన్ క్రికెట్ బోర్డు మూడు స్టేడియాలను ఖరారు చేసింది. కరాచీ, లాహోర్, రావల్పిండిలో మ్యాచ్‌లు జరుగుతాయి. లాహోర్‌లోని గడ్డాఫీ స్టేడియంలో టీమిండియా మ్యాచ్‌లు జరగనున్నాయి. భారత జట్టు తొలి రౌండ్‌లో లాహోర్‌లోనే అన్ని మ్యాచ్‌లను ఆడుతుందని సమాచారం.లాహోర్ నగరం భారత సరిహద్దుకు దగ్గరగా ఉంది. దీంతో ఈ మ్యాచ్లో టీమిండియా అభిమానులు ఎలాంటి ఇబ్బంది లేకుండా ఈజీగా పాల్గొనవచ్చు. టీమ్ ఇండియా అభిమానుల సౌకర్యార్థం భారత్ మ్యాచ్‌ను ఒకే స్టేడియంలో నిర్వహించాలని పాకిస్థాన్ క్రికెట్ బోర్డు నిర్ణయించింది.

ఇది చదవండి: అయ్యో పాపం! నొప్పితో గ్రౌండ్‌లో విలవిలలాడిన అంపైర్‌.. అసలు ఏం జరిగిందంటే?

భారత జట్టు పాకిస్థాన్ వెళ్తుందా?

పాకిస్థాన్‌లో ఛాంపియన్స్ ట్రోఫీ ఆడేందుకు బీసీసీఐ నిరాకరించింది. అయితే ముసాయిదా షెడ్యూల్‌తో పాక్ క్రికెట్ బోర్డు భారత్ మ్యాచ్‌లకు వేదికను ఖరారు చేయడం అతి ఉత్సవంగా కనిపిస్తుంది. కానీ హైబ్రిడ్ మోడల్‌లో టోర్నీ నిర్వహిస్తేనే భారత జట్టు పాల్గొంటుందని బీసీసీఐ స్పష్టం చేసింది. అయితే ఈ టోర్నీని హైబ్రిడ్ ఫార్మాట్‌లో నిర్వహించబోమని పీసీబీ తెలిపింది. ఇప్పుడు ఐసీసీ పాకిస్తాన్ క్రికెట్ బోర్డుతో చర్చలు జరుపుతోంది. ఎలాగైనా ఐసీసీని పీసీబీ ఒప్పించే ప్రయత్నం చేస్తోంది.