దంపతులు విడిగా నిద్రపోతేనే బంధం బలపడుతుందా? ‘స్లీప్ డైవోర్స్’ వెనకున్న రహస్యం ఇదే!

నిద్ర అనేది మనిషి ఆరోగ్యానికి ఇంధనం వంటిది. భాగస్వాముల్లో ఒకరికి గురక ఉన్నా లేదా ఒకరు అర్ధరాత్రి వరకు పని చేసే అలవాటు ఉన్నా, అవతలి వ్యక్తి నిద్ర తీవ్రంగా ప్రభావితం అవుతుంది. ఈ సమస్యకు పరిష్కారంగానే ‘స్లీప్ డైవోర్స్’ పుట్టుకొచ్చింది. ఇది బంధాన్ని తెంచుకోవడం కాదు, ఒకరి నిద్రను మరొకరు గౌరవించడం.

తాజా సర్వేల ప్రకారం, భారతదేశంలోని దంపతుల్లో సగానికి పైగా జంటలు మెరుగైన నిద్ర కోసం వేర్వేరు పడకలపై లేదా వేర్వేరు గదుల్లో నిద్రపోవడానికే మొగ్గు చూపుతున్నారు. ఈ వినూత్న జీవనశైలి మార్పు గురించి మరిన్ని ఆసక్తికరమైన విషయాలు ఇప్పుడు చూద్దాం.

ప్రధాన కారణాలు..

నిద్ర నిపుణుల విశ్లేషణ ప్రకారం, దంపతులు వేర్వేరుగా నిద్రపోవడానికి అనేక కారణాలు ఉన్నాయి:

1. గురక, స్లీప్ అప్నియా‌‌ భాగస్వామి గట్టిగా గురక పెట్టడం వల్ల పక్కన ఉన్నవారికి నిద్రలేమి సమస్యలు తలెత్తుతాయి.
2. షిఫ్ట్ ఉద్యోగాలు‌‌- ఐటీ, ఇతర రంగాల్లో పనిచేసే వారి పని వేళలు వేర్వేరుగా ఉండటం. ఒకరు తెల్లవారుజామున నిద్రలేవాల్సి వస్తే, మరొకరు అప్పుడే పడుకునే పరిస్థితి ఉండటం.
3. పర్యావరణ విభేదాలు- గది ఉష్ణోగ్రత (AC కావాలా వద్దా?), లైటింగ్, బెడ్ మెత్తదనం వంటి విషయాల్లో అభిప్రాయ భేదాలు ఉండటం.
4. డిజిటల్ అలవాట్లు- పడుకునే ముందు ఒకరు మొబైల్ లేదా టీవీ చూడటం మరొకరికి అసౌకర్యాన్ని కలిగించడం.

బంధంపై ప్రభావం..

అధ్యయనాల ప్రకారం, వేరుగా నిద్రపోయే జంటల్లో సగానికి పైగా వారు గాఢ నిద్రను సొంతం చేసుకుంటున్నారు. నిద్ర సరిగ్గా లేకపోతే శారీరక అలసటతో పాటు మానసిక ఒత్తిడి పెరుగుతుంది. ఇది దంపతుల మధ్య అనవసరమైన గొడవలకు దారితీస్తుంది. మంచి నిద్ర వల్ల హృదయ సంబంధిత వ్యాధులు, మధుమేహం మరియు ఊబకాయం వంటి ముప్పులు తగ్గుతాయి. ఆరోగ్యంగా ఉన్న మనిషి తన బంధాన్ని కూడా మెరుగ్గా ఉంచుకోగలడు.

స్లీప్ డైవోర్స్ అనేది శాశ్వతమైనది కాదు. కొందరు వర్క్ డేస్‌లో వేరుగా పడుకుని, వీకెండ్స్‌లో కలిసి నిద్రపోతుంటారు. అయితే, ఈ పద్ధతి అందరికీ సెట్ కాదు. వేరుగా ఉండటం వల్ల కొందరిలో ఒంటరితనం పెరిగే ప్రమాదం ఉంది. పడుకునే ముందు మాట్లాడుకోవడం, కౌగిలించుకోవడం వంటివి జంటల మధ్య భావోద్వేగ అనుబంధాన్ని పెంచుతాయి. కాబట్టి, నిద్ర కోసం దూరంగా ఉన్నా, ఇతర సమయాల్లో నాణ్యమైన సమయాన్ని గడపడం ముఖ్యమని నిపుణులు సూచిస్తున్నారు.

ఆరోగ్యకరమైన నిద్ర ఎంత ముఖ్యమో, ఆరోగ్యకరమైన సంబంధం కూడా అంతే ముఖ్యం. మీ నిద్రకు భంగం కలుగుతుంటే, మీ భాగస్వామితో చర్చించి స్లీప్ డైవోర్స్‌ను ఒక ప్రయోగంగా చేసి చూడటంలో తప్పు లేదు. అంతిమంగా మీరు ఉత్సాహంగా, సంతోషంగా ఉండటమే ముఖ్యం!