తెలంగాణలో ప్రారంభమైన నామినేషన్ల ప్రక్రియ.. నేటి నుంచి ఐదు రోజుల పాటు పోస్టల్ బ్యాలెట్ దరఖాస్తుల స్వీకరణ
తెలంగాణలో పట్టభద్రుల ఎమ్మెల్సీ ఎన్నికలకు నోటిఫికేషన్ విడుదలైంది. మహబూబ్‌నగర్‌-రంగారెడ్డి-హైదరాబాద్ స్థానానికి రిట‌ర్నింగ్ అధికారి..
తెలంగాణలో పట్టభద్రుల ఎమ్మెల్సీ ఎన్నికలకు నోటిఫికేషన్ విడుదలైంది. మహబూబ్‌నగర్‌-రంగారెడ్డి-హైదరాబాద్ తో పాటు వరంగల్‌-ఖమ్మం-నల్గొండ పట్టభద్రుల ఎమ్మెల్సీ స్థానాలకు ఎన్నికల నోటిఫికేషన్ విడుదలైంది. మహబూబ్‌నగర్‌-రంగారెడ్డి-హైదరాబాద్ నియోజకవర్గానికి ఎన్నికల అధికారి, గ్రేటర్‌ హైదరాబాద్ మునిసిపల్‌ అదనపు కమిషనర్ ప్రియాంక అల నోటిఫికేషన్ విడుద‌ల చేశారు. అలాగే, వరంగల్‌-ఖమ్మం-నల్గొండ నియోజకవర్గానికి రంగారెడ్డి జిల్లా కలెక్టర్‌ నోటిఫికేషన్ జారీ చేశారు.
మహబూబ్‌నగర్‌-రంగారెడ్డి-హైదరాబాద్ స్థానానికి జీహెచ్‌ఎంసీ ప్రధాన కార్యాలయంలో నేటి నుంచి ఈ నెల 23వరకు నామినేషన్లను స్వీకరించనున్నారు. ఆ త‌ర్వాతి రోజే నామినేషన్లను పరిశీలించి అర్హుల జాబితాను ప్రకటిస్తారు. ఉపసంహరణకు 26వరకు తుది గడువు విధించారు. మార్చి 14న పోలింగ్, 17 ఓట్ల లెక్కింపు ఉంటుంది.
ఈ రెండు పట్టభద్రుల ఎమ్మెల్సీ స్థానాల నుంచి ప్రాతినిధ్యం వహిస్తున్న సభ్యుల పదవీకాలం ఈ ఏడాది మార్చి 29వ తేదీతో ముగుస్తుంది. ఈ ఎన్నికలకు ప్రధాన పార్టీలు ఇప్పటికే అభ్యర్థులను ప్రకటించాయి. కాంగ్రెస్ పార్టీ నుంచి వరంగల్‌-ఖమ్మం-నల్గొండ అభ్యర్థిగా రాములు నాయక్‌, మహబూబ్‌నగర్‌-రంగారెడ్డి-హైదరాబాద్ అభ్యర్థిగా చిన్నారెడ్డి పేర్ల‌ను ఖరారు చేసింది. వరంగల్‌-ఖమ్మం-నల్గొండ అభ్యర్థిగా టీఆర్‌ఎస్ నుంచి పల్లా రాజేశ్వర్‌రెడ్డి పోటీ చేయ‌నున్నారు. ఇదే స్థానం నుంచి టీజేఎస్ అధ్యక్షుడు కోదంరాం బరిలోకి దిగనున్నారు. మిగ‌తా పార్టీలూ త‌మ అభ్యర్థులను ఖరారు చేసే పనిలో పడ్డాయి
ఇక మహబూబ్‌నగర్‌-రంగారెడ్డి-హైదరాబాద్ అభ్యర్థిగా బీజేపీ నుంచి సిటింగ్‌ ఎమ్మెల్సీ ఎన్‌.రాంచందర్‌రావు మళ్లీ పోటీ చేస్తున్నారు. ఇదే స్థానం నుంచి స్వతంత్ర అభ్యర్థిగా మాజీ ఎమ్మెల్సీ కె.నాగేశ్వర్ పోటీ చేయ‌నున్నారు. ఆయ‌న‌కు వామపక్షాలు మద్దతు ఇస్తున్నాయి. టీడీపీ నుంచి ఆ పార్టీ రాష్ట్ర అధ్యక్షుడు రమణ పోటీలో నిలవ‌నున్నారు. ఈ స్థానంలో టీఆర్‌ఎస్ ఇంకా అభ్య‌ర్థిని ప్రకటించలేదు.
నేటి నుంచి పోస్టల్ బ్యాలెట్ దరఖాస్తుల అధికారులు స్వీక‌రిస్తున్నారు. వృద్ధులు, దివ్యాంగులు, కొవిడ్ బాధితుల‌కు పోస్టల్ బ్యాలెట్ సౌక‌ర్యం క‌ల్పించ‌నున్నారు. నేటి నుంచి 5 రోజుల పాటు పోస్టల్ బ్యాలెట్ ద‌ర‌ఖాస్తుల‌ను స్వీకరించనున్నారు.
Read more:
వైయస్‌ షర్మిల తెలంగాణ బిడ్డే.. రాష్ట్రం విడిపోయాక ఇక పంచాయతీ ఎందుకన్న మాజీ ఎమ్మెల్సీ మాగం రంగారెడ్డి
