Longer Life: ఆయుష్షుకు అసలైన రహస్యం.. డైట్, వ్యాయామం కంటే ఇదే పవర్‌ఫుల్!

దీర్ఘకాలం జీవించాలనే కోరిక ప్రతి ఒక్కరికీ ఉంటుంది. దానికోసం రకరకాల డైట్లు, జిమ్ వర్కౌట్లు చేస్తుంటాం. అయితే, వీటన్నింటినీ మించి నిద్ర మన ఆయుష్షును ప్రభావితం చేస్తుందని శాస్త్రవేత్తలు గుర్తించారు. అమెరికాలోని వివిధ రాష్ట్రాల్లో జరిగిన ఈ విస్తృత పరిశోధనలో.. ధూమపానం తర్వాత మనిషి మరణానికి కారణమవుతున్న ప్రధాన అంశం నిద్రలేమేనని తేలింది. సరైన నిద్ర లేకపోవడం వల్ల మన రోగనిరోధక శక్తి, గుండె ఆరోగ్యం ఎలా దెబ్బతింటాయో తెలిపే పూర్తి విశ్లేషణ మీకోసం.

మనం తీసుకునే ఆహారం, చేసే శారీరక శ్రమ కంటే నిద్రకు అధిక ప్రాధాన్యత ఇవ్వాలని ‘స్లీప్ అడ్వాన్సెస్’ జర్నల్‌లో ప్రచురితమైన పరిశోధన స్పష్టం చేస్తోంది. 2019 నుండి 2025 వరకు సేకరించిన డేటాను విశ్లేషించగా కొన్ని దిగ్భ్రాంతికర నిజాలు వెలుగులోకి వచ్చాయి.

జీవితకాలంపై నిద్ర ప్రభావం: సాధారణంగా ఆయుష్షును ప్రభావితం చేసే అంశాల్లో ఆహారం, వ్యాయామం, సామాజిక సంబంధాలు కీలకమని భావిస్తాం. కానీ, వీటన్నింటికంటే నిద్రకే ఎక్కువ మార్కులు పడ్డాయి. ధూమపానం మినహాయిస్తే, మనిషి ఎంత కాలం బతుకుతాడు అనే విషయాన్ని నిర్ణయించడంలో నిద్ర అత్యంత బలమైన కారకంగా నిలిచింది.

శాస్త్రవేత్తలు ఏమంటున్నారు? పరిశోధనలో పాల్గొన్న డాక్టర్ ఆండ్రూ మెక్‌హిల్‌ ప్రకారం.. ప్రజలు రోజుకు కనీసం ఏడు నుండి తొమ్మిది గంటల నిద్రను తప్పనిసరిగా పొందాలి. నిద్ర అనేది కేవలం విశ్రాంతి మాత్రమే కాదు, అది గుండె ఆరోగ్యాన్ని మెరుగుపరుస్తుంది.. రోగనిరోధక శక్తిని పెంచుతుంది.. మెదడు పనితీరును క్రమబద్ధీకరిస్తుంది. ఏడు గంటల కంటే తక్కువ నిద్రపోయే వారిలో ఆయుర్దాయం గణనీయంగా తగ్గుతున్నట్లు గణాంకాలు చెబుతున్నాయి.

ప్రాధాన్యత మార్చుకోవాలి: చాలామంది నిద్రను వారాంతాల్లో చూసుకోవచ్చని లేదా తీరిక దొరికినప్పుడు పడుకోవచ్చని భావిస్తారు. కానీ, ఈ పరిశోధన ప్రకారం నిద్రను వాయిదా వేయడం అంటే మీ ఆరోగ్యాన్ని పణంగా పెట్టడమే. నిద్రను ఒక విలాసంగా కాకుండా, ఆరోగ్యకరమైన జీవితానికి అవసరమైన ప్రాథమిక అవసరంగా గుర్తించాలి.

గమనిక : ఈ సమాచారం అంతర్జాతీయ పరిశోధనల ఆధారంగా అందించబడింది. నిద్ర సమస్యలు ఉన్నవారు లేదా తీవ్రమైన నిద్రలేమితో బాధపడేవారు వైద్య నిపుణులను సంప్రదించి సరైన చికిత్స తీసుకోవడం ఉత్తమం. ఆరోగ్యకరమైన జీవనశైలిలో నిద్రతో పాటు సమతుల్య ఆహారం కూడా ముఖ్యమని మర్చిపోవద్దు.