ఒక్క క్యాచ్ పట్టలే.. వికెట్ కూడా తీయలే.. కనీసం ఒక్క పరుగు కూడా తీయలే.. కట్‌చేస్తే.. మ్యాన్ ఆఫ్ ది మ్యాచ్ అవార్డ్

క్రికెట్ ఆటలో ‘మ్యాన్ ఆఫ్ ది మ్యాచ్’ అవార్డు అనేది ఓ గౌరవం. సాధారణంగా, ఈ అవార్డు బ్యాటింగ్‌లో సెంచరీ చేసిన ఆటగాడికి, లేదా బౌలింగ్‌లో ఐదు లేదా అంతకంటే ఎక్కువ వికెట్లు తీసిన బౌలర్‌కు లేదా అద్భుతమైన క్యాచ్‌లు పట్టి మ్యాచ్‌ను మలుపు తిప్పిన ఫీల్డర్‌కు దక్కుతుంది. కానీ, ఆస్ట్రేలియాకు చెందిన మాజీ బౌలర్ నాథన్ బ్రాకెన్, పరుగులు చేయకుండా, వికెట్లు తీయకుండా, క్యాచ్‌లు పట్టుకోకుండానే ‘మ్యాన్ ఆఫ్ ది మ్యాచ్’ అవార్డును గెలుచుకుని క్రికెట్ చరిత్రలో ఒక అరుదైన రికార్డును సృష్టించాడు.

మ్యాచ్ వివరాలు..

2010లో ఆస్ట్రేలియా వర్సెస్ న్యూజిలాండ్ మధ్య సిడ్నీలో జరిగిన ఒక టీ20 మ్యాచ్‌లో ఈ అద్భుతమైన సంఘటన చోటు చేసుకుంది. ఈ మ్యాచ్‌లో ముందుగా బ్యాటింగ్ చేసిన ఆస్ట్రేలియా జట్టు నిర్ణీత 20 ఓవర్లలో 150 పరుగులు చేసింది. 151 పరుగుల లక్ష్యంతో బరిలోకి దిగిన న్యూజిలాండ్ జట్టు ఆఖరి వరకు పోరాడి 149 పరుగులు మాత్రమే చేసి ఒకే ఒక పరుగు తేడాతో ఓడిపోయింది.

బ్రాకెన్ ప్రదర్శన..

ఈ ఉత్కంఠభరితమైన మ్యాచ్‌లో ఆస్ట్రేలియా విజయం సాధించడంలో నాథన్ బ్రాకెన్ కీలక పాత్ర పోషించాడు. బ్యాటింగ్‌లో అతనికి అవకాశం రాలేదు. ఫీల్డింగ్‌లో క్యాచ్‌లు పట్టుకోలేదు. అయితే, అతని బౌలింగ్ ప్రదర్శన అత్యంత ప్రభావవంతంగా ఉంది. టీ20 లాంటి ఫార్మాట్‌లో బ్యాటర్లు బౌలర్లపై విరుచుకుపడి పరుగులు రాబట్టే సమయంలో, బ్రాకెన్ తన నాలుగు ఓవర్లలో ఒక మెయిడెన్ ఓవర్ వేసి కేవలం 16 పరుగులు మాత్రమే ఇచ్చాడు. ముఖ్యంగా న్యూజిలాండ్ జట్టు చివరి ఓవర్‌లో గెలవడానికి 14 పరుగులు చేయాల్సిన పరిస్థితుల్లో, బ్రాకెన్ తన అనుభవాన్ని, నైపుణ్యాన్ని ఉపయోగించి కేవలం 12 పరుగులు మాత్రమే ఇచ్చాడు. అతని కట్టుదిట్టమైన బౌలింగ్ కారణంగానే ఆస్ట్రేలియా జట్టు ఒక పరుగు తేడాతో విజయం సాధించగలిగింది.

ఎందుకు మ్యాన్ ఆఫ్ ది మ్యాచ్?

సాధారణంగా గణాంకాల ఆధారంగా మ్యాన్ ఆఫ్ ది మ్యాచ్ అవార్డును ఎంపిక చేస్తారు. కానీ ఈ మ్యాచ్‌లో, బ్రాకెన్ గణాంకాల కంటే అతని ప్రదర్శన ప్రభావం ఎక్కువగా ఉంది. వికెట్లు తీయకపోయినా, అతి తక్కువ పరుగులు ఇచ్చి ప్రత్యర్థిని కట్టడి చేయడంలో బ్రాకెన్ చూపిన చాకచక్యం మ్యాచ్ గతిని మార్చేసింది. అందుకే, గణాంకాల కంటే మ్యాచ్‌లో అతని ప్రభావాన్ని గుర్తించి, బ్రాకెన్‌కు ఈ అరుదైన ‘మ్యాన్ ఆఫ్ ది మ్యాచ్’ అవార్డును ప్రదానం చేశారు.

ఈ సంఘటన క్రికెట్ చరిత్రలో ఒక అపురూప ఘట్టంగా నిలిచిపోయింది. ఒక ఆటగాడికి కేవలం పరుగులు, వికెట్లు లేదా క్యాచ్‌ల ఆధారంగానే కాకుండా, అతని ప్రభావవంతమైన ప్రదర్శనకు కూడా ‘మ్యాన్ ఆఫ్ ది మ్యాచ్’ అవార్డు దక్కుతుందని నాథన్ బ్రాకెన్ నిరూపించాడు.