గంగానదిపై రఫేల్‌, తేజస్‌ గర్జన.. ప్రధాని మోదీ సమక్షంలో భారత వాయుసేన పవర్‌ఫుల్‌ షో!

ప్రముఖ ఆధ్యాత్మిక కేంద్రం వారణాసి (కాశీ) ఆకాశంలో భారత వైమానిక దళం తన సత్తా చాటింది. రఫేల్‌, తేజస్‌, సుఖోయ్‌-30 వంటి అత్యాధునిక యుద్ధ విమానాల విన్యాసాలు ప్రేక్షకులను మంత్రముగ్ధులను చేశాయి. గంగానదిపై తక్కువ ఎత్తులో విమానాలు దూసుకెళ్లడం, ఆకాశంలో విభిన్న ఆకృతులతో ఫార్మేషన్లు ఏర్పాటు చేయడం ఈ ప్రదర్శనకు ప్రత్యేక ఆకర్షణగా నిలిచాయి. భారత వైమానిక దళం 94వ వార్షికోత్సవాన్ని పురస్కరించుకుని నిర్వహించిన మూడు రోజుల ‘వింగ్స్‌ ఓవర్‌ ది గంగా’ వైమానిక ప్రదర్శన చివరి రోజు ప్రధానమంత్రి నరేంద్ర మోదీ, ఉత్తరప్రదేశ్‌ ముఖ్యమంత్రి యోగి ఆదిత్యనాథ్‌, రక్షణ మంత్రి రాజ్‌నాథ్‌ సింగ్‌ పాల్గొన్నారు. వారణాసిలోని నమో ఘాట్‌ వద్దకు చేరుకున్న వారు వైమానిక దళం ప్రదర్శించిన విన్యాసాలను వీక్షించారు.

ఆకాశంలో యుద్ధ విమానాల విన్యాసాలు

ఈ ప్రదర్శనలో భారత వైమానిక దళానికి చెందిన సుమారు 100 విమానాలు పాల్గొని తమ సామర్థ్యాన్ని చాటిచెప్పాయి. రఫేల్‌, సుఖోయ్‌-30 ఎంకేఐ, స్వదేశీ తేలికపాటి యుద్ధ విమానం తేజస్‌, మిరాజ్‌-2000, జాగ్వార్‌, మిగ్‌-29 వంటి యుద్ధ విమానాలు ఆకాశంలో అద్భుతమైన విన్యాసాలు ప్రదర్శించాయి. విమానాల వేగం, సమన్వయం, పైలట్ల నైపుణ్యం ప్రేక్షకులను ఆకట్టుకున్నాయి. ముఖ్యంగా తేజస్‌ విమానం తక్కువ ఎత్తులో ప్రదర్శించిన విన్యాసాలు ప్రత్యేక ఆకర్షణగా నిలిచాయి. రఫేల్‌ విమానాల గర్జనతో కాశీ ఆకాశం మార్మోగింది. మూడు రఫేల్‌ విమానాలు కలిసి ‘నీలకంఠ ఫార్మేషన్‌’లో ఎగురుతూ ప్రత్యేక దృశ్యాన్ని ఆవిష్కరించాయి.

‘ప్రచండ’, ‘పశుపతి’ ఫార్మేషన్లు ప్రత్యేక ఆకర్షణ

వైమానిక ప్రదర్శనలో భాగంగా ‘ప్రచండ ఫార్మేషన్‌’లో ఆరు రకాల యుద్ధ విమానాలు పాల్గొన్నాయి. సుఖోయ్‌-30 ఎంకేఐ, రఫేల్‌, జాగ్వార్‌, మిరాజ్‌-2000, తేజస్‌, మిగ్‌-29 విమానాలు సమన్వయంతో ఎగురుతూ ఆకాశంలో బాణం తల ఆకారాన్ని పోలిన నిర్మాణాన్ని ప్రదర్శించాయి.

నాలుగు జాగ్వార్‌ విమానాలు ‘పశుపతి ఫార్మేషన్‌’లో కలిసి ఎగురుతూ వజ్రాకారాన్ని ఏర్పరిచాయి. జాగ్వార్‌ యుద్ధ విమానాల ప్రత్యేక సామర్థ్యాలను ఈ విన్యాసాలు చాటిచెప్పాయి. అలాగే మిరాజ్‌-2000 యుద్ధ విమానాలు, భారత నావికాదళానికి చెందిన పి-8ఐ సముద్ర నిఘా విమానం కలిసి ‘నటరాజ ఫార్మేషన్‌’లో పాల్గొన్నాయి. సముద్ర నిఘా, వైమానిక శక్తి మధ్య సమన్వయాన్ని ఈ ప్రదర్శన ప్రతిబింబించింది.

రవాణా విమానాలు, హెలికాప్టర్ల విన్యాసాలు

యుద్ధ విమానాలతో పాటు రవాణా విమానాలు, హెలికాప్టర్లు కూడా ఈ షోలో ప్రత్యేకంగా నిలిచాయి. ‘భైరవ్‌ ఫార్మేషన్‌’లో సి-295 రవాణా విమానం, రెండు డోర్నియర్‌ విమానాలు పాల్గొన్నాయి. సైనికులు, సామగ్రి రవాణా నుంచి నిఘా కార్యకలాపాల వరకు వివిధ అవసరాలకు ఉపయోగపడే విమానాల సామర్థ్యాన్ని ఈ ప్రదర్శన ద్వారా చూపించారు.

‘భగీరథి ఫార్మేషన్‌’లో స్వదేశీ తేలికపాటి యుద్ధ హెలికాప్టర్లు, అమెరికా తయారీ అపాచీ దాడి హెలికాప్టర్లు పాల్గొన్నాయి. ఇవి ఆకాశంలో వజ్రాకారాన్ని పోలిన నిర్మాణాన్ని ఏర్పాటు చేశాయి. చేతక్‌ హెలికాప్టర్లు కూడా తమ విన్యాసాలతో ప్రేక్షకులను ఆకట్టుకున్నాయి.

గ్రూప్‌ కమాండర్‌ దీపాంకర్‌ నేతృత్వంలో మూడు చేతక్‌ హెలికాప్టర్లు త్రివర్ణ పతాకాన్ని ఆవిష్కరించాయి. భారత జాతీయ జెండా రంగులతో సాగిన ఈ ప్రదర్శన కార్యక్రమానికి హాజరైన వారిలో ప్రత్యేక ఉత్సాహాన్ని నింపింది.

Varanasi air show…Magnificent! https://t.co/nc1c5psdt8

— Narendra Modi (@narendramodi) October 25, 2026

భారత వైమానిక శక్తిని చాటిన ప్రదర్శన

‘వింగ్స్‌ ఓవర్‌ ది గంగా’ కార్యక్రమం కేవలం వినోద ప్రదర్శనకే పరిమితం కాలేదు. భారత వైమానిక దళం సాంకేతిక సామర్థ్యం, పైలట్ల నైపుణ్యం, స్వదేశీ యుద్ధ విమానాల ప్రాధాన్యాన్ని ప్రజలకు పరిచయం చేసే వేదికగా నిలిచింది. యుద్ధ విమానాలు, రవాణా విమానాలు, హెలికాప్టర్లు సమన్వయంతో చేసిన విన్యాసాలు దేశ రక్షణ రంగంలో భారత సామర్థ్యాన్ని ప్రతిబింబించాయి.

ప్రధాని మోదీ, రక్షణ మంత్రి రాజ్‌నాథ్‌ సింగ్‌, సీఎం యోగి ఆదిత్యనాథ్‌ సమక్షంలో జరిగిన ఈ వైమానిక ప్రదర్శన వారణాసిలో ప్రత్యేక ఆకర్షణగా నిలిచింది. గంగానది తీరంలో యుద్ధ విమానాల గర్జనలు, ఆకాశంలో రంగురంగుల ఫార్మేషన్లు, త్రివర్ణ పతాక ప్రదర్శనతో ‘వింగ్స్‌ ఓవర్‌ ది గంగా’ షో ప్రేక్షకులకు చిరస్మరణీయ అనుభూతిని అందించింది.

మరిన్ని జాతీయ వార్తల కోసం ఇక్కడ క్లిక్ చేయండి..