భయపెట్టే కలల వెనుక ఇంత కథ ఉందా.. మీ ఆరోగ్యాన్ని ఎలా దెబ్బతీస్తాయంటే..

సాధారణంగా అందరికీ అప్పుడప్పుడు చెడు కలలు రావడం సహజం. ఈ భయానక కలలు తరచుగా వచ్చి, మీ నిద్రను డిస్ట్రబ్ చేసి, మీ దైనందిన జీవితంపై ప్రభావం చూపుతున్నాయా..? అయితే.. అది నైట్‌మేర్ డిజార్డర్ అయ్యే అవకాశం ఉంది. ఈ పరిస్థితి పగటిపూట మీ మానసిక ఆరోగ్యం, ఏకాగ్రత, శక్తి స్థాయిలను ప్రభావితం చేస్తుంది.

నైట్‌మేర్ డిజార్డర్ అంటే ఏమిటి..?

నైట్‌మేర్ డిజార్డర్ అంటే గాఢ నిద్రలో ఉన్నప్పుడు పునరావృతమయ్యే భయానక కలలు. ఇవి వ్యక్తిని ఒక్కసారిగా నిద్ర నుంచి లేపి, వారి దినచర్యకు అంతరాయం కలిగిస్తాయి. అమెరికన్ అకాడమీ ఆఫ్ స్లీప్ మెడిసిన్ ప్రకారం.. ఈ పరిస్థితి దాదాపు 4 శాతం మంది పెద్దలను ప్రభావితం చేస్తుంది. ఇలాంటి కలలు వచ్చినప్పుడు కొందరు అరుస్తూ, లేచి కూర్చుని కల గురించి ఆలోచిస్తారు. కొందరు పీడకలలను స్పష్టంగా గుర్తుంచుకుంటే, మరికొందరు వాటిని పూర్తిగా గుర్తుంచుకోలేరు. ఈ పీడకలలు నేరుగా హానికరం కానప్పటికీ, అవి మీ మానసిక ఆరోగ్యాన్ని ప్రభావితం చేసి.. ప్రతికూల ఆలోచనలను పెంచుతాయి.

దీనికి కారణాలు ఏమిటి..?

పీడకలలతో మేల్కొనే ఈ నైట్‌మేర్ డిజార్డర్‌కు అనేక అంశాలు కారణం కావచ్చు:

మానసిక సమస్యలు: అధిక ఒత్తిడి, మానసిక గాయం, పోస్ట్ ట్రామాటిక్ స్ట్రెస్ డిజార్డర్.

ఆరోగ్య సమస్యలు: నిరాశ, ఆందోళన, క్రమరహిత నిద్ర.

జీవనశైలి: కొన్ని రకాల మందులు, మద్యం సేవించడం, పేలవమైన నిద్ర అలవాట్లు కూడా దీనికి దారితీయవచ్చు.

నివారణ – పరిష్కార మార్గాలు

ఈ లక్షణాలను తగ్గించడానికి, జీవనశైలిలో కొన్ని మార్పులు చేసుకోవడం అవసరం:

నిద్ర షెడ్యూల్: స్థిరమైన నిద్ర షెడ్యూల్‌ను పాటించడం మరియు తగినంత విశ్రాంతి తీసుకోవడం.

నివారించాల్సినవి: రాత్రిపూట భారీ భోజనం, మద్యం, భయానక కథనాలను చూడటం లేదా వినడం మానుకోవాలి.

ఇమేజ్ రిహార్సల్: ఇమేజ్ రిహార్సల్ వంటి సాధన చేయడం ప్రయోజనకరంగా ఉంటుంది.

ఎప్పుడు వైద్యుడిని సంప్రదించాలి..?

•  పీడకలలు వారానికి ఒకటి కంటే ఎక్కువసార్లు వస్తుంటే.
• పీడకలలు దీర్ఘకాలం కొనసాగితే లేదా ఏదైనా గాయంతో సంబంధం కలిగి ఉంటే.
• పీడకలలతో పాటు అరుపులు, తన్నడం లేదా శ్వాస తీసుకోవడంలో ఇబ్బంది ఉంటే..
• ఆత్మహత్య ఆలోచనలు వంటి తీవ్రమైన మానసిక సమస్యలు కలిగి ఉంటే.
• ముందస్తుగా గుర్తించి, చికిత్స తీసుకోవడం ద్వారా సమస్యను నివారించవచ్చు.

మరిన్ని లైఫ్‌స్టైల్ న్యూస్ కోసం ఇక్కడ క్లిక్ చేయండి..