దేశంలో గత్తర లేపుతా.. జాతీయ పార్టీ స్థాపించి తీరతా : కేసీఆర్

• నేనే ఆ పొలికేక పెడతా

మిర్యాలగూడః నల్గొండ జిల్లా మిర్యాలగూడలో ఎన్నికల ప్రచారం సందర్భంగా నిర్వహించిన బహిరంగ సభలో తెలంగాణ సీఎం కేసీఆర్ ప్రసంగించారు. ఈ సందర్భంగా ఆయన మాట్లాడుతూ దేశంలో గత్తర లేపుతా, జాతీయ పార్టీ స్థాపించి తీరుతా అని ఆవేశంగా ప్రకటించారు. దేశం కోసం ఎవరో ఒకరు పొలికేక పెట్టాలి. మీ ఆశీస్సులు ఉంటే మీ బిడ్డగా నేనే ఆ పొలికేక పెట్టడానికి సిద్ధంగా ఉన్నాను. అది జరగాలంటే 16కి 16 ఎంపీ స్థానాలు మనం గెలవాలని కేసీఆర్ అన్నారు.

ఈ దేశం మారాలి. 2000 ఏడాదిలో నేను బయలుదేరిననాడు తెలంగాణ ఎక్కడ తెస్తవ్? నీవల్ల ఏమైతదని నవ్విండ్రు. నేను మీకు ప్రమాణం చేసి చెప్తావున్నా.. ఈ దేశంలో గుణాత్మకమైన మార్పు తేవడానికి భగవంతుడు నాకిచ్చిన సర్వ శక్తులూ ఒడ్డుతా.. దేశంలో గత్తర లేపుతా.. అవసరమైతే జాతీయ పార్టీ కూడా స్థాపిస్తా అంటూ కేసీఆర్ ఆవేశంగా ప్రసంగించారు.

ఎలక్షన్ అయిన తర్వాత పరిణామాలన్నీ సమీక్ష చేసి, ప్రాంతీయ పార్టీలు అన్నింటినీ కలుపుకుని జాతీయ పార్టీ స్థాపిస్తా. హైదరాబాద్ సిటీలో సగం మాత్రమే ఉండే సింగపూర్ దేశానికి 193 కిలోమీటర్ల సముద్ర తీరమే ఉంది. కానీ వాళ్లు డీల్ చేసే కంటైనర్లు మూడు కోట్ల 70 లక్షలు. భారత దేశంలో 7,500 కిలోమీటర్ల సముద్ర తీరం ఉన్నప్పటికీ మనం డీల్ చేసే కంటైనర్లు 75 నుంచి 80 లక్షలు. అక్కడ అలా ఉంది, ఇక్కడ ఇలా ఉందనుకుంటూ పెదవులు చప్పరించుడే మన పని కాకూడదు. మీ ఆశీస్సులతో దేశంలో గుణాత్మకమైన మార్పు కోసం పొలి కేక పెట్టేందుకు సిద్ధమని కేసీఆర్ చెప్పారు.