అది పోలీసు లాఠీ.. ఇది తుపాకీ తూటా.. ఛిల్లింగ్ వీడియో

ఇటీవల ఢిల్లీ అల్లర్ల సందర్భంగా నిరాయుధుడై.. కేవలం ఓ లాఠీ మాత్రమే పట్టుకున్న ఓ పోలీసు అధికారికి, చేతిలో గన్ తో కాల్పులు జరిపిన ఓ యువకునికి మధ్య జరిగిన ఘర్షణ తాలూకు వీడియో సంచలనం సృష్టిస్తోంది. ఈ నెల 24 న నార్త్ ఈస్ట్ ఢిల్లీలో చెలరేగిపోయిన అల్లరిమూకలను అదుపు చేసేందుకు ఒంటరిగా వెళ్లిన దీపక్ దహియా అనే పోలీసు అధికారిని  ఆందోళనకారుడు షారుఖ్ తన గన్ తో బెదిరించి కాల్పులు జరిపాడు. ఆ ఘటనలో అతగాడు వదిలిన బులెట్ దీపక్ ఎడమవైపున కొద్దీ దూరం నుంచి దూసుకుపోయింది. దాంతో షారుఖ్ మళ్ళీ గాల్లోకి కాల్పులు జరిపి పారిపోయాడు. ఒక సమయంలో దీపక్ కి, ఇతనికి మధ్య తోపులాట జరిగింది. దగ్గరలోని ఓ భవనంపైనుంచి ఓ వ్యక్తి తన మొబైల్ తో వీరి వైనాన్ని వీడియో తీశాడు. బుల్లెట్ ఏ మాత్రం తగిలినా దీపక్ గాయపడిఉండేవాడే ! (షారుఖ్ కి క్రిమినల్ రికార్డు లేకపోయినా అతని తండ్రికి ఉందట. డ్రగ్స్ అక్రమ రవాణాకు పాల్పడినందుకు ఆ ‘తండ్రి’ ని పోలీసులు అరెస్టు చేయగా.. బెయిలుపై విడుదలయ్యాడట).

కాగా-ఢిల్లీ హింసలో మృతి చెందినవారి  సంఖ్య 42 కి, గాయపడిన వారి సంఖ్య 200 మందికి పైగా పెరిగిపోయింది. ఆందోళనకారులు ఓ స్కూలుకు నిప్పు పెట్టగా ఆ స్కూల్లోని పుస్తకాలు, ఫర్నిచర్ అంతా పూర్తిగా దగ్ధమయ్యాయి. ఓ ఇంటికి నిప్పు పెట్టగా ఆ ఇంట్లోని 85 ఏళ్ళ వృధ్ధురాలు అందులోనే చిక్కుకుని ప్రాణాలు కోల్పోయింది.  ఈ హింసకు సంబంధించి పోలీసులు 100 మందిని అరెస్టు చేశారు. సుమారు ఆరువందలమందికి పైగా అనుమానితులను అదుపులోకి తీసుకున్నారు. 123 ఎఫ్ ఐ ఆర్ లు దాఖలయ్యాయి. అయితే రెచ్ఛగొట్టే, విద్వేష పూరిత ప్రసంగాలు చేసిన బీజేపీ నేతలపై ఒక్క ఎఫ్ ఐ ఆరూ దాఖలు కాకపోవడం విశేషం.