భారత్‌లో అమెరికా విదేశాంగ మంత్రి మార్కో రూబియో పర్యటన.. ముంబై, జామ్‌నగర్‌కు రాక

అమెరికా-భారత్ వ్యూహాత్మక భాగస్వామ్యాన్ని మరింత బలోపేతం చేయడం, ఇంధన రంగంలో సహకారాన్ని పెంచుకోవడమే లక్ష్యంగా అమెరికా విదేశాంగ మంత్రి మార్కో రూబియో భారత్‌లో పర్యటించనున్నారు. అక్టోబర్ 17 నుంచి 22 వరకు ఉజ్బెకిస్థాన్‌తో పాటు భారత్‌లోని ముంబై, జామ్‌నగర్ నగరాల్లో ఆయన పర్యటన కొనసాగనుంది.

అమెరికా విదేశాంగ మంత్రి మార్కో రూబియో అక్టోబర్ 17 నుంచి 22 వరకు మధ్య ఆసియా, భారత్‌లో పర్యటించనున్నారు. ఈ పర్యటనలో భాగంగా తొలుత ఉజ్బెకిస్థాన్‌లోని సమర్‌కండ్‌లో జరిగే C5+1 మంత్రుల సమావేశంలో పాల్గొంటారు. అనంతరం భారత్‌కు చేరుకుని ముంబై, జామ్‌నగర్‌లలో పర్యటించనున్నారు.

మధ్య ఆసియా దేశాలతో వాణిజ్య సంబంధాల బలోపేతం

ఉజ్బెకిస్థాన్ పర్యటనలో భాగంగా C5+1 మంత్రుల సమావేశంలో పాల్గొనే మార్కో రూబియో.. అమెరికా, మధ్య ఆసియా దేశాల మధ్య వ్యూహాత్మక సహకారాన్ని పెంపొందించడంపై దృష్టి సారించనున్నారు. ఈ వేదిక ద్వారా ప్రాంతీయ శాంతి, ఆర్థిక అభివృద్ధికి అవకాశాలను విస్తరించడమే లక్ష్యంగా అమెరికా భావిస్తోంది. అలాగే C5 దేశాలైన ఉజ్బెకిస్థాన్, కజకిస్థాన్, తజికిస్థాన్, తుర్క్‌మెనిస్థాన్, కిర్గిజ్ రిపబ్లిక్‌కు చెందిన ఉన్నతాధికారులతో ద్వైపాక్షిక చర్చల్లోనూ రూబియో పాల్గొంటారు.

ఈ పర్యటనలో ప్రత్యేకంగా 200 మందికి పైగా వ్యాపార ప్రముఖులతో కూడిన అమెరికా వాణిజ్య ప్రతినిధి బృందానికి ఆయన నాయకత్వం వహించనున్నారు. తద్వారా అమెరికా, మధ్య ఆసియా దేశాల మధ్య వాణిజ్య సంబంధాలను మరింత విస్తరించడంతో పాటు పెట్టుబడులకు కొత్త అవకాశాలను ప్రోత్సహించాలని లక్ష్యంగా పెట్టుకున్నారు.

భారత్‌తో వ్యూహాత్మక భాగస్వామ్యంపై చర్చలు

మధ్య ఆసియా పర్యటన అనంతరం మార్కో రూబియో భారత్‌కు రానున్నారు. ఈ ఏడాది ఆయన భారత్‌లో పర్యటించడం ఇది రెండోసారి. భారత్‌లో ఉన్నతస్థాయి ప్రభుత్వ ప్రతినిధులతో సమావేశమై ఇరు దేశాల మధ్య వ్యూహాత్మక భాగస్వామ్యాన్ని మరింత బలోపేతం చేసే అంశాలపై చర్చించనున్నారు.

ప్రాంతీయ, అంతర్జాతీయ పరిణామాలపై అభిప్రాయాలను పంచుకోవడంతో పాటు ఇంధన రంగంలో పరస్పర సహకారాన్ని పెంచుకునే అవకాశాలపైనా చర్చలు జరగనున్నాయి. అలాగే వాణిజ్య పెట్టుబడులు, ఆర్థిక సహకారాన్ని ప్రోత్సహించే లక్ష్యంతో వ్యాపార ప్రముఖులతోనూ రూబియో సమావేశం కానున్నారు. ముంబై, జామ్‌నగర్ పర్యటనల ద్వారా భారత్‌తో అమెరికా వాణిజ్య సంబంధాలను మరింత ముందుకు తీసుకెళ్లే అవకాశాలపై దృష్టి సారించనున్నారు.

భారత్‌-అమెరికా సంబంధాలకు ప్రాధాన్యం

ప్రపంచ రాజకీయాలు, ప్రాంతీయ భద్రత, ఇంధన అవసరాలు, ఆర్థిక సహకారం వంటి అంశాలు ప్రాధాన్యం సంతరించుకున్న నేపథ్యంలో మార్కో రూబియో పర్యటనకు ప్రాముఖ్యత ఏర్పడింది. ఈ పర్యటనలో జరిగే చర్చలు భారత్‌-అమెరికా వ్యూహాత్మక భాగస్వామ్యాన్ని మరింత బలోపేతం చేయడానికి, వాణిజ్య సంబంధాలను విస్తరించడానికి దోహదపడతాయని భావిస్తున్నారు.