PM Modi: అక్టోబర్‌ 1 నుంచి ఇండియాలో 5G సేవలు.. ప్రారంభించనున్న ప్రధాని మోదీ.. తొలి దశలో 13 నగరాల్లో..

భారత టెలికాం చరిత్రలో సరికొత్త అధ్యాయం ప్రారంభం కానుంది. ఇంటర్నెట్‌ టెక్నాలజీ.. ఇంకో జనరేషన్‌ అప్‌డేట్‌కు రెడీ అయ్యింది. 4జీ నుంచి 5జీ అందుబాటులోకి వస్తోంది. రేపు ప్రధాని మోదీ చేతుల మీదుగా 5జీ సేవలు ప్రారంభంకానున్నాయి.. అసలు 5G ఎంట్రీతో భారతదేశంలో ఎలాంటి మార్పులు జరగబోతున్నాయి..?

PM Modi: అక్టోబర్‌ 1 నుంచి ఇండియాలో 5G సేవలు.. ప్రారంభించనున్న ప్రధాని మోదీ.. తొలి దశలో 13 నగరాల్లో..
Pm Narendra Modi
Sanjay Kasula

|

Sep 30, 2022 | 9:48 PM

ఇండియాలో 5G సేవలు ప్రారంభించేందుకు ముహుర్తం ఖరారైంది. ఢిల్లీలోని ప్రగతి మైదాన్‌ వేదికగా అక్టోబర్ ఒకటి నుంచి జరగనున్న ఇండియా మొబైల్‌ కాంగ్రెస్‌లో 5G సర్వీసులను ప్రధాని నరేంద్ర మోదీ ప్రారంభించనున్నారు. దేశంలోని ఎంపిక చేసిన నగరాల్లో 5G నెట్‌వర్క్ రోల్‌అవుట్ ప్రారంభమవుతుంది. ఇది కాకుండా, ఇండియా మొబైల్ కాంగ్రెస్ 2022 యొక్క ఆరవ ఎడిషన్‌ను కూడా ప్రధాని మోదీ ప్రారంభించనున్నారు. శుక్రవారం ప్రభుత్వం ఈ సమాచారాన్ని అధికారికంగా ధృవీకరించింది. దేశంలో 5G ప్రవేశపెట్టిన తర్వాత, కొత్త ఆర్థిక అవకాశాలు ఏర్పడతాయని.. భారతీయ సమాజానికి పరివర్తన శక్తిగా ఉండగల సామర్థ్యం కారణంగా అనేక సామాజిక ప్రయోజనాలు కూడా లభిస్తాయని ప్రకటన పేర్కొంది. భారతదేశంపై 5G ఆర్థిక ప్రభావం 2035 నాటికి $450 బిలియన్లకు చేరుకుంటుందని అంచనా.

తొలి దశలో హైస్పీడ్‌ 5G ఇంటర్నెట్‌ సేవలు అహ్మదాబాద్‌, చండీగఢ్‌, చెన్నై, ఢిల్లీ, గాంధీ నగర్‌, గురుగ్రామ్‌, జామ్‌నగర్‌, కోల్‌కతా, లక్నో, ముంబయి, పుణే సహ మొత్తం 13 నగరాల్లో అందుబాటులోకి రానున్నాయి. దేశమంతా 5G సేవలు అందుబాటులోకి వచ్చేందుకు రెండు మూడేళ్లు పడుతుందని అంచనా. ఇండియాలో ఈ సేవలను రిలయన్స్‌ జియో, ఎయిర్‌టెల్‌, వోడాఫోన్ ఐడియా అందించనున్నాయి.

ప్రస్తుతం అందుబాటులో ఉన్న 4G స్పీడ్‌ 60-70 Mbps. 5G స్పీడ్‌ 100 mbpsగా ఉంటుంది. అంటే దాదాపు రెట్టింపు అని చెప్పవచ్చు. హైస్పీడ్‌ డేటాతో పాటు 5Gలో మెషీన్‌ టూ మెషీన్ కమ్యూనికేషన్స్‌, కనెక్టెడ్‌ వెహికల్స్, AR, మెటావెర్స్‌ ఎక్స్‌పీరియన్స్ వంటివి ఎన్నో అందుబాటులోకి వస్తాయి.

వృద్ధికి సంప్రదాయ అడ్డంకులను అధిగమించడానికి స్టార్టప్‌లు, వ్యాపార సంస్థల ద్వారా ఆవిష్కరణలను ప్రోత్సహించడంతోపాటు ‘డిజిటల్ ఇండియా’ విజన్‌ను ముందుకు తీసుకెళ్లేందుకు సహాయపడుతుంది.

స్పెక్ట్రమ్ వేలం

దేశంలో ఎన్నడూ లేనంత అతిపెద్ద స్పెక్ట్రమ్ వేలం గత నెలలోనే జరిగింది. ఏడు రోజుల పాటు 40 రౌండ్లకు పైగా ప్రభుత్వం 1.5 లక్షల కోట్ల విలువైన స్పెక్ట్రమ్ కోసం వేలం వేసింది. మూడు రోజుల్లో స్పెక్ట్రమ్ వేలం ప్రక్రియ పూర్తవుతుందని తొలుత భావించారు.

72 GHzలో మొత్తం 51.2 GHz స్పెక్ట్రమ్‌ను ప్రభుత్వం విక్రయించింది. స్పెక్ట్రమ్ వేలం ప్రక్రియ పూర్తయిన సమయంలో  దేశంలోని అన్ని సర్కిళ్లను కవర్ చేయడానికి విక్రయించిన స్పెక్ట్రమ్ “చాలు” అని కేంద్ర కమ్యూనికేషన్ల మంత్రి అశ్వినా వైష్ణవ్ అన్నారు. రాబోయే రెండు-మూడేళ్లలో 5G ‘మంచి కవరేజ్’ అంచనా కూడా ఉంది.

టెలికాం సర్వీస్ ప్రొవైడర్లకు రూ.1,50,173 కోట్ల స్థూల ఆదాయంతో 51,236 MHz కేటాయించారు. IoT, M2M, AI, ఎడ్జ్ కంప్యూటింగ్, రోబోటిక్స్ మొదలైన వాటిలో దాని వినియోగం యొక్క అవసరాలను తీర్చడానికి బలమైన 5G పర్యావరణ వ్యవస్థను సృష్టించాల్సిన అవసరాన్ని వేలం నొక్కి చెప్పింది.

సర్వీస్ రోల్అవుట్..

ప్రధాని మోదీ ఏయే నగరాల్లో 5జీ సేవలను ప్రారంభించనున్నారనే దానిపై ప్రభుత్వం ఇంకా స్పష్టత ఇవ్వలేదు. అయితే టెలికాం కంపెనీలు తమ నెట్‌వర్క్‌లో 5G నెట్‌వర్క్‌ను ఎలా విడుదల చేయనున్నారో వెల్లడించాయి. రిలయన్స్ జియో 5G స్పెక్ట్రమ్ వేలంలో 88,000 కోట్ల రూపాయల విలువైన బిడ్‌లతో అత్యధిక బిడ్డర్‌గా నిలిచింది. ఈ ఏడాది దీపావళి రోజున ఢిల్లీ, ముంబై, చెన్నై, కోల్‌కతా వంటి మెట్రో నగరాల్లో జియో తన 5జీ నెట్‌వర్క్‌ను విడుదల చేయనున్నట్లు ఆగస్టులో కంపెనీ తెలిపింది .

రిలయన్స్ ఇండస్ట్రీస్ 45వ వార్షిక సర్వసభ్య సమావేశంలో రిలయన్స్ ఛైర్మన్ ముఖేష్ అంబానీ ప్రసంగిస్తూ, 2023 నాటికి దేశంలోని ప్రతి పట్టణం, ప్రతి గ్రామం, తహసీల్‌లో జియో 5G నెట్‌వర్క్‌ను అందుబాటులోకి తెస్తామని చెప్పారు.

5G స్పెక్ట్రమ్ వేలంలో రెండవ అత్యధిక బిడ్డర్ అయిన ఎయిర్‌టెల్, 2023 చివరి నాటికి అన్ని పట్టణ ప్రాంతాలలో తన నెట్‌వర్క్‌లో 5G సేవను అందుబాటులోకి తీసుకురానున్నట్లు ప్రకటించింది. దీనితో పాటు, మార్చి 2024 నాటికి, దేశంలోని అన్ని పట్టణాలు, గ్రామీణ ప్రాంతాలలో 5G నెట్‌వర్క్‌ను అందుబాటులోకి తీసుకురానున్నట్లు కంపెనీ తెలియజేసింది.

వేలంలో మూడవ స్థానంలో నిలిచిన వొడాఫోన్ ఐడియా (Vi) ఇంకా తన 5G లాంచ్ ప్లాన్‌ను అధికారికంగా ప్రకటించలేదు. అదే సమయంలో, వేలం రేసులో నాల్గవ కంపెనీ అదానీ డేటా నెట్‌వర్క్స్, ఇది అదానీ గ్రూప్‌కు చెందినది. కంపెనీ ప్రస్తుతం సాధారణ వినియోగదారుల కోసం 5జీ సేవలను విడుదల చేయదని, కేవలం ఎంటర్‌ప్రైజ్‌పైనే దృష్టి సారిస్తుందని స్పష్టం చేసింది.

మరిన్ని జాతీయ వార్తల కోసం

లేటెస్ట్ న్యూస్ హైలెట్స్ చూడండి

Follow us on

Most Read Stories

Click on your DTH Provider to Add TV9 Telugu