నేవీలో హనీట్రాప్ కలకలం.. అధికారి అరెస్ట్! విశాఖ భద్రతా సమాచారాన్ని లీక్ చేశాడా?
సోషల్ మీడియా ద్వారా పాకిస్థాన్ మహిళా గూఢచారితో సంబంధాలు ఏర్పరచుకుని విశాఖపట్నం నౌకాదళ స్థావరానికి సంబంధించిన కీలక సమాచారాన్ని లీక్ చేశారనే ఆరోపణలపై నేవీ సిబ్బంది ప్రదీప్ ముఖర్జీని ఏపీ కౌంటర్ ఇంటెలిజెన్స్ పోలీసులు కోయంబత్తూరులో అరెస్టు చేసినట్లు సమాచారం. ఐఎన్ఎస్ అగ్రాని వద్ద జరిగిన ఈ అరెస్టు అనంతరం నిందితుడిని విజయవాడకు తరలించి దర్యాప్తు కొనసాగిస్తున్నారు. సమాచార లీకేజీ వెనుక ఆర్థిక ప్రయోజనాలున్నాయా? ఈ వ్యవహారంలో మరెవరైనా ఉన్నారా? అనే కోణాల్లో పోలీసులు విచారిస్తున్నారు..
Updated on: Oct 04, 2026 | 10:30 AM
కోయంబత్తూరు, అక్టోబర్ 4: సోషల్ మీడియా ద్వారా మహిళా గూఢచారులు భారత సైనిక, నౌకాదళ సిబ్బందిని లక్ష్యంగా చేసుకుంటున్నారనే ఆరోపణలు మరోసారి కలకలం రేపుతున్నాయి. విశాఖపట్నంలోని తూర్పు నౌకాదళ కమాండ్‌కు సంబంధించిన కీలక భద్రతా సమాచారాన్ని పాకిస్థాన్‌కు చెందిన మహిళా గూఢచారికి లీక్ చేశారనే ఆరోపణలపై ఓ నౌకాదళ సిబ్బందిని ఆంధ్రప్రదేశ్ పోలీసులు కోయంబత్తూరులో అరెస్టు చేసినట్లు సమాచారం. పశ్చిమ బెంగాల్‌కు చెందిన 31 ఏళ్ల ప్రదీప్ ముఖర్జీ విశాఖపట్నంలో ప్రధాన కార్యాలయం ఉన్న తూర్పు నౌకాదళ కమాండ్‌లో విధులు నిర్వహిస్తున్నట్లు పేర్కొంటున్నారు. కోయంబత్తూరులోని రెడ్‌ఫీల్డ్స్ ప్రాంతంలో ఉన్న ఐఎన్ఎస్ అగ్రానిలో నిర్వహిస్తున్న నిర్వహణ అభివృద్ధి కోర్సులో పాల్గొనేందుకు ఆయన అక్కడికి వెళ్లినట్లు సమాచారం. ఈ సమయంలోనే ఆయనపై గూఢచర్యానికి సంబంధించిన ఆరోపణలు తెరపైకి వచ్చినట్లు తెలుస్తోంది.
పాకిస్థాన్ మహిళా గూఢచారితో సోషల్ మీడియా ద్వారా పరిచయం?
సరిహద్దు గూఢచర్యం, ఉగ్రవాద ముప్పులు, జాతీయ భద్రతకు సంబంధించిన కేసులను దర్యాప్తు చేసే ఆంధ్రప్రదేశ్ పోలీసుల కౌంటర్ ఇంటెలిజెన్స్ (CI) స్పెషల్ సెల్కు నౌకాదళ సమాచార లీకేజీకి సంబంధించి సమాచారం అందినట్లు తెలుస్తోంది. దర్యాప్తులో భాగంగా ప్రదీప్ ముఖర్జీ సోషల్ మీడియా ద్వారా ఒక పాకిస్థానీ మహిళతో సంప్రదింపులు జరిపినట్లు అధికారులు గుర్తించినట్లు సమాచారం. ఆమె పాకిస్థాన్ గూఢచార సంస్థకు చెందిన వ్యక్తిగా పోలీసులు అనుమానిస్తున్నట్లు తెలుస్తోంది. విశాఖపట్నంలోని నౌకాదళ స్థావరానికి సంబంధించిన భద్రతా, వ్యూహాత్మక సమాచారాన్ని ఆమెతో పంచుకున్నారనే ఆరోపణలు నిందితుడిపై ఉన్నాయి.
నేవీ అధికారుల అనుమతితో చర్యలు?
ఈ ఆరోపణల నేపథ్యంలో ప్రదీప్ ముఖర్జీని అదుపులోకి తీసుకునేందుకు ఆంధ్రప్రదేశ్ సీఐ అధికారులు నౌకాదళ ఉన్నతాధికారులతో సమన్వయం చేసినట్లు సమాచారం. అనంతరం కోయంబత్తూరులోని ఐఎన్ఎస్ అగ్రాని ప్రాంగణంలో ఆయనను అరెస్టు చేసినట్లు తెలుస్తోంది. అయితే ఈ కేసులో అధికారికంగా నిర్ధారించబడిన అంశాలు, నిందితుడిపై నమోదు చేసిన సెక్షన్లు, లీక్ అయినట్లు భావిస్తున్న సమాచార స్వరూపం వంటి వివరాలు దర్యాప్తులో వెల్లడికావాల్సి ఉంది. అరెస్టు అనంతరం ప్రదీప్ ముఖర్జీని కోయంబత్తూరు స్థానిక కోర్టులో హాజరుపరిచిన అనంతరం తదుపరి దర్యాప్తు కోసం ఆంధ్రప్రదేశ్‌కు తరలించినట్లు సమాచారం. ప్రస్తుతం విజయవాడలో సీఐ అధికారులు విచారణ కొనసాగిస్తున్నట్లు తెలుస్తోంది. అతను డబ్బు కోసం సమాచారాన్ని పంచుకున్నాడా? సోషల్ మీడియా ద్వారా మరెవరితోనైనా సంబంధాలు కొనసాగించాడా? ఈ వ్యవహారంలో మరికొందరి ప్రమేయం ఉందా? అనే కోణాల్లో పోలీసులు దర్యాప్తు చేస్తున్నట్లు సమాచారం.
సోషల్ మీడియా వేదికల ద్వారా సైనిక సిబ్బందిని పరిచయం చేసుకుని, వ్యక్తిగత సంబంధాలను పెంచుకుని, అనంతరం సున్నితమైన సమాచారాన్ని సేకరించే ప్రయత్నాలను భద్రతా సంస్థలు ‘హనీట్రాప్’గా పరిగణిస్తాయి. సైనిక, నౌకాదళ సిబ్బంది సోషల్ మీడియాలో అపరిచిత వ్యక్తులతో సంబంధాలు ఏర్పరుచుకునే విషయంలో అప్రమత్తంగా ఉండాలని భద్రతా సంస్థలు తరచూ హెచ్చరిస్తుంటాయి. తాజా కేసులోనూ అసలు ఎంతమేర సమాచారం బయటకు వెళ్లింది, దాని వల్ల భద్రతకు ఎలాంటి ముప్పు ఏర్పడింది, ఈ వ్యవహారం వెనుక మరెవరైనా ఉన్నారా అనే అంశాలపై దర్యాప్తు కీలకంగా మారింది.
