Wall Cleaning Hacks: కొత్త గోడలపై పిల్లలు బొమ్మలు గీశారా? టెన్షన్ పడకండి.. పెయింట్ ఊడకుండా క్లీన్ చేసే సింపుల్ ట్రిక్స్!

గోడలను శుభ్రం చేసే ముందు మీ ఇంటి గోడకు ఉన్న పెయింట్ రకం (మ్యాట్ లేదా గ్లాసీ) ఏంటో తెలుసుకోవడం చాలా ముఖ్యం. కొన్ని పెయింట్లు సున్నితంగా ఉంటాయి కాబట్టి ఎక్కువ ఒత్తిడి ఇస్తే రంగు వెలిసిపోయే ప్రమాదం ఉంది. క్రేయాన్స్, పర్మనెంట్ మార్కర్లు గోడకు అంటుకున్న స్టిక్కర్లను తొలగించడానికి హెయిర్ డ్రైయర్, వంట నూనె వంటి ఇంట్లో దొరికే వస్తువులతోనే అద్భుతాలు చేయవచ్చు. ఆ చిట్కాలు ఏంటో ఇప్పుడు వివరంగా తెలుసుకుందాం.

క్రేయాన్ మరకలకు వేడి మంత్రం!

వ్యాక్స్ పెన్సిల్ లేదా క్రేయాన్ మరకలను తొలగించడానికి ‘వేడి’ ఒక అద్భుతమైన ఆయుధం. హెయిర్ డ్రైయర్ తీసుకుని మీడియం వేడి మీద ఆ మరకపై గాలిని పంపండి. వేడికి లోపల ఉన్న మైనం (వ్యాక్స్) కరగడం ప్రారంభమవుతుంది. ఆ సమయంలో ఒక మెత్తని గుడ్డను కొద్దిగా సబ్బు నీటిలో ముంచి తుడిస్తే మరకలు సులభంగా మాయమవుతాయి. మరీ మొండిగా ఉంటే కొంచెం వంట నూనెను వాడితే ఆ మైనం పూర్తిగా కరిగిపోతుంది.

మార్కర్ గీతలను పారదోలండిలా..

మార్కర్ పెన్నుల సిరా గోడలోకి వేగంగా ఇంకిపోతుంది. అది వాటర్ కలర్ మార్కర్ అయితే గోరువెచ్చని నీరు, సబ్బుతో పోతుంది. కానీ పర్మనెంట్ మార్కర్ అయితే మాత్రం కొంచెం ఓపిక అవసరం. ఆల్కహాల్ ఆధారిత శానిటైజర్ లేదా నెయిల్ పాలిష్ రిమూవర్‌ను ఒక స్పాంజ్‌కు అప్లై చేసి సున్నితంగా తుడవాలి. గట్టిగా రుద్దితే పెయింట్ వచ్చేస్తుంది కాబట్టి జాగ్రత్త వహించాలి. మార్కెట్లో దొరికే ‘మ్యాజిక్ ఎరేజర్’ కూడా ఇందుకు బాగా పనిచేస్తుంది.

స్టిక్కర్లను సురక్షితంగా తొలగించండి!

గోడకు అంటుకున్న స్టిక్కర్లను వేళ్లతో లాగడం అతిపెద్ద తప్పు. అలా చేస్తే పెయింట్ పెచ్చులూడిపోతుంది. స్టిక్కర్ మీద హెయిర్ డ్రైయర్‌తో వేడి గాలిని పంపితే, దాని కింద ఉన్న జిగురు మెత్తబడుతుంది. అప్పుడు ఒక మూల నుంచి సున్నితంగా లాగితే గోడకు ఎటువంటి నష్టం కలగకుండా స్టిక్కర్ వచ్చేస్తుంది. ఒకవేళ ఏవైనా జిగురు మరకలు మిగిలిపోతే, కొద్దిగా వంట నూనెను రాసి తుడిస్తే గోడ నిగనిగలాడుతుంది.