భారత్-అమెరికా బంధానికి కొత్త ఊపిరి.. త్వరలో ప్రధాని మోదీ, ట్రంప్ కీలక సమావేశం!

భారత ప్రధానమంత్రి నరేంద్ర మోదీ, అమెరికా అధ్యక్షుడు డొనాల్డ్ ట్రంప్ మధ్య త్వరలో జరగనున్న భేటీ అంతర్జాతీయ రాజకీయాల్లో ఆసక్తిని రేకెత్తిస్తోంది. జూన్ 15 నుండి 17 వరకు ఫ్రాన్స్‌లోని ఎవియాన్‌లో జరగనున్న జీ-7 శిఖరాగ్ర సమావేశం ఈ ఇద్దరు ప్రపంచ నేతల కలయికకు వేదిక కానుంది. 2025 ఫిబ్రవరి తర్వాత ఈ నేతలు ముఖాముఖి కలుసుకోవడం ఇదే తొలిసారి.

ఈ చారిత్రాత్మక సమావేశానికి పునాది వేసేందుకు అమెరికా విదేశాంగ కార్యదర్శి మార్కో రూబియో మే నెలలో ఢిల్లీని సందర్శించనున్నారు. మోదీ-ట్రంప్‌ల మధ్య జరగబోయే చర్చల ముసాయిదాను ఖరారు చేయడం, ద్వైపాక్షిక సంబంధాల్లో ఉన్న అడ్డంకులను తొలగించడం రూబియో పర్యటన ప్రధాన ఉద్దేశం. గత కొంతకాలంగా భారత్‌పై ట్రంప్ చేసిన కొన్ని ప్రతికూల వ్యాఖ్యలు, పాకిస్థాన్ పట్ల ఆయన చూపిస్తున్న సానుకూల ధోరణి ఇరు దేశాల మధ్య కొంత ఉత్కంఠను పెంచాయి. అయితే, భారత్‌తో సంబంధాలను దృఢపరుచుకోవాలనే ఒత్తిడి ట్రంప్ ప్రభుత్వంపై స్పష్టంగా కనిపిస్తోంది. సంభాషణల్లో ఏర్పడిన గ్యాప్‌ను పూడ్చేందుకు అమెరికా దౌత్యపరమైన ప్రయత్నాలను ముమ్మరం చేసింది.

ఇటీవల ఏప్రిల్ 17న అధ్యక్షుడు ట్రంప్ ప్రధాని మోదీని తన “స్నేహితుడు” అని సంబోధిస్తూ ప్రశంసలు కురిపించారు. పశ్చిమ ఆసియాలోని తాజా పరిణామాలు, ప్రాంతీయ భద్రతపై ఇద్దరు నేతలు ఫోన్ ద్వారా చర్చించారు. “మోదీ గొప్ప పని చేస్తున్నారు, ఆయన నాకు మంచి మిత్రుడు” అని ట్రంప్ పేర్కొనడం ఇరు దేశాల మధ్య మంచు కరుగుతోందనడానికి సంకేతం.

పశ్చిమ ఆసియాలో మారుతున్న సమీకరణలు, ప్రపంచ భద్రతా సవాళ్ల దృష్ట్యా, మోదీ-ట్రంప్ భేటీ అత్యంత ప్రాధాన్యత సంతరించుకుంది. విభేదాలను పక్కన పెట్టి, వ్యూహాత్మక ప్రయోజనాల కోసం భారత్-అమెరికా ఎంతవరకు కలిసి నడుస్తాయో ఈ జూన్ సమావేశం తేల్చనుంది. ఈ పర్యటన కేవలం రెండు దేశాలకే కాకుండా, మొత్తం ఇండో-పసిఫిక్ ప్రాంత భవిష్యత్తుకు దిశానిర్దేశం చేసే అవకాశం ఉంది.

మరిన్ని జాతీయ వార్తల కోసం ఇక్కడ క్లిక్ చేయండి..