ఈ మగ ‘నాగు’తో పెళ్లా..? నో..నో.. వధువు షాకింగ్ డెసిషన్

ప్రతి పెళ్లిలోనూ ఉత్సాహంగా నాగిని డ్యాన్స్ చేయడమన్నది సాధారణంగా అన్ని ప్రాంతాల్లో చూస్తూనే ఉంటాం. అయితే ఇప్పుడు అదే నాగిని డ్యాన్స్ విడాకులకు కారణమైంది. పెళ్లైన వెంటనే నాగిని డ్యాన్స్ చేస్తోన్న వరుడికి వెంటనే విడాకులు చెప్పేసింది ఆ పెళ్లికూతురు. ఈ సంఘటన ఉత్తర్‌ ప్రదేశ్‌లో జరిగింది.

వివరాల్లోకి వెళ్తే.. లఖింపూర్ ఖేర్‌లోని మైలానీ అనే ప్రాంతంలో శుక్రవారం ఓ వివాహం జరిగింది. ఈ నేపథ్యంలో బరాత్‌‌ను పూర్తి చేసుకున్న ఓ పెళ్లికొడుకు.. ఫంక్షన్ హాల్‌కు చేరుకున్నాడు. అక్కడ తన సన్నిహితులతో కలిసి ఆ వరుడు డ్యాన్స్ చేస్తుండగా.. పెళ్లికూతురు తరఫున వారు వచ్చి అతడిని వివాహవేదికకు తీసుకెళ్లేందుకు ప్రయత్నించారు. అప్పటికే ఆల్కహాల్ సేవించిన ఆ వరుడు వారితో అసభ్యంగా ప్రవర్తించాడు. దీంతో అక్కడ గొడవ మొదలుకాగా.. ఎలాగోలా సర్ధిచెప్పిన పెద్దలు అతడిని వేదిక వద్దకు తీసుకెళ్లారు. అక్కడ దండలు మార్చుకున్న వెంటనే.. మళ్లీ కిందికి వెళ్లి నాగిని డ్యాన్స్ చేశాడు. దీంతో విసుగెత్తిపోయిన ఆ వధువు తనకు ఈ పెళ్లి వద్దంటూ చెప్పేసి.. వేదికను దిగి వెళ్లిపోయింది. ఆమెను బుజ్జగించేందుకు పెద్దలు రంగంలోకి దిగినా.. వారి మాట వినలేదు. ఈ క్రమంలో వధువును వరుడు కొట్టినట్లు కూడా తెలుస్తోంది. మొత్తానికి అక్కడ గొడవ పెద్దది కావడంతో.. విషయం తెలుసుకున్న పోలీసులు రంగ ప్రవేశం చేశారు. అయితే దీనిపై కేసును నమోదు చేయడానికి ఇరు కుటుంబాలు అభ్యంతరం చెప్పడంతో.. వారు వెనక్కి వచ్చేశారు. ఇక ఈ సంఘటన తరువాత పెళ్లి కుమారుడు తరపు వాళ్లు కూడా వెంటనే ఆ మాల్‌ను వదిలి వెళ్లిపోయినట్లు తెలుస్తోంది.