తక్కువ తిన్నా బరువు పెరుగుతున్నారా.. తిండి కాదు.. అసలు నిజాలు తెలిస్తే షాకే..

నేటి కాలంలో ఊబకాయం అనేది ఒక ప్రపంచ స్థాయి ఆరోగ్య సమస్యగా మారింది. చాలామంది బరువు పెరగడానికి కేవలం అతిగా తినడం మాత్రమే కారణమని భావిస్తారు. కానీ, సైన్స్ చెబుతున్న నిజాలు వేరేలా ఉన్నాయి. కొంతమంది తక్కువ తిన్నా, క్రమం తప్పకుండా వ్యాయామం చేసినా బరువు పెరుగుతుంటారు. దీని వెనుక ఉన్న హార్మోన్ల రహస్యాలు, జీవనశైలి లోపాల గురించి ప్రముఖ వైద్యులు డాక్టర్ దీపక్ కుమార్ సుమన్ ఆసక్తికరమైన విషయాలను పంచుకున్నారు.

హార్మోన్ల అసమతుల్యతే ప్రధాన శత్రువు

డాక్టర్ దీపక్ ప్రకారం.. బరువు పెరగడానికి కేవలం క్యాలరీలు మాత్రమే కారణం కాదు. శరీరంలోని హార్మోన్ల అసమతుల్యత దీనికి ప్రధాన కారణం. థైరాయిడ్ సమస్యలు, పీసీఓఎస్, లేదా ఇన్సులిన్ నిరోధకత ఉన్నవారు చాలా వేగంగా బరువు పెరుగుతారు. గత కొన్నేళ్లుగా థైరాయిడ్ సమస్యల కారణంగా బరువు పెరిగే బాధితుల సంఖ్య గణనీయంగా పెరగడం ఆందోళన కలిగించే విషయం.

నిద్రలేమితో పెరుగుతున్న ఆకలి

నిద్రకు, ఊబకాయానికి మధ్య విడదీయలేని సంబంధం ఉంది. రోజుకు 5 గంటల కంటే తక్కువ నిద్రపోయే వారిలో గ్రెలిన్ అనే హార్మోన్ స్థాయిలు పెరుగుతాయి. ఈ హార్మోన్ శరీరంలో ఆకలిని ప్రేరేపిస్తుంది. నిద్ర సరిగ్గా లేకపోవడం వల్ల ఈ హార్మోన్ అసమతుల్యత ఏర్పడి, వ్యక్తి తెలియకుండానే ఎక్కువ ఆహారం తీసుకుంటాడు. ఇది క్రమంగా ఊబకాయానికి దారితీస్తుంది.

ఒత్తిడితో పెరుగుతున్న పొట్ట చుట్టూ కొవ్వు

నేటి ఉరుకుల పరుగుల జీవితంలో మానసిక ఒత్తిడి మరో ప్రధాన కారణం. ఒత్తిడి పెరిగినప్పుడు శరీరంలో కార్టిసాల్ అనే హార్మోన్ విడుదలవుతుంది. ఈ హార్మోన్ ప్రభావం వల్ల ముఖ్యంగా కడుపు చుట్టూ కొవ్వు పేరుకుపోతుంది. ఈ రకమైన కొవ్వు కేవలం ఫిట్‌నెస్‌నే కాదు, గుండె జబ్బులు మరియు ఇతర ఆరోగ్య సమస్యలకు కూడా దారితీస్తుంది.

ఊబకాయం నివారణకు నిపుణుల సలహాలు

బరువును అదుపులో ఉంచుకోవడానికి కేవలం డైటింగ్ సరిపోదు.. సరైన జీవనశైలి అవసరమని నిపుణులు సూచిస్తున్నారు.

ఆహార నియంత్రణ: పోషకాహారం తీసుకోవాలి, జంక్ ఫుడ్‌కు దూరంగా ఉండాలి.

ఒత్తిడిని జయించండి: యోగా, ధ్యానం వంటివి ఒత్తిడిని తగ్గించి హార్మోన్లను అదుపులో ఉంచుతాయి.

క్రమం తప్పని వ్యాయామం: రోజుకు కనీసం 30-40 నిమిషాల శారీరక శ్రమ తప్పనిసరి.

బరువు అకస్మాత్తుగా పెరుగుతుంటే సొంత ప్రయోగాలు చేయకుండా వెంటనే డాక్టర్‌ను సంప్రదించి థైరాయిడ్ లేదా ఇన్సులిన్ పరీక్షలు చేయించుకోవాలి.

ఊబకాయం అనేది కేవలం రూపానికి సంబంధించిన సమస్య కాదు, అది అనేక జబ్బులకు మూలం. సరైన అవగాహన, క్రమశిక్షణతో కూడిన జీవనశైలితో ఈ సమస్యను సులభంగా అధిగమించవచ్చు.