పెంపుడు జంతువుల విషయంలో ఈ తప్పులు చేయకండి..? నిపుణులు ఏం చెబుతున్నారంటే..?

పెంపుడు జంతువులను ఇంట్లో భాగంగా చూసుకునే వారు చాలా మంది ఉంటారు. వీటిని ఎంతో ప్రేమగా చూసుకుంటారు, స్నానం చేయిస్తారు, మంచి ఆహారం అందిస్తారు. అంతేకాకుండా కొంతమంది పెంపుడు జంతువులను ముద్దు పెట్టుకోవడం దగ్గరగా అలవాటు చేసుకోవడం చేస్తుంటారు. అయితే పెంపుడు జంతువులకు ముద్దు పెట్టుకోవడం ఆరోగ్యపరంగా మంచిదేనా..? దీనివల్ల ఏమైనా దుష్ప్రభావాలు ఉంటాయా..? అనే దానిపై నిపుణులు ఏం చెబుతున్నారో ఇప్పుడు తెలుసుకుందాం.

చాలా మంది కుక్కలు, పిల్లులు, కుందేళ్లు, చిలుకలు వంటి జంతువులను ఎంతో ప్రేమగా పెంచుకుంటారు. కొంతమంది అయితే వీటిని ముద్దు పెట్టుకోవడమే కాకుండా తమతో పాటు పడుకునేలా చేస్తారు. ఈ అనుబంధం బలంగా ఉండటంతో పెంపుడు జంతువుల పట్ల వారు అపారమైన ప్రేమను పెంచుకుంటారు. వీటితో మాట్లాడటం, ఆడుకోవడం, ఒంటరితనాన్ని పోగొట్టుకోవడం మానసిక ప్రశాంతతనిస్తాయి. అయితే ఈ ప్రేమ కొన్నిసార్లు మన ఆరోగ్యానికి హానికరంగా మారే అవకాశముంది.

పెంపుడు జంతువుల శరీరంపై, నోటిలో అనేక రకాల సూక్ష్మజీవులు, బ్యాక్టీరియా, వైరస్‌లు ఉంటాయి. వీటిని ముద్దు పెట్టుకోవడం వల్ల అవి మన శరీరానికి సోకే అవకాశం ఉంది. ముఖ్యంగా చిన్న పిల్లలు, వృద్ధులు, రోగనిరోధక శక్తి తక్కువగా ఉన్నవారు పెంపుడు జంతువులను ముద్దు పెట్టుకోవడం వల్ల త్వరగా ఇన్ఫెక్షన్లు వచ్చే అవకాశముంది. చిన్న పిల్లలకు ముద్దు పెట్టకూడదని డాక్టర్లు సూచించడంలో ప్రధాన కారణం కూడా ఇదే. మన నోటిలో ఉండే లాలాజలం పిల్లల శరీరంపై పడితే ఇన్ఫెక్షన్లు వచ్చే ప్రమాదం ఉంది. ఇదే విధంగా పెంపుడు జంతువులను ముద్దు పెట్టుకోవడం వల్ల కూడా వాటిలో ఉండే సూక్ష్మజీవులు మనకు సోకే ప్రమాదం ఉంటుంది.

పెంపుడు జంతువులు ఇంట్లో వివిధ ప్రాంతాల్లో తిరుగుతూ ఉంటాయి. నేలపై పడుకుంటాయి. బహిరంగ ప్రదేశాల్లో తిరిగి రకరకాల వైరస్‌లను సేకరించవచ్చు. వీటి వల్ల వివిధ రకాల బ్యాక్టీరియా ఇంట్లో వ్యాపించే అవకాశం ఉంది. పెంపుడు జంతువులను తరచుగా ముద్దు పెట్టుకోవడం వల్ల మన శరీరంలో రోగనిరోధక శక్తి బలహీనపడుతుంది. దీని ప్రభావంగా చిన్న చిన్న ఆరోగ్య సమస్యలు తేలికగా సోకే అవకాశం ఉంటుంది.

ఇంకా పెంపుడు జంతువులకు ముద్దు పెట్టుకోవడం వల్ల కొన్ని తీవ్రమైన వ్యాధులు వచ్చే ప్రమాదం ఉంది. ముఖ్యంగా చిగుళ్ల ఇన్ఫెక్షన్లు, నోటి సమస్యలు పెరిగే అవకాశం ఉంది. అంతేకాకుండా మన నోటిలో కూడా బ్యాక్టీరియా పెరిగిపోవచ్చు. దీంతో కొంత మందికి దంత సమస్యలు రావచ్చు.

పెంపుడు జంతువులతో కలిసి పడుకునే వారిలో చర్మ సమస్యలు అధికంగా కనిపిస్తున్నాయని నిపుణులు హెచ్చరిస్తున్నారు. జంతువుల వెంట్రుకలు అవి కలుషితమైన చోట తిరిగినప్పుడు వచ్చే మైక్రోబ్స్ వల్ల చర్మం దురద, అలర్జీ వంటి సమస్యలు తలెత్తుతాయి.

పెంపుడు జంతువుల పట్ల ప్రేమ చూపించడం తప్పు కాదు.. కానీ వాటిని ముద్దు పెట్టుకోవడం ఆరోగ్యానికి హానికరం కావచ్చు. పెంపుడు జంతువులను శుభ్రంగా ఉంచుకోవడం, టీకాలు వేయించడం, సరిగ్గా చూసుకోవడం వల్ల ఈ సమస్యలను దూరం చేసుకోవచ్చు. జంతువుల ఆరోగ్యాన్ని కాపాడుకోవడమే కాదు మన ఆరోగ్యాన్నీ కూడా పరిరక్షించుకోవడం అవసరం. వాటిపై ప్రేమ చూపించడానికి ముద్దు పెట్టుకోవడం తప్పనిసరి కాదు కాబట్టి జాగ్రత్తలు తీసుకుంటేనే మంచిది.