Thyroid Diet: థైరాయిడ్‌తో బాధపడేవారు ఈ ఉప్పు తిన్నారో.. బండి షెడ్డుకే! జర భద్రం..
ఇటీవలి కాలంలో అధిక మంది థైరాయిడ్ సమస్యతో బాధపడుతున్నారు. ఇది మహిళల్లో అత్యంత సాధారణ ఆరోగ్య సమస్యలలో ఒకటి. మన దేశంలో దాదాపు 40-50 మిలియన్ల మంది థైరాయిడ్ వ్యాధితో బాధపడుతున్నారు. గుండె సమస్యల మాదిరిగానే థైరాయిడ్ కూడా సర్వసాధారణంగా మారుతోంది..
Updated on: Mar 24, 2025 | 3:02 PM
మహిళల్లో అత్యంత సాధారణ ఆరోగ్య సమస్యలలో థైరాయిడ్ ఒకటి. ముఖ్యంగా ఇటీవలి కాలంలో ఈ సమస్య రోజురోజుకూ పెరుగుతోంది. మన దేశంలో దాదాపు 40-50 మిలియన్ల మంది థైరాయిడ్ వ్యాధితో బాధపడుతున్నారు. గుండె సమస్యల మాదిరిగానే థైరాయిడ్ కూడా సర్వసాధారణంగా మారుతోంది. జీవనశైలి, ఆహారం, కాలుష్యం మొదలైన వాటి వల్ల థైరాయిడ్ సమస్యలు వస్తాయి. కాబట్టి, దీనిని అదుపులో ఉంచుకోవడం అత్యవసరం. సాధారణంగా థైరాయిడ్ సమస్యలు ఉన్నవారికి ఆహారం చాలా ముఖ్యం. కొన్ని ఆహారాలు తప్పనిసరిగా తినాలి. మరికొన్నింటిని నివారించాలి. కానీ కొన్నిసార్లు థైరాయిడ్ సమస్యలు ఉన్నవారు ఆహారం విషయంలో గందరగోళానికి గురవుతారు. ఉప్పు తినాలా? వద్దా? థైరాయిడ్ సమస్యను ఎలా నియంత్రించాలి? అనే సందేహాలు ప్రతి ఒక్కరికీ వస్తాయి. నిపుణులు ఏం చెబుతున్నారో ఇక్కడ చూద్దాం..
థైరాయిడ్ అంటే ఏమిటో తెలుసా?
థైరాయిడ్ గ్రంథి మెడ ముందు భాగంలో సీతాకోకచిలుక ఆకారంలో ఉండే గ్రంథి. ఇది జీవక్రియ వేగాన్ని నియంత్రించే హార్మోన్లను ఉత్పత్తి చేస్తుంది. దీనిని మాస్టర్ మెటబాలిక్ గ్రంథి అని కూడా అంటారు. శరీర జీవక్రియ రేటును ఇది నియంత్రిస్తుంది. ఇది T4 (థైరాక్సిన్), T3 (ట్రైయోడోథైరోనిన్) అనే హార్మోన్లను ఉత్పత్తి చేస్తుంది. అవి మన శరీరంలోని కణాలను శక్తిని ఉపయోగించుకునేలా నిర్దేశిస్తాయి. అయితే థైరాయిడ్ రుగ్మతలు హార్మోన్ ఉత్పత్తికి అంతరాయం కలిగించినప్పుడు జీవక్రియ నెమ్మదిస్తుంది. ఇది హార్మోన్ల అసమతుల్యతకు కారణమవుతుంది. ఇది హైపోథైరాయిడిజం, హైపర్ థైరాయిడిజానికి కారణమవుతుంది.
థైరాయిడ్ రోగులు ఎలాంటి ఉప్పు తినాలి?
వైద్యుల అభిప్రాయం ప్రకారం.. థైరాయిడ్ గ్రంథి సరిగ్గా పనిచేయడానికి ఉప్పు తీసుకోవడం చాలా ముఖ్యం. థైరాయిడ్ గ్రంథి సరిగ్గా పనిచేయడానికి అయోడిన్ చాలా అవసరం. కాబట్టి థైరాయిడ్ రోగులు ఎల్లప్పుడూ అయోడైజ్డ్ ఉప్పును తీసుకోవాలి (అయోడిన్ నిష్పత్తిలో కలిపిన ఉప్పును అయోడైజ్డ్ ఉప్పు అంటారు). ఈ ఉప్పు సాధారణంగా శుద్ధి చేసిన ఉప్పు రూపంలో లభిస్తుంది. దానికి అయోడిన్ కలుపుతారు. అయోడైజ్డ్ ఉప్పు థైరాయిడ్ గ్రంథి సక్రమంగా పనిచేయడానికి సహాయపడుతుంది. ఇది హైపోథైరాయిడిజం ప్రమాదాన్ని తగ్గిస్తుంది. అయోడిన్ లోపం వల్ల గాయిటర్ వంటి సమస్యలు వస్తాయి. కాబట్టి అయోడిన్ అవసరాన్ని తీర్చడానికి అయోడైజ్డ్ ఉప్పు అవసరం.
థైరాయిడ్ సమస్యలు ఉన్నవారికి ఏ ఉప్పు డేంజర్?
థైరాయిడ్ రోగులు సాధారణంగా పింక్ సాల్ట్ లేదా సాల్ట్ తినకూడదని వైద్యులు చెబుతున్నారు. ఎందుకంటే ఈ ఉప్పులో అయోడిన్ శాతం చాలా తక్కువగా ఉంటుంది. కాబట్టి దీనిని మితంగా వాడటం మంచిది. ఈ పింక్ సాల్ట్ హైపర్ థైరాయిడిజానికి అంతమంచిది కాదు. అలాగే సముద్రపు ఉప్పు కూడా సాధారణంగా థైరాయిడ్‌కు సిఫార్సు చేయరు. ఇందులో సహజంగానే అయోడిన్ తక్కువగా ఉంటుంది. కానీ హైపర్ థైరాయిడిజంతో బాధపడేవారికి ఇది మంచిదని, కానీ అయోడిన్ లోపం ఉన్నవారికి కాదని వైద్యులు అంటున్నారు.
థైరాయిడ్ సమస్యను ఎలా నియంత్రించాలి?
థైరాయిడ్‌ను ఆరోగ్యంగా నియంత్రణలో ఉంచుకోవడం అంత పెద్ద సవాలు కాదు. థైరాయిడ్ గ్రంథి సక్రమంగా పని చేయడానికి అయోడిన్ అవసరం. అందుకు క్రమం తప్పకుండా మన ఆహారంలో అవసరమైన మొత్తంలో అయోడిన్ అధికంగా ఉండే ఆహారాన్ని చేర్చుకుంటే, థైరాయిడ్ సమతుల్యంగా ఉంటుంది. కాబట్టి అయోడిన్ శాతం తక్కువగా ఉన్న ఆహారాలను తరచుగా తీసుకోకూడదు. ఆహారంలో సమతుల్య మొత్తంలో అయోడిన్ అందుబాటులో లేనప్పుడు, వైద్యులు అయోడైజ్డ్ ఉప్పు, అయోడిన్-ఫోర్టిఫైడ్ ఆహారాలను సిఫార్సు చేస్తారు. కానీ మీకు థైరాయిడ్ సమస్య ఉంటేమాత్రం వైద్యులు సిఫార్సు చేసిన ఆహారాలు మాత్రమే తీసుకోవడం మంచిది.
గమనిక: ఈ కంటెంట్ సాధారణ సమాచారం కోసం మాత్రమే. మరింత సమాచారం కోసం వైద్యుడిని సంప్రదించడం మర్చిపోవద్దు.
మరిన్ని ఆరోగ్య వార్తల కోసం క్లిక్‌ చేయండి.
